Skip to content

Al lo konteni

 LESON 58

Zerizalenm i ganny detrir

Zerizalenm i ganny detrir

Pep Zida ti kit Zeova e zot ti kontinyelman ador bann fo bondye. Pour plizyer lannen, Zeova ti kontinyen sey ed zot. I ti anvoy en kantite profet pour averti zot, me zot pa ti ekoute. O kontrer zot ti boufonn bann profet. Ki mannyer Zeova ti met en lafen avek zot fo ladorasyon?

Neboukadnezar, lerwa Babilonn, ti pe konkerir nasyon apre nasyon. Premye fwa i ti defet Zerizalenm, i ti fer prizonnyen Lerwa Zeoyakin, bann prens, bann gerye ek bann artizan e anmenn zot Babilonn. I ti osi pran tou bann trezor dan tanp Zeova. Neboukadnezar ti fer Zedikya vin lerwa Zida.

Premye kou Zedikya ti obei Neboukadnezar. Me bann nasyon dan zalantour ek bann fo profet ti konsey Zedikya pour rebel kont Babilonn. Zeremi ti averti li: ‘Si ou rebele, dimoun pou ganny touye, pour napa ase manze e dimoun pou malad, Zida.’

Apre ki i ti’n dirize pour wit an, Zedikya ti deside rebel kont Babilonn. I ti demann larme Ezipsyen pour ed li. Apre, Neboukadnezar ti anvoy son larme pour atak Zerizalenm e zot ti kanpe otour sa lavil. Zeremi ti dir Zedikya: ‘Zeova in dir ki si zot rann lekor avek Babilonn, ou avek lavil pou sirviv. Me si ou pa fer sa, bann Babilonnyen pou bril Zerizalenm e fer ou prizonnyen.’ Zedikya ti dir: ‘Mon pa pou rann lekor!’

 Enn an edmi pli tar, larme Babilonnyen ti kas miray Zerizalenm e bril sa lavil. Zot ti bril tanp, touy en kantite dimoun e fer plizyer milye dimoun prizonnyen.

Zedikya ti kit Zerizalenm e sove, me bann Babilonnyen ti tay deryer li. Zot ti tyonbo li o bor lavil Zeriko e anmenn li kot Neboukadnezar. Lerwa ti fer bann garson Zedikya ganny egzekite devan li. Apre Neboukadnezar ti fer Zedikya aveg e met li dan prizon, kot i ti mor pli tar. Zeova ti promet bann dimoun Zida: ‘Apre 70 an, mon pou fer zot retourn Zerizalenm.’

Ki ti arive avek bann zenn ki ti ganny anmennen Babilonn konman prizonnyen? Eski zot ti pou reste fidel avek Zeova?

“Zeova, Bondye Tou Pwisan, ou bann zizman i drwat e vre.”​—Revelasyon 16:7