A ummi cazin ah kal

A ummi cazin ah kal

 A PHAW CAPAR | Jehovah Tehte Hna cu Ahote dah an Si?

Kan Rianṭuannak caah Tangka Zeitindah kan Hmuh?

Kan Rianṭuannak caah Tangka Zeitindah kan Hmuh?

Kum fatin Baibal le Baibal hrambunhmi cauk nuai tampi kan chuah. Vawleicung pumpi ah zung ṭengnge caah inn kan sak i cauk chuahnak seh hna kan hman. Khrihfabu tampi cu a sawhsawh tein le dawh tein sakmi Biakinn ah an i pum. Mah vialte caah ahote nih dah an bawmh?

Kan rianṭuannak cu mah lungtho tein pekmi thawhlawm in ṭuanmi an si. (2 Korin 9:7) 1879 ah chuahmi Vennak Innsang a ukhnihnak nih hitin a chim: “‘Zion Vennak Innsang’ [hi mekazin hi hlanah cutin an rak auh] kha JEHOVAH nih a bawmh tiah kan zumh, cutin a si chung paoh cu bawmhnak hmuh awkah mi a nawl hna lai lo i a hal bal hna lai lo.” Atu zongah Jehovah nih a bawmh tiah kan zumh rih ko.

Mi cheukhat nih thawhlawm kha zung ṭengnge ah direk in an kuat. Biakinn kip ah thawhlawm kuang zong chiah a si. Asinain cheuhra cheukhat le thawhlawm kan kholh bal lo. Cun kan rianṭuannak ca le cauk hna caah a man kan hal bal hna lo. Mi sin phung kan chim ruang, Khrihfabu ah kan cawnpiak hna ruang le biakinn saknak rian kan bawmh ruangah tangka pek kan si lo. Jesuh nih “man pek loin nan hmuh i man pek loin va pe ve hna u” tiah a ti. (Matthai 10:8) Vawleicung pumpi i zungpi le zung ṭengnge ah rian a ṭuanmi hna telin Jehovah Tehte Hna i Uktu Bu chungtel hna zong lahkhah an hmu lo.

Jehovah Tehte Hna rianṭuannak dihlak cu mah lungtho tein pekmi thawhlawm in ṭuanmi an si. Thawhlawm zeizat dah kan pek lai, voi zeizat dah kan pek lai ti kha pumpak pakhat cio nih anmah tein bia an khiah.​—Minung Zalonnak kong Europe Biaceihnak Zung, 2011

Thawhlawm kha leiser ral a tongmi hna bawmhnak ca zongah kan hman. Kumzabu pakhatnak i Khrihfa hna nih sifah harnak a tongmi hna kha anmah lungtho tein an rak bawmh hna. (Rom 15:26) Cu bantukin tuchan zongah harnak a tongmi hna kha ti le rawl kan pek hna, sii kan thlop hna i an inn le biakinn kha kan sakpiak ṭhan hna.