Skip to content

Al lo konteni

 SAPIT 28

Konman ou pou konnen lekel ou devret obei?

Konman ou pou konnen lekel ou devret obei?

PARFWA i difisil pour konnen lekel nou devret obeir. Petet ou manman oubyen ou papa i dir ou fer en keksoz. Me apre en mis lekol oubyen en gard i dir ou fer en lot keksoz. Lekel ki ou devret obeir dan sa ka?—

Dan Sapit 7 sa liv, nou ti lir Efezyen 6:1-3 dan Labib. I dir ki zanfan i devret obeir zot paran. ‘Zanfan, i zot devwar obei zot paran dan Senyer.’ Ou konnen ki savedir dan Senyer?— Bann paran ki dan Senyer i ansenny zot zanfan pour obeir lalwa Bondye.

Me i annan bann gran dimoun ki pa krwar dan Zeova. Zot kapab dir i pa mal pour kopye larepons ler ou pe fer legzanmen oubyen i pa mal pour pran en keksoz dan laboutik san peye. Ou krwar i mal pour en zanfan fer sa, kantmenm en gran dimoun i dir i byen?—

Pa bliye en fwa Lerwa Neboukadnetsar ti dir fodre tou dimoun i tonm azenou devan son stati annor. Me Sadrak, Mesak, ek Abednego pa ti oule fer sa. Ou konnen akoz?— Akoz Labib i dir dimoun i devret ador zis Zeova tousel.Egzod 20:3; Matye 4:10.

Ki Pyer pe dir Kaif?

Apre ki Zezi ti mor, son bann zapot ti ganny anmennen devan pli gran lakour bann Zwif. Gran Pret, Kaif, ti dir: “Pa nou’n defann zot strikteman koz ankor lo [Zezi]? La zot in fann  zot lansennyman dan Zerizalenm antye.” Akoz sa bann zapot pa ti obeir sa ki lakour ti’n dir zot?— Pyer ki ti pe koz pour tou lezot zapot, ti reponn Kaif: “Nou devre obei Bondye plito ki zonm.”Akt 5:27-29.

Sa letan, bann sef larelizyon Zwif ti annan bokou pouvwar. Me selman gouvernman Romen ki ti diriz zot pei. Sef sa gouvernman ti apel Sezar. Kantmenm bann Zwif pa ti oule Sezar diriz zot, son gouvernman ti fer bokou bon keksoz pour zot. Bann gouvernman konmela osi i fer bann bon keksoz pour zot dimoun. Ou konn serten bon keksoz ki zot fer?—

Bann gouvernman i konstri semen pour transpor pase. Zot pey bann gard ek ponpye pour protez nou. Zot osi fourni ledikasyon pour bann manrmay e osi swen medikal pour bann ki oule. I kout en gouvernman bokou larzan pour fer sa bann keksoz. Ou konnen kote gouvernman i ganny larzan pour fer sa?— Avek bann dimoun menm. Bann dimoun i pey gouvernman en larzan ki apel taks.

 Ler sa Gran Ansennyan ti lo later, bokou Zwif pa ti oule pey taks gouvernman Romen. En zour bann pret ti fer detrwa zonm demann Zezi en kestyon pour fer li ganny problenm. Zot ti demann li, ‘Eski nou devret pey taks Sezar?’ Zot ti demann li sa pour trik li. Si Zezi ti dir, ‘Wi, zot devret pey taks,’ bokou Zwif pa ti pou kontan. Me Zezi pa ti kapab dir, ‘Non, zot pa devret pey taks.’ I ti pou mal pour dir sa.

Alors ki Zezi ti fer? I ti dir: ‘Montre mwan en larzan.’ Zot ti montre li enn e Zezi ti demann zot: “Figir ek non lekel ki lo la?” Sa bann zonm ti dir li: “Sezar!” Alors Zezi ti dir: “Alor, rann Sezar sa ki pour Sezar, e Bondye sa ki pour Bondye!”Lik 20:19-26.

Ki mannyer Zezi ti reponn kestyon sa bann zonm?

Zot pa ti trouv okenn keksoz mal avek sa larepons. Sezar ti fer bann bon keksoz pour zot. Alor i ti normal pour zot servi sa larzan ki Sezar ti’n fer pour pey li pour bann keksoz ki i ti pe fer pour zot. Dan sa fason, Zezi ti montre ki i byen pour pey gouvernman taks pour sa bann keksoz ki nou gannyen.

 Ou ou ankor tro pti pour pey taks. Me i annan en lot keksoz ki ou devret fer pour gouvernman. Ou konnen kwa?— Obeir bann lalwa gouvernman. Labib i dir: ‘Obeir bann lotorite ki gouvernen.’ Sa bann lotorite i bann ki annan pouvwar dan gouvernman. Bondye ki pe demann nou pour obeir bann lalwa gouvernman.Romen 13:1, 2.

I kapab annan en lalwa ki dir pa zet papye oubyen lezot keksoz lo semen. Eski ou devret obeir sa lalwa?— Wi, Bondye i oule ou obeir sa lalwa. Eski ou devret obeir bann gard tou?— Gouvernman ki pey bann gard pour protez bann dimoun. Ler nou obeir bann gard i konmsi nou pe obeir gouvernman menm.

Alors, si ou pe al koup semen e en gard i dir “Ekout en kou!” Ki ou devret fer?— Si lezot dimoun i kontinyen koup semen, eski ou devret fer parey?— Ou devret espere. Pa fer nanryen kantmenm zis ou tousel ki espere. Bondye i dir ou obeir.

Petet i’n ariv en problenm pros kot ou reste e gard pe dir avek dimoun: “Reste se zot. Pa vin lo semen.” Me petet ou tann en ta tapaz e ou anvi konnen ki pe arive. Eski ou devret sorti pour al gete?— Si ou fer sa, eski ou pe obeir “bann lotorite ki gouvernen”?—

Dan bokou pei, gouvernman ki fer konstri lekol, e pey bann ansennyan. Alors ou krwar Bondye i anvi ou obeir mis lekol?— Reflesir. Gouvernman ki pey bann ansennyan pour ansenny zanfan, zis parey i pey bann gard pour protez bann dimoun. Alors ler nou obeir en gard oubyen en mis lekol i konmsi nou pe obeir gouvernman.

Akoz nou devret obeir en gard?

 Be si en mis i dir ou devret ador en stati oubyen en zimaz, ki ou pou fer?— Sa trwa Ebre pa ti tonm azenou devan sa stati kantmenm Lerwa Neboukadnetsar ti dir zot fer li. Ou rapel akoz zot pa ti fer sa?— Akoz zot pa ti anvi dezobei Bondye.

En istoryen (Will Durant) ti ekrir konsernan bann premye Kretyen e dir ki zot ‘fidelite pa al premyerman pour Sezar.’ I al premyerman pour Zeova! Alors pa bliye ki Bondye i devret vin premye dan nou lavi.

Nou obeir gouvernman akoz Bondye i anvi nou fer li. Be ki nou pou dir si zot demann nou pour fer en keksoz ki Bondye i dir nou pa devret fer?— Nou devret dir sa ki bann zapot ti dir gran pret: “Nou devre obei Bondye plito ki zonm.”Akt 5:29.

Labib ki ansenny nou pour annan respe pour lalwa. Lir dan Matye 5:41; Tit 3:1; ek 1 Pyer 2:12-14.