Premye let Pyer 5:1-14
5 Mwan, mon en ansyen parey zot, mon’n vwar soufrans Kris e mon pou osi ganny laglwar ki pou ganny revele.+ Alor, la sa ki mon demann* bann ansyen parmi zot:
2 Konman bann berze, pran swen avek troupo Bondye+ ki anba zot responsabilite e vey byen lo li.* Fer sa volonterman devan Bondye,+ pa akoz zot ganny forse. Fer li avek devouman, pa akoz zot rod zot prop lavantaz.*+
3 Pa domin lo sa bann ki Bondye in konfye zot,+ me vin en legzanp pour troupo.+
4 Ler sef berze+ pou ganny revele, zot pou ganny kouronn laglwar ki pa zanmen gate.+
5 Dan menm fason, zot bann garson, soumet avek bann zonm aze.*+ Me zot tou, demontre limilite* anver kanmarad parski Bondye i opoz bann ki arogan me i demontre son labonte ekstraordiner anver bann ki annan limilite.+
6 Alor, abes zot devan sa Bondye pwisan* pour ki i onor zot ler son letan i arive+
7 e larg tou zot traka* lo li+ akoz i enterese avek zot.*+
8 Kontinyen rezonn byen e kontinyen veye!+ Zot lennmi Dyab pe ale vini parey en lyon ki pe kriye pe rode lekel i pou devore.*+
9 Me zot devret reziste li+ e reste solid dan lafwa, parski zot konnen ki tou bann frer* dan lemonn pe pas atraver menm soufrans.+
10 Me apre ki zot in soufer pour en pe letan, Bondye ki demontre tou labonte ekstraordiner, ki’n swazir zot ki ini avek Kris pour ganny laglwar eternel,+ pou fini zot formasyon li menm. I pou fer zot ferm,+ i pou fer zot for+ e i pou met zot lo en fondasyon solid.
11 Pwisans i pour li pour touzour. Amenn.
12 Silven*+ ki mon konsider konman en frer fidel in ed mwan pour ekri zot sa detrwa mo pour ankouraz zot e asir zot ki sa i sa vre labonte ekstraordiner Bondye. Reste ferm ladan.
13 Sa madanm ki Babilonn ki’n ganny swazir parey zot, i fer zot salanm ensi ki Mark+ mon garson.
14 Dir bonzour kanmarad par anbras kanmarad avek lanmour.
Ki lape i avek zot tou ki ini avek Kris.
Bann not
^ Oubyen “konsey.”
^ Oubyen “servi konman bann sirveyan.”
^ Oubyen “profi malonnet.”
^ Oubyen “ansyen.”
^ Oubyen “abiy zot avek limilite.”
^ Literalman, “anba lanmen pwisan Bondye.”
^ Oubyen “lenkyetid.”
^ Oubyen “i pran traka pour zot.”
^ Oubyen “pe esey devor en dimoun.”
^ Oubyen “lasosyasyon tou bann frer.”
^ En lot non pour Silas.
