Skip to content

Al lo konteni

 LESON 5

Samyel ti kontinyen fer sa ki byen

Samyel ti kontinyen fer sa ki byen

Depi ki Samyel ti ankor ptipti, i ti reste e travay kot tabernak. Tabernak ti en landrwa kot dimoun ti al ador Zeova. Eski ou konnen akoz Samyel ti al laba? Annou koz en pe lo Ana, manman Samyel.

Pour en kantite letan, Ana ti anvi en pti baba, me i pa ti kapab fer enn. Alor, i ti priy Zeova e sipliy li pour ed li. I ti promet ki si i ti ganny en pti garson, i ti pou anvoy li reste e travay kot tabernak. Zeova ti reponn son lapriyer e i ti ganny en pti garson. I ti apel li Samyel. Zis parey Ana ti’n promet, kan Samyel ti annan trwa-z-an oubyen kat-r-an, Ana ti anmenn li kot tabernak pour servi Bondye.

Eli ki ti gran pret kot tabernak. Sa de garson Eli osi ti travay laba. Pa oubliye, tabernak ti landrwa kot dimoun ti ador Bondye e bann dimoun ti devret fer bann bon keksoz laba. Malerezman, bann garson Eli ti pe fer bann move keksoz. Samyel ti vwar sa ki zot ti pe fer. Eski Samyel ti fer bann move keksoz parey bann garson Eli?— Non, i ti kontinyen fer sa ki byen zis parey i ti’n aprann avek son paran.

Ki ou krwar Eli ti’n devret fer avek son de garson?— I ti’n devret pini zot. I pa ti’n devret les zot travay kot lakaz Bondye ankor. Me, pa sa ki Eli ti fer, alor Zeova ti ankoler avek Eli ek son de garson. Zeova ti deside pini zot.

Samyel ti dir Eli sa ki Zeova ti’n dir

En zour swar ler Samyel ti pe dormi, i ti tann en dimoun kriy li: ‘Samyel!’ I ti tay kot Eli, me Eli ti dir li: ‘Mon pa’n kriy ou mwan.’ De fwa ankor sa ti arive. Apre trwazyenm fwa, Eli ti dir Samyel si i tann kriy li ankor i devret dir: ‘Silvouple Zeova, koze, mon pe ekoute.’ Alor sanmenm ki Samyel ti fer. Apre sa, Zeova ti dir Samyel: ‘Dir Eli ki mon pou pini son fanmir pour sa bann move keksoz ki zot in fer.’ Eski  ou krwar i ti fasil pour Samyel dir Eli sa?— Non, i pa ti fasil. Me, menm si Samyel ti per, i ti fer sa ki Zeova ti dir li. Sa ki Zeova ti dir ti arive. Sa de garson Eli ti ganny touye e Eli osi ti mor.

Samyel i en bon legzanp pour nou. I ti fer sa ki byen, menm si i ti vwar lezot dimoun pe fer sa ki mal. Be ou? Eski ou pou parey Samyel e kontinyen fer sa ki byen? Si wi, ou pou fer Zeova ek manmi ek dadi kontan.

LIR DAN OU LABIB

  • 1 Samyel 2:22-26; 3:1-21