Romen 4:1-25

  • Abraam i ganny konsidere konman drwat akoz son lafwa (1-12)

    • Abraam, papa tou bann ki annan lafwa (11)

  • Promes akoz i ti annan lafwa (13-25)

4  Dan sa ka, ki Abraam nou zanset ti gannyen?  Par egzanp, si Abraam ti ganny aprouve konman drwat akoz sa ki i ti fer, i ti pou annan rezon pour li fyer, me pa devan Bondye.  Parski ki lekritir i dir? “Abraam ti annan lafwa dan Zeova* e pour sa rezon, Bondye ti konsider li konman en dimoun drwat.”  Ler en dimoun i travay, i pa akoz labonte ekstraordiner ki i ganny son lapey me i akoz zot dwa li.  De lot kote, en dimoun i ganny aprouve konman drwat, pa dapre sa ki i fer me dapre son lafwa dan Bondye ki konsider li konman drwat menm si i fer pese.  David osi ti koz lo lazwa ki en dimoun i gannyen ler Bondye i konsider li konman drwat menm si i pa swiv lalwa. I ti dir:  “Ere sa bann ki zot move aksyon i ganny pardonnen e ki zot pese i ganny kouver,*  ere sa dimoun ki Zeova* pa pran kont son pese ditou.”  Alor, eski zis bann ki sirkonsi ki dan en tel lazwa ouswa bann dimoun ki pa sirkonsi osi? Parski nou’n fini dir: “Bondye ti konsider Abraam konman en dimoun drwat akoz son lafwa.” 10  Me kan ki Abraam ti ganny konsidere drwat par Bondye? Ler i ti sirkonsi oubyen pa sirkonsi? Ler i pa ti ankor ganny sirkonsi. 11  Bondye ti demann Abraam pour sirkonsi e sa ti vin en siny ek en garanti* ki ti montre ki gras a son lafwa, i ti ganny konsidere konman drwat menm ler i pa ti ankor sirkonsi. Sa ti arive pour ki i kapab vin papa tou sa bann ki annan lafwa menm si zot pa sirkonsi e pour ki zot ganny konsidere konman drwat 12  e osi pour ki Abraam i vin papa bann ki sirkonsi. I pa zis papa bann ki sirkonsi me i osi papa bann ki swiv son legzanp lafwa ler i pa ti ankor sirkonsi. 13  Se pa akoz lalwa ki Abraam oubyen son desandans ti ganny sa promes ki i ti pou zeritye lemonn, me se akoz i ti annan lafwa ki i ti ganny konsidere konman drwat e ki i ti ganny sa promes. 14  Parski si i zis bann ki obei lalwa ki vin zeritye, i pa neseser annan lafwa e sa promes i dan vid. 15  An realite, se akoz Lalwa ki nou ganny pini par Bondye, me kot napa lalwa, napa okenn lofans. 16  Abraam ti ganny sa promes akoz son lafwa ek labonte ekstraordiner Bondye. Alor tou son desandans osi ti ganny sa promes. I pa zis bann ki swiv Lalwa ki ganny sa promes me osi bann ki annan lafwa parey Abraam ki papa nou tou. 17  (Sa i zis parey i’n ganny ekrir: “Mon’n fer ou vin papa en kantite nasyon.”) Sa promes ti ganny fer devan Bondye e Abraam ti annan lafwa dan sa enn ki resisit bann mor e koz lo bann keksoz ki pa ankor arive konmsi zot in fini arive.* 18  Menm si i ti paret enposib, Abraam ti annan lespwar ek lafwa ki i ti pou vin papa en kantite nasyon dapre sa ki i ti’n ganny dir: “Se koumsa ki ou desandans pou ete.” 19  Menm si son lafwa ti ankor for, pour li i ti konmsi son lekor ti’n fini mor (vi ki i ti annan preski 100 an) e i ti osi konnen ki Sara ti tro vye pour annan zanfan.* 20  Me akoz promes Bondye, i ti annan lafwa e i pa ti doute, plito par son lafwa i ti vin for e sa ti glorifye Bondye 21  e i ti antyerman konvenki ki sa ki I ti’n promet li, I ti pou osi kapab fer. 22  Alor, “akoz sa, Bondye ti konsider li konman en dimoun drwat.” 23  Par kont, sa parol “Bondye ti konsider li konman en dimoun drwat” pa ti ganny ekrir zis pour li, 24  me osi pour nou ki pou ganny konsidere konman drwat, parski nou krwar dan sa Enn ki ti resisit Zezi nou Senyer. 25  Zezi ti ganny met amor pour nou pese e resisite pour ki nou kapab ganny aprouve konman drwat.

Bann not

Vwar Leksplikasyon bann mo.
Oubyen “pardonnen.”
Vwar Leksplikasyon bann mo.
Oubyen “sele.”
Oubyen posibleman, “e ki fer egziste keksoz ki pa egziste.”
Oubyen “ki matris Sara ti’n fini mor.”