Skip to content

Al lo konteni

 LESON 70

Bann lanz i anons nesans Zezi

Bann lanz i anons nesans Zezi

Sezar Ogis, sef Lanpir Romen ti donn en lord pour tou bann Zwif retourn kot zot pour anrezistre. Alor, Zozef ek Mari ti al Betleenm, kot fanmir Zozef ti sorti. Mari ti pros pour ganny son pti baba.

Ler zot ti ariv Betleenm, sel landrwa kot zot ti kapab reste ti dan en dan en pti lakaz kot bourik ek lezot zannimo i ganny mete. La ki Mari ti donn nesans son garson Zezi. I ti anvlop li dan bann bout latwal e met li dan en loz.

Pa lwen avek Betleenm, i ti annan serten berze ki ti vey zot mouton deor pandan lannwit. En sel kou, en lanz ti aparet avek zot e zot ti vwar lalimyer laglwar Zeova. Bann berze ti per, me lanz ti dir zot: ‘Pa bezwen per. Mon annan en bon nouvel pour zot. Ozordi, Mesi in ne Betleenm.’ Osito, en kantite lanz ti  aparet dan lesyel e dir: “Laglwar i pour nou Bondye dan lesyel e lape lo ater.” Apre sa, bann lanz ti disparet. Ki bann berze ti fer?

Bann berze ti dir kanmarad: “Annou al Betleenm deswit.” Deswit zot ti ale e zot ti vwar Zozef ek Mari dan en pti lakaz avek zot pti baba.

Tou dimoun ki ti tann sa ki lanz ti’n dir bann berze ti etonnen. Mari ti reflesir en kantite lo sa ki lanz ti’n dir e i pa ti zanmen bliye. Bann berze ti retourn kot zot troupo e zot ti remersye Zeova pour tou sa ki zot ti’n vwar e tande.

“Mon sorti kot Bondye e mon la. Mon pa’n vin lo mwan menm, me Bondye ki’n anvoy mwan.”​—Zan 8:42