Skip to content

Al lo konteni

 SAPIT 8

Bann ki pli o ki nou

Bann ki pli o ki nou

M ON krwar ou konnen i annan lezot ki pli o, pli enportan, e pli for ki ou ek mwan. Par egzanp lekel?— Zeova. Be son Garson, sa Gran Ansennyan? Eski i pli o ki nou?—Be wi.

Zezi ti reste dan lesyel avek Bondye. I ti en lespri oubyen en lanz. Eski Bondye ti fer lezot lanz oubyen lezot lespri?— Wi, i ti fer plizyer milyon zot. Sa bann lanz i pli o e pli for ki nou.Psonm 104:4; Danyel 7:10.

Eski ou konn non sa lanz ki ti koz avek Mari?— I ti apel Gabriyel. I ti dir Mari ki son pti baba pou vin Garson Bondye. Bondye ti met lavi son Garson dan vant Mari pour li ne konman en pti baba lo later.Lik 1:26, 27.

Ki Mari ek Zozef ti dir Zezi?

Ou krwar sa mirak ti vreman arive ou? Ou krwar Zezi ti reste dan lesyel avek Bondye?— Sanmenm ki Zezi ti dir. Ki mannyer Zezi ti konn sa bann keksoz? Petet ler i ti ankor ptipti, Mari ti dir li sa ki lanz Gabriyel ti’n dir. Petet osi Zozef ti dir Zezi son vre Papa i Bondye.

Zour Zezi ti batize, Bondye ti menm koze dan lesyel e dir: “Sa mon Garson.” (Matye 3:17) E sa zour swar avan i ti mor, Zezi ti priye: “Papa, glorifye mwan dan ou prezans avek sa menm laglwar ki mon ti annan avek ou avan  kreasyon lemonn.” (Zan 17:5) Zezi ti pe demann Bondye pour li retourn ankor kot Li dan lesyel. Ki mannyer i ti pou kapab reviv dan lesyel?— Si Zeova ti refer li vin en lespri envizib oubyen en lanz ankor.

Aprezan, les mwan demann ou en kestyon enportan. Eski tou bann lanz i bon? Ki ou dir?— En serten letan, zot tou zot ti bon. Akoz Zeova ki ti’n kree zot e tou sa ki i fer i bon. Me apre enn sa bann lanz ti vin move. Ki mannyer sa ti arive?

Pour reponn sa kestyon, nou bezwen retourn sa letan kot Bondye ti fer premye zonm ek premye fanm, Adan ek Ev. I annan dimoun ki dir sa i zis en zistwar pour bat nou latet. Me sa Gran Ansennyan ti konnen ki sa i vre.

Kan Bondye ti fer Adan ek Ev, i ti met zot dan en zoli zarden dan en landrwa ki ti apel Edenn. I ti en paradi. Zot ti kapab annan bokou zanfan, en gran fanmiy, e viv pour touzour dan Paradi. Me zot ti bezwen aprann en leson enportan. Sa i en leson ki nou’n deza koz lo la. Annou gete si nou rapel.

Ki mannyer Adan ek Ev ti’n kapab viv pour touzour dan Paradi?

 Zeova ti dir Adan ek Ev zot kapab manz tou fri ki zot ti oule dan sa zarden. Me ti annan en pye fri ki zot pa ti kapab manz son fri. Bondye ti’n dir zot ki pou arive si zot manz sa fri. I ti dir: “Sirman ou pou mor.” (Zenez 2:17) Alor, ki sa leson ki Adan ek Ev ti bezwen aprann?—

Sa leson i lobeisans. Wi, nou lavi i depan lo obeir Bondye! Adan ek Ev ti bezwen fer sa ki Bondye ti demann zot, pa zis dir zot pou fer. Si zot ti obeir Bondye, zot ti pou montre ki zot kontan li e zot anvi i diriz zot. Apre zot ti pou kapab viv pour touzour dan Paradi. Me si zot ti manz sa fri, ki sa ti pou montre?—

Sa ti pou montre ki zot pa vreman apresye sa ki Bondye ti’n donn zot. Si ou ti dan zot plas, eski ou ti pou’n obeir Zeova?— Okonmansman, Adan ek Ev ti obeir. Me apre enn ki ti pli o ki zot ti anbet Ev. I ti fer li dezobei Zeova. Lekel li?—

Lekel ki ti fer sa serpan koz avek Ev?

