Zob 38:1-41
38 Alor Zeova ti reponn Zob dan en tanpet divan:+
2 “Ki ou ete pour kestyonn mon desizyon?
E lekel ki pa konnen ki i pe dir?+
3 Silvouple, met ou pare e azir parey en zonm.
Mon pou demann ou kestyon e ou pou reponn mwan.
4 Kot ou ti ete ler mon ti poz fondasyon later?+
Dir mwan si ou krwar ou konnen.
5 Si ou konnen, dir mwan lekel ki ti deside ki groser later pou ete
Oubyen lekel ki ti tir laliny pour mezir li?
6 Dan kwa son pilye ti ganny anfonse
E lekel ki ti met ros kwen son fondasyon,+
7 Ler bann zetwal bomaten+ ti kriy ansanm dan lazwa
E ler tou bann garson Bondye*+ ti konmans kriye dan lazwa?
8 Lekel ki ti barikad lanmer avek bann laport+
Ler i ti sorti en sel kou dan vant son manman
9 Ler mon ti abiy lanmer avek nyaz
E anvlop li dan fernwanr?
10 Lekel ki ti met en limit pour li
E met son bann bar ek laport+
11 Ler mon ti dir, ‘Ou kapab vin ziska la me pa pli lwen ki sa,
Lanmenm la kot ou bann gro laroul* pou arete’?+
12 Eski ou’n deza donn lord pour ki lizour i fer
Oubyen dir kote granmaten pou fer,+
13 Pour tyonbo sa kat kwen later
E sekwe bann move dimoun?+
14 Later i ganny transformen parey larzil i ganny grave avek en sele
E son bann detay i aparet parey bann ki lo en lenz.*
15 Me bann move dimoun pa ganny lalimyer
E zot lebra ki ti’n lev anler in ganny kase.
16 Eski ou’n deza desann kot bann sours delo dan lanmer
Oubyen eski ou’n deza al get dan fon lanmer?+
17 Eski en dimoun in deza montre ou bann baro lanmor+
Oubyen eski ou’n deza vwar bann baro fernwanr?*+
18 Eski ou kapab konpran ki groser later i ete?+
Dir mwan si ou konn tousala.
19 Kote lalimyer i reste+
E kote fernwanr i reste
20 Pour ki ou anmenn li dan son teritwar?
Eski ou konn semen ki al kot son lakaz?
21 Eski ou konn sa akoz ou ti deza egziste
E ou’n viv en kantite letan?*
22 Eski ou’n deza antre dan bann stor lanez+
Oubyen eski ou’n deza vwar bann stor lagrel+
23 Ki mon’n anmase pour letan ladetres
Pour zour batay ek lager?+
24 Kote lalimyer* i sorti pour li klere
E kote divan les i sorti pour li soufle lo later?+
25 Lekel ki’n fouy rigol pour ki gro lapli i tonbe
E fer semen pour tanpet avek son nyaz ek loraz,+
26 Pour fer lapli tonbe kot personn pa reste
Dan dezer kot napa dimoun,+
27 Pour aroz later dan bann landrwa dezerte
Pour fer zerb pouse?+
28 Eski lapli i annan en papa+
Oubyen lekel papa laroze?+
29 Eski ays i annan en manman?
Lekel ki’n donn nesans lanez ki sorti dan lesyel?+
30 Lekel ki fer sirfas delo vin dir parey ros
E sirfas delo profon vin ays?+
31 Eski ou kapab anmar lakord group zetwal Kima*
Oubyen delarg lakord group zetwal Kesil?*+
32 Eski ou kapab fer aparet en group zetwal* dan son letan apropriye
Oubyen gid bann zetwal As* avek son bann garson?
33 Eski ou konn bann lalwa ki diriz lesyel+
Oubyen eski ou kapab enpoz sa* bann lalwa lo later?
34 Eski ou kapab donn lord nyaz
Pour ki gro lapli i tonbe ziska ki i kouver ou?+
35 Eski ou kapab anvoy zekler?
Eski zot pou vini e dir ou, ‘La nou la!’?
36 Lekel ki’n donn bann nyaz* lasazes+
Oubyen lekel ki’n donn bann fenomenn dan lesyel lentelizans?*+
37 Lekel ki ase saz pour kont bann nyaz
Oubyen lekel ki kapab devid bann resipyan delo ki dan lesyel?+
38 Lekel ki fer lapousyer vin en kantite labou
E later kol ansanm?
39 Eski ou kapab al lasas dan plas en lyon
Oubyen satisfer lapeti bann zenn lyon+
40 Ler zot pe kasyet
Oubyen tranpe dan zot trou?
41 Lekel ki prepar manze pour korbo+
Ler son piti i kriy Bondye osekour
E ler zot pe ale vini akoz napa nanryen pour manze?
Bann not
^ En lekspresyon Ebre ki refer avek bann lanz.
^ Oubyen “laroul orgeye.”
^ Aparaman, sa pe refer avek lalimyer dan bomaten ki kler lo later.
^ Oubyen “lonbraz lanmor.”
^ Literalman, “zour.”
^ Oubyen posibleman, “zekler.”
^ Posibleman, bann zetwal ki apel Pleiades dan sa group zetwal Taurus.
^ Posibleman, sa group zetwal ki apel Orion.
^ Posibleman, sa group zetwal ki apel Gran Lours (Ursa Major).
^ Oubyen posibleman, “Son.”
^ Oubyen posibleman, “imen.”
^ Oubyen posibleman, “lespri imen.”
