Skip to content

Al lo konteni

 SAPIT 41

Bann zanfan ki fer Bondye kontan

Bann zanfan ki fer Bondye kontan

PARMI tou sa zanfan ki’n viv lo later, lekel ki’n pli fer Zeova kontan?— Son Garson, Zezi. Annou vwar ki Zezi ti fer pour fer son Papa dan lesyel kontan.

Zezi ek son paran ti reste lwen avek Zerizalenm. Zot ti bezwen mars apepre trwa zour sorti Zerizalenm kot zoli tanp Zeova ti ete pour ariv kot zot. Zezi ti apel sa tanp “lakaz mon Papa.” Tou le zan, i ti al laba avek son fanmiy pour Lapak.

En fwa, letan Zezi ti annan 12 zan, son fanmiy ti pe retourn kot zot sorti lafet Lapak. Ler zot ti aret dan sa landrwa kot zot ti pou pas lannwit, Mari ek Zozef ti remarke ki Zezi pa ti la. I pa ti ni avek zot bann fanmiy, ni avek zot bann zanmi. Alors deswit Mari ek Zozef ti retourn Zerizalenm pour rod Zezi. Kote ou krwar Zezi ti ete?—

Zot ti vwar li dan tanp. I ti pe ekout bann ansennyan e demann zot kestyon. Ler zot ti demann li en keksoz, i ti toultan annan en larepons. Sa bann ansennyan ti sirprann par sa bann bon larepons ki Zezi ti donnen. Ou vwar akoz Bondye ti kontan son Garson?—

Ler Mari ek Zozef ti trouv Zezi, zot ti byen soulaze. Me Zezi pa ti pe trakase li. I ti konnen ki tanp Bondye ti en bon landrwa pour li. Alors i ti demande: “Zot pa konnen ki mon bezwen  dan lakaz mon Papa?” I ti konnen ki tanp i lakaz Bondye, e i ti kontan ler i ti dan tanp.

Apre, Mari ek Zozef ti retourn Nazaret ansanm avek Zezi. Ou konnen ki mannyer Zezi ti konport li avek son paran?— Labib i dir ki i ti ‘kontinyen obei zot.’ Wi, i ti fer sa ki son paran ti demann li, menm si zot ti demann li pour fer bann louvraz parey al sers delo dan pi.Lik 2:41-52.

Ki mannyer Zezi ti fer Bondye kontan ler i ti ankor en zanfan?

Reflesir lo sa: Kantmenm Zezi ti parfe, i ti obeir son paran enparfe. Eski sa ti fer Bondye kontan?— Byensir, akoz Parol Bondye i dir bann zanfan: “Obei zot paran.” (Efezyen 6:1) Ou osi ou pou fer Bondye kontan si ou obeir ou paran, parey Zezi ti fer.

En lot fason ki ou kapab fer Bondye kontan i ler ou koz lo li avek lezot dimoun. Serten dimoun i krwar bann pti manrmay pa devret koz lo Bondye avek lezot. Me en  zour ler bann dimoun ti oule anpes bann pti garson fer sa, Zezi ti dir: ‘Zanmen zot in deza lir: “Dan labous bann zanfan ek bann pti baba, Bondye pou fer sorti kantik”?’ (Matye 21:16) Alors nou tou nou kapab koz avek lezot lo Zeova e dir zot ki i en Bondye merveye. Si nou anvi fer li, nou pou kapab. E si nou fer sa, nou pou fer Bondye kontan.

