Zenez 6:1-22
6 Ler lakantite dimoun ti konmans ogmante lo later e zot ti ganny bann fiy,
2 bann garson sa vre Bondye*+ ti konmans remarke ki sa bann fiy ti zoli. Alor zot ti konmans pran tou sa bann ki zot ti swazir konman zot madanm.
3 Apre, Zeova ti dir: “Mon* pa pou toler bann imen pour touzour,+ parski zot fer pese.* Alor mon pou les zot viv ankor 120 an.”+
4 Dan sa lepok e menm apre, i ti annan bann Nefilim* lo later. Pandan sa letan, bann garson sa vre Bondye ti kontinyen annan relasyon seksyel avek bann fiy e zot ti ganny bann garson. Sa bann zonm ti for e popiler sa letan.
5 Alor Zeova ti vwar ki bann dimoun ti pe fer en kantite move keksoz lo later e ki zot ti toultan annan bann move tandans ek panse.*+
6 Zeova ti regrete* ki i ti’n fer bann dimoun lo later e sa ti fer son leker fermal.*+
7 Alor Zeova ti dir: “Mon pou detrir bann dimoun ki mon’n kree lo later. Mon pou detrir dimoun ek zannimo domestik, reptil* ek zannimo ki anvole dan lesyel, parski mon regrete ki mon’n fer zot.”
8 Me Noe ti ganny laprouvasyon Zeova.
9 Sa i listwar Noe.
Noe ti en zonm ki ti fer sa ki byen.+ I ti en dimoun san defo* parmi bann dimoun ki ti viv dan sa lepok.* Noe ti mars* avek sa vre Bondye.+
10 Avek letan, Noe ti ganny trwa garson, Senm, Kam ek Zafet.+
11 Me pour sa vre Bondye, later ti’n fini gate e i ti ranpli avek vyolans.
12 Wi, ler Bondye ti get later, i ti vwar ki i ti’n gate+ e tou dimoun* lo later ti annan en move lavi.+
13 Apre sa, Bondye ti dir Noe: “Mon’n deside pour detrir tou dimoun parski later i ranpli avek bann dimoun vyolan. Alor mon pou detrir zot ansanm avek tou sa ki lo later.+
14 Fer en lars* avek bon dibwa.*+ Ou pou fer plizyer konpartiman dan sa lars e apre kouver li avek koltar*+ anndan deor.
15 Ou devret fer lars koumsa: I devret 300 koude* longer, 50 koude larzer ek 30 koude oter.
16 Ou pou fer en lafnet* en koude depi anler pour ganny lalimyer dan lars. Ou devret fer en larantre dan kote lars.+ I devret annan en premye letaz,* en dezyenm letaz ek en trwazyenm letaz.
17 “Me mwan, mon pou anmenn en deliz*+ lo later pour detrir tou sa ki vivan* anba lesyel. Tou sa ki lo later pou mor.+
18 Mon pe fer mon lalyans* avek ou. Ou devret antre dan lars, ou, ou bann garson, ou madanm ek madanm ou bann garson.+
19 Fer antre dan lars de dan sak kalite zannimo,+ en mal ek en femel+ pour ki zot reste vivan ansanm avek ou.
20 Fer antre bann zannimo ki anvole, sakenn dapre son kalite, zannimo domestik, sakenn dapre son kalite e tou reptil* lo later, sakenn dapre son kalite. De dan sak kalite zannimo pou vin kot ou e antre dan lars pour ki zot reste vivan.+
21 Me ou, ou devret anmas e anmenn avek ou tou sort kalite manze+ pour ou e pour bann zannimo.”
22 Noe ti fer tou sa ki Bondye ti demann li pour fer. I ti fer egzakteman sanmenm.+
Bann not
^ En lekspresyon Ebre ki refer avek bann lanz.
^ Literalman, “Mon lespri.” Vwar Leksplikasyon bann mo.
^ Literalman, “laser.” Setadir, zot azir dapre zot lekor enparfe.
^ Oubyen “zean.” Posibleman, sa pe refer avek bann dimoun vyolan ki fer lezot tonm ater. Vwar Leksplikasyon bann mo.
^ Oubyen “panse dan zot leker.”
^ Oubyen “tris.”
^ Oubyen “sagren.”
^ Oubyen “bann zannimo ki ranpe.” Aparaman, sa pe refer avek lezar, serpan, zensek ek lezot pti zannimo.
^ Oubyen “san okenn repros.”
^ Literalman, “son zenerasyon.”
^ Setadir, i ti viv son lavi an armoni avek lavolonte Bondye.
^ Literalman, “laser.”
^ Literalman, “en kof.” En gro bato.
^ Sa pe refer avek en kalite pye sapen.
^ Oubyen “goudron.” Pitch an Angle.
^ Lars ti apepre 134 met longer, 22 met larzer, 13 met oter. En koude i 44.5 santimet. Vwar Lezot lenformasyon B14.
^ Ebre, tso′har. En lot posibilite i kapab ki Tso′har pe refer avek twa lars ki ti kapab annan en pti lapant olye ki en louvertir pour lalimyer.
^ Premye letaz pe refer avek sa bout anba dan lars.
^ Literalman, “tou laser ki annan souf lavi.”
^ Oubyen “gro lapli.”
^ Vwar Leksplikasyon bann mo.
^ Oubyen “bann zannimo ki ranpe.” Aparaman, sa pe refer avek lezar, serpan, zensek ek lezot pti zannimo.
