Let Zak 1:1-27
1 Delapar Zak,+ en lesklav Bondye ek Senyer Zezi Kri, pour sa 12 tribi ki’n eparpiye partou:
Bonzour!
2 Mon bann frer, zot devret vreman zwaye* ler zot fer fas avek diferan problenm,+
3 parski parey zot konnen, ler zot lafwa in ganny teste, sa i fer zot devlop landirans.+
4 Me kontinyen andire parski sa pou form zot konpletman,* zot pou san defo dan tou laspe e zot pa pou mank nanryen.+
5 Alor, si enn parmi zot i mank lasazes, i devret kontinyen demann Bondye+ e i pou gannyen,+ parski Bondye i donn tou dimoun avek zenerozite san fer okenn repros.+
6 Me i devret kontinyen demann Bondye avek lafwa,+ i pa devret annan okenn dout+ parski sa enn ki annan dout i parey laroul dan lanmer ki divan i pous dan tou sort direksyon.
7 Anfet, sa dimoun pa devret ekspekte ganny nanryen avek Zeova,*
8 akoz i pa asire ki i pou fer+ e i pa stab dan tou sa ki i fer.
9 En frer ki pov i devret dan lazwa* akoz Bondye in onor li.+
10 En dimoun ris i devret dan lazwa akoz i’n abes son lekor,+ parski dimoun ris pou disparet parey en fler dan lakanpanny.
11 Parski zis parey soley i leve, gro lasaler i fer en plant sek, son fler i tonm ater e i perdi son labote, pareyman dimoun ris pou disparet letan i pe tay deryer larises.+
12 En dimoun ki kontinyen andir bann problenm i ere,+ parski ler i ganny aprouve par Bondye, i pou resevwar kouronn lavi+ ki Zeova* in promet bann ki kontinyen kontan Li.+
13 Personn pa devret dir ler i pas dan problenm: “Bondye ki pe teste mwan.” Parski Bondye pa kapab ganny teste par sa ki mal e li menm i pa teste personn par sa ki mal.
14 Me en dimoun i ganny teste ler i ganny atire e anbete* par son prop dezir.+
15 Apre sa, ler sa dezir i vin pli for, i fer sa dimoun fer pese* e ler i’n fini fer pese, sa i anmenn lanmor.+
16 Mon bann frer ki mon kontan, pa les zot ganny anbete.
17 Tou don ki bon e tou kado parfe i sorti kot Bondye,+ Papa bann lalimyer dan lesyel,+ ki pa sanze parey bann lonbraz ki sanz pozisyon.+
18 I ti son lavolonte ki nou vin an egzistans gras a son parol laverite,+ pour ki dan en sans, nou vin bann premye fri ki’n ganny swazir parmi bann ki Bondye in kree.+
19 Mon bann frer ki mon kontan, gard sa antet: En dimoun i devret pare pour ekoute,* me i devret pran letan avan koze+ e avan pran lakoler.+
20 Parski ler en dimoun i pran lakoler, i pa azir an armoni avek ladrwatir Bondye.+
21 Alor, rezet tou sa ki sal e tou tras sa ki mal.*+ Avek limilite,* aksepte ki parol Bondye ki kapab sov zot* i ganny plante dan zot.
22 Par kont, pa zis ekout parol Bondye me met li an pratik osi,+ pa anbet zot lekor avek bann fo rezonnman.
23 Parski si en dimoun i ekout parol Bondye e i pa met li an pratik,+ i parey en dimoun ki get son figir dan en laglas.
24 Parski i get son lekor dan laglas, i ale e deswit i oubliy ki kalite dimoun i ete.
25 Me en dimoun ki egzamin o profon lalwa parfe+ ki anmenn ver laliberte e ki kontinyen fer sa, pa pou vin en dimoun ki oubliye apre ki i’n ekoute, me i pou vin en dimoun ki met li an pratik e i pou ere dan tou sa ki i fer.+
26 Si en dimoun i panse ki i pe ador Bondye* me i pa seryezman kontrol son labous,*+ i pe anbet son lekor e son ladorasyon i initil.
27 Sa kalite ladorasyon* ki pir e san defo dapre pwennvi nou Bondye ek Papa i: pran swen avek bann orfelen+ ek bann vev+ dan zot difikilte+ e kontinyen reste san okenn tas dan sa lemonn.+
Bann not
^ Oubyen “konsider li konman en lazwa.”
^ Oubyen “Me landirans i devret konplet son travay dan zot.”
^ Vwar Lezot lenformasyon A5.
^ Literalman, “fyer.”
^ Vwar Lezot lenformasyon A5.
^ Oubyen “atrape avek en labwet.”
^ Literalman, “ler sa dezir in ganny formen, i donn nesans pese.”
^ Oubyen “vit pour ekoute.”
^ Literalman, “zot nanm.”
^ Oubyen “ladouser.”
^ Oubyen posibleman, “e en kantite keksoz mal.”
^ Oubyen “ki i relizye.”
^ Oubyen “met en labrid avek son lalang.” Vwar Leksplikasyon bann mo.
^ Oubyen “Sa larelizyon.”
