En zour swar, Lerwa Neboukadnezar ti ganny en rev en pe drol. Sa rev ti sitan fatig li ki i pa ti kapab dormi. I ti apel son bann mazisyen e dir zot: ‘Eksplik mwan mon rev.’ Zot ti dir: ‘Silvouple, dir nou ou rev.’ Me Neboukadnezar ti dir zot: ‘Non! Zot dir mwan ki mon’n reve si non mon pou touy zot.’ Zot ti dir li ankor: ‘Dir nou sa ki ou’n reve e nou ava eksplik ou.’ I ti dir: ‘Zot tou zot pe sey trik mwan. Dir mwan sa ki mon’n reve.’ Zot ti dir lerwa: ‘Napa personn ki kapab fer sa. Sa ki ou pe demann nou pour fer i enposib.’

Neboukadnezar ti sitan ankoler ki i ti donn lord pour ki tou bann konseye lerwa i ganny touye. Sa ti enkli Danyel, Sadrak, Mesak ek Abednego. Danyel ti demann lerwa pour donn zot letan. Apre, li ek son bann zanmi ti priy Zeova e demann li pour ed zot. Ki Zeova ti fer?

Dan en vizyon, Zeova ti montre Danyel rev Neboukadnezar e i ti eksplik li ki sa rev i vedir. Son lannmen, Danyel ti al kot en serviter lerwa e dir: ‘Pa bezwen touy okenn konseye lerwa. Mon kapab eksplik lerwa son rev.’ Sa serviter ti anmenn Danyel kot Neboukadnezar. Danyel ti dir lerwa: ‘Bondye in montre ou sa ki pou arive a lavenir. La sa ki ou’n reve: Ou ti vwar en gran stati avek en latet annor. Son pwatrin ek son lebra ti annarzan, son vant ek son kwis ti an kwiv, son lazanm ti an feray, son lipye ti en melanz feray ek later. Apre, en ros ti sorti lo en montanny e tap sa stati lo son lipye. Sa stati ti ganny kraze e i ti vin parey lapousyer ki divan ti soufle. Me sa ros ti vin en gran montanny e i ti ranpli later antye.’

 Apre Danyel ti dir: ‘La sa ki ou rev i vedir: Ou rwayonm i sa latet annor. Sa enn annarzan i sa rwayonm ki pou vin apre ou. Apre, i pou annan enn ki parey kwiv ki pou diriz lo later antye. Sa lot rwayonm apre pou for parey feray. Finalman, i pou annan en rwayonm ki pou divize. Serten bout pou for parey feray e lezot bout pou fay parey later. Sa ros ki vin parey en montanny i Rwayonm Bondye. I pou kraz tou sa bann rwayonm e i pou reste pour touzour.’

Neboukadnezar ti tonm devan Danyel lafas anba. I ti dir: ‘Ou Bondye in revel sa rev avek ou. Napa okenn Bondye ki parey li.’ Olye touy Danyel, Neboukadnezar ti fer li vin sef lo tou son bann konseye e sef provens Babilonn. Eski ou vwar ki mannyer Zeova ti reponn lapriyer Danyel?