Granpret Eli ti annan de garson ki ti pret kot latant ladorasyon. Zot ti apel Ofni ek Fineas. Zot pa ti obeir lalwa Zeova e zot ti tret bann dimoun dan en move fason. Ler bann Izraelit ti anmenn bann zannimo pour ofer Zeova, Ofni ek Fineas ti pran bann pli zoli bout lavyann pour zot menm. Eli ti konnen ki son bann garson ti pe fer, me i pa ti fer nanryen. Eski Zeova ti pou kontinyen les zot fer sa?

Menm si Samyel ti bokou pli zenn ki Ofni ek Fineas, i pa ti zanmen fer parey zot. Zeova ti vreman kontan Samyel. En zour swar ler Samyel ti pe dormi, i ti tann en lavwa kriy li. I ti leve, tay kot Eli e dir ‘La mon la!’ Me Eli ti dir: ‘Mon pa’n kriy ou. Al dormi.’ Samyel ti al dormi. Apre i ti tann sa lavwa ankor. Ler Samyel ti tann sa lavwa en trwazyenm fwa, Eli ti realize ki Zeova ki ti pe kriy Samyel. Alor i ti dir Samyel ki si i tann sa lavwa ankor, i devret dir: ‘Zeova, koze, ou serviter pe ekoute.’

Alor, Samyel ti retourn dan son plas. Apre i ti tann en lavwa dir: ‘Samyel! Samyel!’ I ti reponn: ‘Koze, parski ou serviter pe ekoute.’ Zeova ti dir li: ‘Al dir Eli ki mon pou pini li ek son fanmir.  I konnen ki son bann garson pe fer bann move keksoz dan mon latant ladorasyon, me i pa fer nanryen.’ Lannmen bomaten, Samyel ti ouver laport latant ladorasyon parey i ti abitye fer. I ti per pour dir granpret sa ki Zeova ti’n dir li. Me Eli ti kriy li e demann li: ‘Mon garson, ki Zeova in dir ou? Dir mwan tou keksoz.’ Alor Samyel ti dir li tou keksoz.

Anmezir Samyel ti grandi, Zeova ti toultan avek li. Tou bann Izraelit dan sa pei ti konnen ki Zeova ti’n swazir Samyel konman en profet ek ziz.