Romen 5:1-21

  • Gras a Kris nou’n rekonsilye avek Bondye (1-11)

  • Lanmor atraver Adan, lavi gras a Kris (12-21)

    • Tou dimoun i fer pese e mor (12)

    • En bon aksyon i fer tou dimoun ganny aprouve (18)

5  Alor, la ki nou’n ganny aprouve konman drwat akoz nou lafwa, annou anpe* avek Bondye gras a nou Senyer Zezi Kri.  Par Zezi e gras a nou lafwa dan li, i posib pour nou osi annan en relasyon avek Bondye ki demontre son labonte ekstraordiner anver nou la konmela. Alor annou zwaye* akoz nou annan lespwar pour ganny laglwar Bondye.  Pa zis sa, me annou zwaye* ler nou pe pas dan leprev, vi ki nou konnen ki leprev i ed nou devlop landirans,  landirans li i ed nou ganny aprouve konman drwat, aprezan sa i fer nou annan lespwar  e sa lespwar pa pou dezapwent nou, parski lanmour Bondye in ranpli nou leker gras a lespri sen ki nou’n gannyen.  Parski vreman, dan son letan fikse, Kris ti mor pour bann move dimoun ler nou ti ankor dan pese.*  Parski i pa fasil pour en dimoun aksepte mor pour en dimoun drwat, me kekfwa i pou aksepte mor pour en bon dimoun.  Bondye in demontre son lanmour pour nou dan sa fason: Kris in mor pour nou ler nou ti ankor dan pese.  Vi ki nou’n ganny aprouve konman drwat gras a disan Kris, alor nou annan plis rezon ankor pour asire ki nou pou sap lakoler Bondye gras a Kris. 10  Parski si ler nou ti lennmi Bondye, nou ti rekonsilye avek li gras a lanmor son Garson, alor nou annan plis rezon ankor pour asire ki nou pou ganny sove gras a Kris la ki nou’n rekonsilye avek li. 11  Pa zis sa, me nou osi zwaye akoz Bondye e gras a nou Senyer Zezi Kri ki’n fer nou rekonsilye avek Bondye. 12  Pour sa rezon, zis parey atraver en sel zonm pese in antre dan lemonn e pese in anmenn lanmor, alor tou dimoun i mor parski tou dimoun in fer pese. . . . 13  Parski pese ti egziste dan lemonn avan Lalwa, me personn pa ganny akize pour fer pese ler napa lalwa. 14  Kantmenm sa, depi lepok Adan ziska lepok Moiz, lanmor in osi domin* lo sa bann ki ti fer pese menm si zot pa ti fer pese parey Adan ki ti parey sa enn ki ti pou vini. 15  Me kado Bondye pa parey pese Adan. En kantite dimoun in mor akoz pese en sel zonm. Me gras a labonte ekstraordiner* en sel zonm Zezi Kri, pa i annan plis rezon pour bokou dimoun benefisye avek kado* Bondye ek son labonte ekstraordiner! 16  Deplis, byenfe ki nou gannyen atraver kado* Bondye pa parey konsekans pese en sel zonm. Akoz en pese, tou dimoun ti ganny kondannen me gras a kado ki Bondye ti donnen akoz bokou pese, bokou dimoun in ganny aprouve konman drwat. 17  Si par pese en sel zonm, lanmor in dominen parey en lerwa akoz sa zonm, pa i annan plis rezon pour bann dimoun ki ganny labonte ekstraordiner Bondye e ki ganny aprouve konman drwat pour viv e dirize konman lerwa gras a Zezi Kri! 18  Alor, akoz en pese, tou sort dimoun ti ganny kondannen, pareyman, en bon aksyon* in fer tou sort dimoun ganny aprouve konman drwat e ganny lavi. 19  Parski zis parey atraver dezobeisans en sel zonm en kantite in fer pese, pareyman atraver lobeisans en sel zonm, en kantite pou vin drwat. 20  Bondye ti donn Lalwa pour fer dimoun realize ki zot ti fer bokou pese. Me ler dimoun ti fer bokou pese, Bondye ti demontre plis labonte ekstraordiner ankor. 21  Pour ki rezon? Pour ki zis parey pese ek lanmor in dominen,* pareyman labonte ekstraordiner* Bondye i dominen* pour ki dimoun i ganny aprouve konman drwat e ganny lavi eternel gras a Zezi Kri nou Senyer.

Bann not

Oubyen posibleman, “nou annan lape.”
Oubyen posibleman, “nou zwaye.”
Oubyen posibleman, “nou zwaye.”
Literalman, “ler nou ti feb.”
Oubyen “domin parey en lerwa.”
Vwar Leksplikasyon bann mo.
Oubyen “kado gratwit.”
Oubyen “kado gratwit.”
Oubyen “en aksyon drwat.” Setadir, en aksyon ki fer dimoun ganny aprouve konman drwat par Bondye.
Oubyen “domin parey en lerwa.”
Vwar Leksplikasyon bann mo.
Oubyen “domin parey en lerwa.”