1 Zan 5:1-21

  • Sa ki annan lafwa dan Zezi i ranport laviktwar lo lemonn (1-12)

    • Ki i vedir kontan Bondye (3)

  • Annan konfyans dan pouvwar lapriyer (13-17)

  • Vey zot byen dan sa move lemonn (18-21)

    • Lemonn antye i anba kontrol Satan (19)

5  Sa ki krwar ki Zezi i vreman Kris i zanfan Bondye e sa ki kontan Papa i osi kontan son zanfan.  Nou konnen ki nou kontan bann zanfan Bondye ler nou kontan Bondye e obei son bann komannman.  Parski kontan Bondye i vedir obei son bann komannman e pourtan son bann komannman pa en fardo,  akoz tou bann zanfan Bondye* i ranport laviktwar lo lemonn. Gras a nou lafwa, nou’n ranport laviktwar lo lemonn.  Lekel ki kapab ranport laviktwar lo lemonn? Pa i sa enn ki annan lafwa ki Zezi i Garson Bondye?  Li menm li Zezi Kri ki ti vin avek delo ek disan, pa zis avek delo tousel, me avek delo ek disan. Lespri sen i konfirm sa akoz lespri sen i dir laverite.*  Parski i annan trwa temwen:  lespri sen, delo ek disan e zot tou le trwa i dakor avek kanmarad.  Menm si nou aksepte temwannyaz zonm, temwannyaz Bondye i pli siperyer ki temwannyaz zonm, parski Bondye li menm in dir ki Zezi i son Garson. 10  En dimoun ki annan lafwa dan Garson Bondye in krwar sa ki Bondye in dir. En dimoun ki napa lafwa dan Bondye i dir ki Bondye i en manter akoz i pa krwar dan sa ki Bondye in dir konsernan son Garson. 11  La temwannyaz Bondye, se ki Bondye in donn nou lavi eternel e nou ganny sa lavi gras a son Garson. 12  En dimoun ki aksepte son Garson i ganny lavi eternel, en dimoun ki pa aksepte Garson Bondye, pa ganny sa lavi. 13  Mon pe ekri zot sa bann keksoz, zot ki annan lafwa dan non Garson Bondye, pour ki zot kapab konnen ki zot annan lavi eternel. 14  Nou annan konfyans dan li,* ki nenport kwa ki nou demann li ki an armoni avek son lavolonte, i pou ekout nou. 15  Deplis, si nou konnen ki i ekout nou konsernan nenport kwa ki nou demann li, nou konnen ki nou pou ganny sa ki nou demande, parski se avek li ki nou’n demande. 16  Si en dimoun i vwar son frer pe fer en pese ki pa merit lanmor, i devret priy pour li e Bondye pou donn li lavi. Sa i aplikab pour bann ki fer bann pese ki pa merit lanmor. Par kont, i annan en pese ki merit lanmor. Pour sa kalite pese, mon dir sa dimoun pa priy pour li. 17  Tou sa ki mal i en pese, me pourtan i annan en pese ki pa merit lanmor. 18  Nou konnen ki en dimoun ki en zanfan Bondye pa pratik pese, me Garson Bondye* i vey li e sa enn move pa kapab fer li nanryen.* 19  Nou konnen ki nou sorti kot Bondye, me lemonn antye i anba kontrol Satan.* 20  Me nou osi konnen ki Garson Bondye in vin lo later e i’n ed nou konpran* pour ki nou kapab konn sa enn ki vre. Gras a son Garson Zezi Kri, nou ini avek sa enn ki vre. I sa vre Bondye e sa enn ki donn lavi eternel. 21  Mon bann zanfan, reste lwen avek bann zidol.

Bann not

Literalman, “tou keksoz ki’n ne sorti kot Bondye.”
Literalman, “i laverite.”
Oubyen “Nou koz avek Bondye libreman.”
Oubyen “Sa enn ki’n ne sorti kot Bondye.” Setadir, Zezi Kri.
Oubyen “pa kapab tyonbo li.”
Literalman, “sa enn move.”
Literalman, “donn konprenezon, lentelizans.”