Skip to content

Al lo konteni

 LESON 4

I ti fer son papa ek Zeova kontan

I ti fer son papa ek Zeova kontan

Ki promes Yifta pe fer avek Zeova?

I pa ti fasil, me fiy Yifta ti fer sa ki son papa ti’n promet

Eski ou vwar sa pti fiy dan sa portre?— Son papa i apel Yifta. Labib pa dir nou ki mannyer sa pti fiy i apele, me nou konnen ki i ti fer son papa ek Zeova kontan. Annou koz lo li ek son papa Yifta.

Yifta ti en bon dimoun e i ti pran en kantite letan pour ansenny son fiy lo Zeova. I ti en zonm for e en bon sef tou. Alor, bann Izraelit ti demann li pour diriz zot dan zot lager avek zot lennmi.

Yifta ti priy Bondye pour ed zot bat zot lennmi. Yifta ti promet ki si zot ti bat zot lennmi, i ti pou donn Zeova sa premye dimoun ki ti pou sorti kot son lakour pour vin zwenn li ler  i retournen. Sa dimoun ti pou reste e travay tou son lavi kot tabernak Bondye. Tabernak ti en landrwa kot bann dimoun ti al ador Bondye sa letan. Anfet, Yifta ti bat zot lennmi! Eski ou konnen lekel ki ti sorti premye pour vin zwenn li ler i ti retourn kot li?—

Wi, fiy Yifta! Son fiy ti son sel zanfan e aprezan Yifta ti pou bezwen les li ale. Yifta ti vreman tris akoz sa. Me, pa oubliye, i ti’n fer en promes. Deswit, son fiy ti dir, ‘Dadi, ou’n fer en promes avek Zeova, ou bezwen gard ou promes.’

Sak lannen, bann zanmi fiy Yifta ti vizit li

Fiy Yifta osi ti tris. Laba kot tabernak i pa ti pou kapab ni marye, ni annan zanfan. Me i ti vreman anvi gard promes son papa e fer Zeova kontan. Sa ti pli enportan pour li, plito ki marye oubyen annan zanfan. Alor, i ti kit son lakour e al reste kot tabernak pour tou son lavi.

Eski sa ki i ti fer ti fer son papa ek Zeova kontan?— Wi, byensir! Si ou obeisan e ou kontan Zeova parey fiy Yifta, ou osi ou pou fer manmi, dadi ek Zeova kontan en kantite.

LIR DAN OU LABIB