1 Timote 3:1-16

  • Bann kalifikasyon pour bann sirveyan (1-7)

  • Bann kalifikasyon pour bann serviter kongregasyon (8-13)

  • Sen sekre konsernan devosyon pour Bondye (14-16)

3  Sa parol i vre: Si en zonm pe fer zefor pour kalifye pour vin en sirveyan dan kongregasyon, i anvi fer en bon travay.  Alor, en sirveyan i devret san okenn repros, i devret annan en sel madanm, annan kontrol dan tou keksoz, annan bon zizman,* son lavi i devret annord, i devret demontre lospitalite e i devret kalifye pour ansennyen.  I pa devret en soular, vyolan,* me i devret rezonnab, i pa devret en dimoun ki kontan fer kankan e ki kontan larzan.  I devret diriz* son prop lakour dan en bon fason e son zanfan i devret byen elve e obeisan.  (Parski si en zonm pa konnen ki mannyer pour diriz* son prop lakour, ki mannyer i pou kapab pran swen avek kongregasyon Bondye?)  I pa devret en dimoun ki’n fek vin en Kretyen, pangar i a vin orgeye* e ganny menm kondannasyon ki Dyab.  Deplis, dimoun ki an deor kongregasyon osi i devret koz an byen lo li* pour ki dimoun pa kritik li* e ki i pa tonm dan pyez Dyab.  Bann serviter kongregasyon* osi i devret serye, zot pa devret ipokrit,* zot pa devret bwar bokou diven, zot pa devret fer profi dan en fason malonnet e voras.  Zot devret reste atase avek lafwa, sa sen sekre,* avek en konsyans kler. 10  Deplis, zot devret ganny teste avan pour konnen si zot kalifye, apre zot kapab servi konman bann serviter* vi ki napa okenn lakizasyon kont zot. 11  Bann madanm osi i devret serye, zot pa devret fer kalonmni, zot devret fidel e annan kontrol dan tou keksoz. 12  Bann serviter kongregasyon i devret annan en sel madanm, zot devret diriz byen zot zanfan ek zot fanmir. 13  Parski bann zonm ki servi dan en bon fason pou annan en bon repitasyon e zot pou kapab koz avek bokou lardyes lo lafwa dan Kris Zezi. 14  Mon pe ekri ou sa bann keksoz, menm si mon swete vin kot ou byento. 15  Me si an ka mon pa vin deswit, ou a konnen konman ou devret konport ou dan fanmir Bondye, setadir dan kongregasyon sa Bondye vivan, ki en pilye ek sipor pour laverite. 16  Sa sen sekre konsernan devosyon pour Bondye i vreman enportan: ‘I ti vin konman en imen, i ti ganny aprouve konman drwat ler i ti vin en lespri, i ti aparet avek bann lanz, i ti ganny anonse avek bann nasyon, dimoun dan lemonn ti krwar dan li e i ti mont dan lesyel dan laglwar.’

Bann not

Oubyen “i devret rezonnab.”
Oubyen “kontan tape.”
Oubyen “okip.”
Oubyen “okip.”
Oubyen “anfle avek lorgey.”
Oubyen “i devret annan en bon repitasyon.”
Oubyen “pour ki i pa anmenn laont lo li.”
Oubyen “asistan ministeryel.”
Literalman, “koz de parol.”
Setadir, tou bann lansennyman Kretyen.
Oubyen “minis.”