Kote nou aprann bann keksoz lo Bondye ki nou kapab koz lo la avek lezot?— Dan nou letid Labib ki nou fer dan lakour. Me nou aprann plis ankor ler nou rasanble avek bann serviter Bondye pour etidye ansanm. Be ki mannyer nou konnen lekel bann serviter Bondye?—

Ler bann dimoun i zwenn ansanm pour ador Bondye, ki zot fer? Eski zot vreman ansenny sa ki dan Labib? Eski zot lir Labib e diskit lo la? Koumsa ki nou ekout Bondye, pa i vre?— E dan bann renyon Kretyen nou ekspekte tann sa ki Bondye i dir, non?— Me si en dimoun i dir ou pa bezwen viv parey Labib i dir? Eski ou pou dir sa dimoun i en serviter Bondye?—

En lot keksoz pour reflesir lo la. Labib i dir ki bann serviter Bondye i form “en pep pour son non.” (Akt 15:14) Vi ki non Bondye i Zeova, nou kapab demann bann dimoun si Zeova i zot Bondye. Si zot dir non, alor nou konnen ki zot pa son bann serviter. Bann serviter Bondye i osi koz avek lezot lo Rwayonm Bondye. E zot montre ki zot kontan Bondye par obeir son bann komannman.1 Zan 5:3.

Si ou konn bann dimoun ki fer sa bann keksoz, ou devret zwenn ansanm avek zot pour ador Bondye. Ou devret ekout byen dan renyon e reponn kan bann kestyon i ganny demande.  Sanmenm ki Zezi ti fer ler i ti dan lakaz Bondye. Si ou fer sa bann keksoz, ou pou fer Bondye kontan, zis parey Zezi ti fer.

Ou mazin lezot zanfan dan Labib ki ti fer Bondye kontan?— Timote i en tre bon legzanp. Son papa pa ti krwar dan Zeova. Me son manman Enis ek son granmanman Lois ti servi Zeova. Timote ti ekout zot e aprann lo Zeova avek zot.

Ki Timote ti anvi fer, kantmenm son papa pa ti krwar dan Zeova?

Ler Timote ti’n gran, zapot Pol ti vizit sa lavil kot i ti reste. I ti remarke ki Timote ti vreman anvi servi Zeova. Alor i ti envit li pour fer plis dan servis Bondye. Partou kot zot ti ale, zot ti koz avek bann dimoun lo Rwayonm Bondye e lo Zezi.Akt 16:1-5; 2 Timote 1:5; 3:14, 15.

Me eski i annan zis legzanp bann pti garson dan Labib ki ti fer Bondye kontan?— Non. Annou vwar legzanp en pti fiy Izraelit ki ti fer Bondye kontan. Sa pti fiy ti viv en lepok kot  nasyon Siri ek nasyon Izrael ti de lennmi. En zour, Siri ti lager avek Izrael e pran sa pti fiy konman prizonnyen. I ti ganny anvoye dan lakaz Naamann, ki ti sef larme. E i ti vin servant madanm Naamann.

Naamann ti annan lalep. Napa okenn dokter ki ti kapab ed li. Me sa pti fiy Izraelit ti krwar ki en profet Bondye ti pou kapab ed Naamann. Me selman Naamann ek son madanm pa ti ador Zeova. Eski sa pti fiy ti devret dir zot sa ki i konnen? Ki ou ti pou’n fer ou?—

Ki mannyer sa pti fiy Izraelit ti fer Bondye kontan?

Sa pti fiy ti dir: ‘Si zis Naamann ti al kot profet Zeova an Izrael, son lalep ti pou geri.’ Naamann ti ekout sa pti fiy e i ti al vwar profet Zeova. Ler i ti fer sa ki sa profet ti dir li, i ti geri. Sa ti fer Naamann ador sa vre Bondye.2 Lerwa 5:1-15.

Ou ti a kontan ed en dimoun pour konn Zeova e sa ki i kapab fer, parey sa pti fiy?— Lekel ki ou kapab ede?— Okonmansman petet zot pou krwar zot pa bezwen led. Me ou kapab koz avek zot lo bann bon keksoz ki Zeova pe fer. E zot kapab ekoute. Antouka, asire ki sa pou fer Bondye kontan.

Get lezot verse Labib ki ankouraz bann zenn pour servi Bondye avek lazwa: Psonm 122:1; 148:12, 13; Eklezyast 12:1; 1 Timote 4:12; ek Ebre 10:23-25.