Skip to content

Al lo konteni

 LESON 33

Rit ek Naomi

Rit ek Naomi

I ti annan en letan kot i ti annan en lafanmin Izrael. En madanm Izraelit ki ti apel Naomi ti al reste Moab avek son msye ek zot de garson. Pli tar msye Naomi ti mor. Son bann garson ti marye avek de fiy Moabit, Rit ek Orpa. Malerezman, son de garson ti osi mor pli tar.

Ler Naomi ti tande ki i ti nepli annan lafanmin Izrael, i ti deside retourn kot li Izrael. Rit ek Orpa ti al avek li, me ler zot ti’n ariv lanmwatye semen, Naomi ti dir zot: ‘Zot ti bann bon madanm pour mon bann garson e bann bon belfiy pour mwan. Mon ti a kontan zot tou le de zot remarye. Alor, retourn kot zot Moab.’ Sa de madanm ti dir: ‘Nou kontan ou! Nou pa anvi kit ou.’ Naomi ti ensiste pour zot ale. Finalman, Orpa ti retournen me Rit ti reste. Naomi ti dir li: ‘Orpa in retourn kot zot pep ek zot bondye. Al avek li.’ Me Rit ti dir: ‘Mon pa pou kit ou. Ou pep pou vin mon pep e ou Bondye pou vin mon Bondye.’ Ki mannyer ou krwar Naomi ti santi ler Rit ti dir sa?

Rit ek Naomi ti ariv Izrael o konmansman rekolt lorz. En zour, Rit ti al anmas bann lagrenn ki ti reste dan plantasyon en zonm ki apel Boaz. Boaz ti garson Raab. I ti’n tande ki Rit en madanm sorti Moab ti’n reste fidel avek Naomi. I ti demann son bann travayer pour kit en pti pe plis lagrenn dan plantasyon pour Rit anmase.

 Sa zour swar, Naomi ti demann Rit: ‘Dan plantasyon lekel ou’n travay ozordi?’ Rit ti dir: ‘Dan plantasyon en zonm ki apel Boaz.’ Naomi ti dir li: ‘Boaz i fanmir mon msye. Kontinyen travay dan son plantasyon avek lezot zenn madanm. Ou pou an sekirite laba.’

Rit ti kontinyen travay dan plantasyon Boaz ziska ler sezon rekolt ti fini. Boaz ti remarke ki Rit ti travay dir e i ti en bon madanm. Sa letan, si en msye ti mor e i ti napa zanfan, fanmir sa msye ti kapab marye avek sa vev. Alor, Boaz ti marye avek Rit. Zot ti ganny en garson, ki zot ti apel Obed. Pli tar, Obed ti vin granpapa Lerwa David. Bann zanmi Naomi ti vreman kontan. Zot ti dir: ‘Zeova in donn ou Rit ki okip ou byen e la ou’n ganny en pti zanfan. Ki Zeova i ganny loue.’

“En vre zanmi i pli lwayal ki en frer.”​—Proverb 18:24