2 Tesalonisyen 1:1-12

  • Salitasyon (1, 2)

  • Lafwa bann Tesalonisyen i kontinyen ogmante (3-5)

  • Vanzans pour bann ki dezobei (6-10)

  • Lapriyer pour kongregasyon (11, 12)

1  Delapar Pol, Silven* ek Timote, pour kongregasyon Tesalonik ki ini avek Bondye nou Papa ek nou Senyer Zezi Kri:  Ki Bondye nou Papa ek nou Senyer Zezi Kri i donn zot lape ek labonte ekstraordiner.*  Mon bann frer, i nou devwar pour touzour remersye Bondye pour zot. Sa i normal parski zot lafwa pe vin sitan for e zot lanmour pour kanmarad pe vin deplizanpli for.  Akoz sa, parmi tou bann kongregasyon Bondye, nou fyer akoz zot, parski zot in demontre landirans ek lafwa malgre tou sa bann persekisyon ek difikilte* ki zot in pas atraver.*  Sa i en laprev ki zizman Bondye i drwat e akoz sa, zot ganny konsidere diny pour ganny Rwayonm Bondye e se pour sa rezon ki zot pe soufer.  Parski vreman, i zis* ki Bondye i fer peye bann ki pe fer zot soufer.  Me zot ki pe soufer, zot pou ganny soulaze ansanm avek nou ler nou Senyer Zezi sorti dan lesyel pou ganny revele ansanm avek son bann lanz pwisan  dan laflanm dife. I pou anmenn vanzans lo sa bann ki pa konn Bondye e sa bann ki pa obei sa bon nouvel konsernan nou Senyer Zezi.  Sa bann menm dimoun pou ganny pinisyon ek destriksyon eternel e zot pou ganny tire devan nou Senyer ek son lafors glorye. 10  Sa pou arive letan Senyer i vini pour ganny glorifye ansanm avek son bann sen. Sa zour, tou bann ki’n demontre lafwa pou emerveye akoz li, vi ki zot ti krwar dan sa ki nou ti anons zot. 11  Sanmenm nou touzour priy pour zot, pour ki nou Bondye i kapab konsider zot diny pour ganny swazir par li e ki gras a son pwisans, i kapab konpletman fer tou sa ki byen dan zot, ki fer li plezir e fer zot reisi dan tou sa ki zot fer gras a zot lafwa. 12  Sa i leka pour ki non nou Senyer Zezi i kapab ganny glorifye atraver zot e ki zot zot ini avek li, gras a labonte ekstraordiner nou Bondye ek nou Senyer Zezi Kri.

Bann not

En lot non pour Silas.
Vwar Leksplikasyon bann mo.
Oubyen “leprev.”
Oubyen “ki zot in soufer.”
Oubyen “drwat.”