Zeremi 18:1-23
18 Zeova ti koz avek Zeremi e i ti dir:
2 “Leve e desann kot lakaz sa potye e mon pou koz avek ou laba.”
3 Alor mon ti desann kot lakaz sa potye e i ti pe fer en resipyan lo sa larou ki potye i servi.
4 Me sa resipyan ki i ti pe fer avek lazil pa ti vin byen. Alor sa potye ti servi sa larzil e fer en lot resipyan ki i ti anvi.*
5 Apre Zeova ti koz avek mwan e i ti dir:
6 “‘Pep Izrael, eski mon pa kapab fer parey sa ki sa potye in fer avek sa larzil, avek zot?’ La sa ki Zeova in dir. ‘Gete! Pep Izrael, zis parey larzil dan lanmen sa potye, koumsanmenm ki ou ete dan mon lanmen.
7 Nenport ler ki mon dir ki mon pou derasin en nasyon oubyen en rwayonm, kraz li e detri li
8 e sa nasyon i aret fer bann move keksoz ki i pe fer, sa bann keksoz ki mon ti dir li pa fer, mon pou osi sanz mon nide konsernan* sa maler ki mon ti’n deside pour anmenn lo li.
9 Me nenport ler ki mon dir mon pou konstri e plant en nasyon oubyen en rwayonm
10 e sa nasyon i fer sa ki mal dan mon lizye e i pa obei sa ki mon’n dir, mon pou sanz mon nide konsernan* sa bann bon keksoz ki mon ti’n deside pour fer pour li.’
11 “Aprezan, silvouple, dir bann zonm Zida ek bann zabitan Zerizalenm sa, ‘La sa ki Zeova i dir: “Mon pe prepar* en maler e mon pe fer en konplo kont zot. Silvouple, aret fer bann move keksoz ki zot pe fer e sanz zot fason fer ek zot bann aksyon.”’”
12 Me zot ti dir: “I pa fer sans! Parski nou pou fer sa ki nou nide i dir nou fer e nou tou nou pou kontinyen antete e swiv nou move leker.”
13 Alor la sa ki Zeova i dir:
“Silvouple, al demann bann nasyon ou menm.
Lekel ki’n deza tann en keksoz koumsa?
Vyerz Izrael in fer en keksoz ki vreman terib.
14 Eski lanez ki lo bann ros lo montanny Liban i fonn?
Oubyen, eski delo fre ki pe koule sorti byen lwen pou sek?
15 Me mon pep in oubliy mwan.
Parski zot ofer bann sakrifis* avek en keksoz ki pa vo nanryenE zot fer bann zonm tonbe lo zot semen, lo bann santye ki’n la depi lontan,Pour zot mars lo bann pti semen ki pa plat e ki pa menm nivo,*
16 Pour ki dimoun i soke ler zot vwar sa ki’n arive avek zot peiE soufle ler zot vwar sa pour touzour.
Tou dimoun ki pas o bor li pou soke e sekwe zot latet.
17 Mon pou dispers zot devan lennmi parey divan ki sorti dan les.
Mon pou vir mon ledo avek zot, pa mon figir, zour ki zot dan maler.”
18 Zot ti dir: “Vini e annou fer en konplo kont Zeremi, parski bann pret pou toultan annan lalwa,* bann zonm saz pou toultan donn konsey e bann profet pou toultan annan parol Bondye. Vini, annou koz an mal lo li* e pa bezwen ekout sa ki i dir.”
19 O Zeova, ekout mwanE ekout sa ki mon bann lennmi pe dir.
20 Eski en dimoun ki’n fer sa ki byen i devret ganny rekonpanse avek sa ki mal?
Parski zot in fouy en trou pour touy mwan.
Rapel ki mannyer mon ti debout devan ou e dir bann bon keksoz lo zot,Pour fer ou aret ankoler avek zot.
21 Alor les zot bann garson mor akoz lafanminE les zot ganny touye avek lepe.
Ki zot bann madanm i perdi zot bann zanfan e vin bann vev.
Ki zot bann zonm i mor akoz bann maladi,Ki zot bann garson i ganny touye avek lepe dan lager.
22 Ki bann dimoun i kriye dan zot lakazLer ou fer bann bandi vin kot zot en sel kou.
Parski zot in fouy en trou pour atrap mwanE zot in met bann latrap pour mon lipye.
23 Me ou, O Zeova,Ou konn tre byen tou sa bann konplo ki zot pe fer pour touy mwan.
Pa bezwen kouver zot fotE pa bezwen efas zot pese devan ou.
Ki zot tonbe devan ouLer ou pran aksyon kont zot dan ou lakoler.
Bann not
^ Literalman, “ki ti bon pour en potye fer.”
^ Oubyen “regret.”
^ Oubyen “regret.”
^ Literalman, “fer.”
^ Oubyen “fer lafimen bann sakrifis monte.”
^ Oubyen “ki pa’n ganny aranze.”
^ Oubyen “lenstriksyon.”
^ Literalman, “tap li avek lalang.”
