Zonas 3:1-10
3 Apre, Zeova ti koz avek Zonas pour en dezyenm fwa e dir:
2 “Leve e al Niniv, sa gran lavil. Anons sa mesaz ki mon pou dir ou.”
3 Alor Zonas ti obei lord Zeova, i ti leve e al Niniv. Niniv ti sitan gran ki i ti pran apepre trwa zour apye* pour en dimoun travers sa lavil.*
4 Apre, Zonas ti antre dan sa lavil e i ti mars en lazournen antye. I ti pe anons sa mesaz: “Dan zis 40 zour, Niniv pou ganny detrir.”*
5 Ler zot ti tann sa, bann dimoun Niniv ti demontre lafwa dan Bondye. Tou dimoun, gran konman pti, ti deside pour zennen* e met latwal goni lo zot.
6 Ler lerwa Niniv ti tann mesaz Zonas, i ti leve lo son tronn e tir son lenz rwayal. I ti met en latwal goni e asiz dan lasann.*
7 Deplis, lerwa ti fer sa mesaz ganny anonse partou Niniv,“Par lord lerwa ek son bann zofisye: Napa okenn dimoun, zannimo oubyen troupo ki devret manz okenn keksoz. Zot pa devret ni manze ni bwar delo.
8 Tou dimoun i devret met latwal goni lo zot e lo zannimo. Zot devret sipliy Bondye, rezet zot move fason viv ek zot aksyon vyolan.
9 Lekel ki konnen si sa vre Bondye pa pou sanz son desizyon* e aret ankoler avek nou, pour ki nou pa mor?”
10 Ler sa vre Bondye ti vwar sa ki zot ti’n fer, ki mannyer zot ti’n rezet zot move fason viv, i ti sanz son desizyon* e i pa ti anmenn sa maler lo zot parey i ti’n dir.
Bann not
^ Literalman, “en zistans trwa zour apye.”
^ Literalman, “en gran lavil devan Bondye.”
^ Literalman, “ranverse.”
^ Vwar Leksplikasyon bann mo.
^ Sa ti montre ki en dimoun ti dan lapenn oubyen i ti repantir pour son pese.
^ Oubyen “regrete.”
^ Oubyen “regrete.”
