I ti annan en zonm ki pa ti kapab marse ki ti abitye asize e mandyan toulezour kot baro tanp. En zour apremidi, i ti vwar Pyer ek Zan pe al dan tanp. I ti dir zot: ‘Silvouple, donn mwan en pti keksoz.’ Pyer ti dir li: ‘Mon annan en keksoz ki pli bon ki larzan pour donn ou. O non Zezi, leve e marse!’ Apre Pyer ti atrap son lanmen e lev li e sa zonm ti konmans marse! Lafoul ti vreman kontan e akoz sa mirak, en kantite dimoun ti vin disip.

Me bann pret ek Sadiseen ti vreman ankoler. Zot ti tyonbo bann zapot, anmenn zot ankour e demann zot: ‘Lekel ki’n donn zot pouvwar pour geri sa zonm?’ Pyer ti dir: ‘Zezi Kri ki zot ti touye ki’n donn nou pouvwar pour geri bann malad.’ Bann sef relizye ti kriye: ‘Aret koz lo Zezi!’ Me bann zapot ti dir: ‘Nou bezwen koz lo li. Nou pa pou arete.’

Osito ki Pyer ek Zan ti ganny large, zot ti al kot lezot zapot e dir zot sa ki ti’n arive. Zot ti priye e demann Zeova: ‘Silvouple ed nou annan lardyes pour ki nou kontinyen fer ou travay.’ Zeova ti donn zot son lespri sen e zot ti kontinyen prese e geri bann dimoun. Deplizanpli, en kantite dimoun ti vin bann disip. Bann Sadiseen ti sitan zalou ki zot ti aret bann zapot e met zot dan prizon. Me pandan lannwit, Zeova ti anvoy son lanz ki ti ouver baro prizon pour zot. Sa lanz ti dir zot: ‘Retourn kot tanp e kontinyen ansennyen.’

Son lannmen bomaten, bann zofisye ti dir Sannedren: ‘Baro prizon i fermen me bann zonm ki ti’n ganny arete in ale.’ En lot dimoun ti dir: ‘Zot dan tanp pe prese!’  Ankor en fwa, bann zapot ti ganny arete e zot ti ganny anmennen devan Sannedren. Granpret ti dir: ‘Nou ti donn zot lord pour aret koz lo Zezi!’ Me Pyer ti reponn: “Nou devret obei Bondye plito ki zonm.”

Bann sef relizye ti sitan ankoler ki zot ti anvi touy bann zapot. Me en Farizyen ki apel Gamalyel ti debout e dir: ‘Fer atansyon! Petet Bondye i avek sa bann zonm. Eski zot vreman anvi lager kont Bondye?’ Zot ti ekout son konsey. Zot ti fwet bann zapot, donn zot lord pour aret prese e apre zot ti les zot ale. Me sa pa ti anpes bann zapot kontinyen prese. Avek lardyes, zot ti kontinyen pres sa bon nouvel dan tanp e kazankaz.