 Labib i dir ki en serpan ti koz avek Ev. Me parey ou konnen, en serpan pa kapab koze. Alors ki mannyer sa enn ti koze?— En lanz ki ti pe koze. Me i ti fer konmsi sa serpan ki pe koze. Sa lanz ti’n konmans mazin bann move keksoz. I ti anvi Adan ek Ev ador li. I ti anvi zot obeir li. Sa lanz ti anvi pran plas Bondye.

Alors sa move lanz ti met bann move lide dan lespri Ev. I ti fer konmsi sa serpan ki pe koze e dir: ‘Bondye pa’n dir ou laverite. Ou pa pou mor si ou manz sa fri. Ou pou konn tou parey Bondye.’ Ou ti pou’n krwar sa ou?—

Ev ti konmans anvi en keksoz ki Bondye pa ti’n donn li. I ti manz sa fri ki Bondye ti’n dir zot pa manze. Apre i ti donn en bout Adan. Adan pa ti krwar sa ki sa serpan ti’n dir. Me i ti pli kontan son madanm ki Bondye. Alor i ti manz sa fri li osi.Zenez 3:1-6; 1 Timote 2:14.

Ki ti arive apre?— Adan ek Ev ti vin enparfe, zot ti vin vye,  e mor. Akoz zot ti enparfe, zot zanfan osi ti vin enparfe, vye, e finalman mor. Bondye pa ti’n koz manti alors! Vre nou bezwen obeir li pour nou viv. (Romen 5:12) Labib i dir nou sa lanz ki ti koz manti avek Ev i apel Satan oubyen Dyab, e lezot lanz ki ti vin move i apel bann demon.Zak 2:19; Revelasyon 12:9.

Ki ti arive avek Adan ek Ev apre ki zot ti dezobei Bondye?

Be akoz sa bon lanz ki Bondye ti’n fer ti vin move?— Akoz i ti konmans mazin en bann move keksoz. I ti anvi premye plas. I ti konnen Bondye ti’n dir Adan ek Ev fer zanfan, e i ti anvi tou sa bann zanfan ador li. Dyab i anvi tou dimoun dezobei Zeova. Alor i pe sey met bann move lide dan nou lespri.Zak 1:13-15.

Dyab i dir napa personn ki vreman kontan Zeova. I dir ou ek mwan osi pa kontan Bondye e nou pa vreman anvi fer sa ki Bondye i demann nou. I dir nou obeir Zeova zis ler tou keksoz i al byen parey nou ti oule. Eski i vre sa? Nou koumsa nou?

Sa Gran Ansennyan i dir ki Dyab i en manter! Zezi ti montre ki i vreman kontan Zeova par obeir Li. E Zezi pa ti obeir Bondye zis ler ti fasil pour li. I ti obeir toultan, menm ler lezot dimoun ti fer li difisil pour li. I ti reste fidel avek Zeova ziska son lanmor. Sanmenm Bondye ti redonn li lavi pour viv pour touzour.

Alors, lekel nou pli gran lennmi?— Wi, i Satan. Nou kapab vwar li?—Be non! Selman nou konnen i egziste, i pli o e pli for ki nou. Be lekel ki pli o ki Satan?— Zeova. Alors nou konnen ki Bondye i kapab protez nou.

Lir lo sa Enn ki nou devret adore: Deterononm 30:19, 20; Zozye 24:14, 15; Proverb 27:11; ek Matye 4:10.