Zenez 15:1-21
15 Apre sa, Zeova ti koz avek Abram dan en vizyon e dir: “Pa bezwen per+ Abram. Mon en boukliye pour ou.+ Ou pou ganny en gran rekonpans.”+
2 Abram ti dir: “Souvren Senyer Zeova, ki ou pou donn mwan? Parski mon napa zanfan e Eliezer+ en zonm sorti Damas ki pou erit tou sa ki mon annan.”
3 Abram ti osi dir: “Ou pa’n donn mwan okenn desandans+ e enn mon serviter* ki pou vin mon zeritye.”
4 Me Zeova ti dir li, “Pa sa zonm ki pou vin ou zeritye me ou prop garson* ki pou vin ou zeritye.”+
5 Apre, Bondye ti anmenn li deor e dir: “Silvouple, get anler dan lesyel e kont bann zetwal si ou kapab.” Apre i ti dir li: “Koumsanmenm ou desandans pou vini.”+
6 Abram ti annan lafwa dan* Zeova+ e pour sa rezon, Bondye ti konsider* li konman en dimoun ki fer sa ki byen.*+
7 Apre i ti dir: “Mwan mon Zeova, ki’n fer ou kit lavil Our bann Kaldeen pour donn ou sa pei e i pou vin pour ou.”+
8 Abram ti dir: “Souvren Senyer Zeova, ki mannyer mon pou konnen ki sa pei pou vin pour mwan?”
9 Bondye ti reponn li: “Pran en bef* trwa-z-an, en femel kabri trwa-z-an, en mal mouton trwa-z-an, en tourtrel ek en zenn pizon.”
10 Alor Abram ti pran tou sa bann zannimo e koup zot an de. I ti met sak bout o bor kanmarad,* me i pa ti koup bann zwazo.
11 Apre, bann zwazo* ti esey vin manz sa bann zannimo me Abram ti kontinyen pous zot.
12 Ler soley ti pe al kouse, Abram ti tonm dan en profon sonmey e en fernwanr ki fer per ti vin lo li.
13 Apre, Bondye ti dir Abram: “Ou kapab asire ki ou desandans pou vin bann etranze dan en pei ki pa pour zot e sa pep laba pou fer zot vin lesklav e fer zot pas martir* pour 400 an.+
14 Me mon pou ziz sa nasyon ki pou fer zot vin lesklav+ e apre sa, zot pou al avek en kantite keksoz.+
15 Me ou, ou pou mor anpe ler ou pou ariv en bon laz+ e ou pou ganny antere avek ou bann zanset.
16 Me ou desandans pou retourn isi+ dan katriyenm zenerasyon, parski sa letan pour bann Amorit ganny pini pa ankor arive.”+
17 Ler soley ti’n fini kouse e fernwanr ti’n fini fer, en four* ki ti pe fer lafimen ti aparet e en flanbo ti pas ant bann morso zannimo.
18 Sa zour, Zeova ti fer en lalyans+ avek Abram. I ti dir: “Mon pou donn ou desandans sa pei,+ depi larivyer Lezip ziska sa gran larivyer, setadir Larivyer Efrat:+
19 pei bann Kenit,+ Kenizit, Kadmonit,
20 Itit,+ Perizit,+ Refaim,+
21 Amorit, Kananeen, Girgasit ek Zebouzit.”+
Bann not
^ Literalman, “garson.”
^ Literalman, “enn ki sorti dan ou.”
^ Oubyen “Abram ti krwar.”
^ Oubyen “rekonnet.”
^ Oubyen “konman en dimoun drwat.”
^ Oubyen “en zenn vas.” En femel ki pa ankor ganny piti.
^ Oubyen “met sak bout an fas pour ki i al avek kanmarad.”
^ Oubyen “zwazo rapas.”
^ Oubyen “maltret zot.”
^ Vwar Leksplikasyon bann mo.
