A ummi cazin ah kal

A ummi cazin ah kal

 Thilhlun Khonnak Ah Chiahmi

Zumhnak a Fehtermi Kum 100 a Hlun cangmi Drama

Zumhnak a Fehtermi Kum 100 a Hlun cangmi Drama

“Unaupa Russell taktak hmuh bantuk a si.”—1914 ah “Hmanthlak Drama” a zohmi pa.

TUKUM hi “Sernak Kong Hmanthlak Drama” kum 100 a tlinnak a si, mah drama cu Baibal kha Pathian Bia a si ti zumh awk bawmtu ah chuahmi a si. Thlennawnnak zumhnak, fakpi in soiselnak le lungawṭawmnak nih mi tampi an zumhnak a derter hna lio caan ah “Hmanthlak Drama” nih Jehovah cu Sertu a si kha a langhter.

Baibal Siangngakchia hruaitu a simi Charles T. Russell nih Baibal biatak karhter awkah hmual a ngei bikmi le a rang bikmi lam kha a kawl zungzal. Baibal Siangngakchia hna nih biatak karhternak caah cauk an hmannak hi kum 30 leng a si cang. Atu ah thil thar pakhat a simi a cawlmi hmanthlak nih an lungthin a lak ngai hna.

A Cawlmi Hmanthlak in Thawngṭha Karhternak

1890 hnuin mipi nih a aw a um lomi a cawlmi hmanthlak kha an rak zoh khawh. 1903 thawklei ah New York City Baptist church ah biaknaklei video an rak piah. Cucaah Russell nih “Hmanthlak Drama” ca timhtuah hram a thawk caan, 1912 ah a cawlmi hmanthlak cu a rak umka lawng a si rih. Cauk lawng nih a langhter khawh lomi Baibal biatak kha hmanthlak drama nih a langhter khawh lai ti kha Russell nih a hngalh.

“Hmanthlak Drama” cu suimilam pariat chung a raumi a si i ṭhen li in an piah tawn. Mah ah Unaupa Russell nih a timhmi Baibal konglam tawi tete 96 kha a min a thangmi biachimtu nih a chimmi aa tel. Hmanthlak tampi kha music he an piah. A min a thangmi Baibal tuanbia kha a rong a ummi hmanthlak le video in an piah lioah mah he aa tlak ningin unaupa hna nih awkhumhmi kuang in music le aw an chuah.

“Mah ah arfi ser an sinak in Khrih Kum Thongkhat Uknak a dongh tiang hmanthlak vialte aa tel dih.”—F. Stuart Barnes, 1914 ah kum 14 a si

Film le slide tampi cu a leng i hmanthlak dawr in an cawk. Philadelphia, New York, Paris le London i hmanthlak suai a thiammi hna nih slide le film hna ah hmanthlak an suai. Bethel i Hmanthlak Suainak Khaan ah a ṭuanmi hna zong nih hmanthlak  tampi an suai ve, a rawkmi slide pawl zong kha an thlen. Hmanthlak pawl kha an cawk lengah Bethel ah a ummi hna zong nih New York, Yonkers ah hman an i thla ve. Abraham, Isak le Abraham kha a fapa raithawi lo awkah a khamtu vancungmi ti bantuk zaka ah an i thla.—Gen. 22:9-12.

Sernak Kong Hmanthlak Drama piah awkah tuah a herhmi tampi a um i unau tampi an i bawm

Unaupa Russell a hawi pa nih cauk namnak ah a ṭuanmi hna kha mah kan tuahmi nih “biaknak ṭhancho awkah hlanah rak tuahmi zei thil nakhmanh in mi tampi kha Baibal hngalh a duhter deuh hna lai” tiah a ti hna. Thlaraulei a ṭaamhalmi mi tampi bawmh awkah cu bantuk thil thar an tuahmi kha biaknaklei hruaitu hna nih an thangṭhat hna maw? An thangṭhat hna lo, Khrihfaram hruaitu dihlak nih “Hmanthlak Drama” kha an thangchiat i mi nih an zoh khawh nakhnga lo a thlithup in le langhngan in rian an ṭuan. An piahnak hmun pakhat ah cun biaknaklei hruaitu hna nih electric mei an hmihpiak hna.

Khuallawmtu unaunu hna nih “Hmanthlak Drama” chung i hmanthlak aa telmi cauk hmemi nuai tampi kha mi an pek hna

A zohmi hna kha Jesuh a ngakchiat lio hmanthlak a cuangmi ṭangbenh zong an pek hna. Mah nih aa benhmi hna kha “daihnak fa” si awkah a hngalhter hna

Asinain man loin piahmi “Hmanthlak Drama” a zohmi cu an tam tuk i piahnak inn an khat dih. United States i khua 80 lengah nifate “Hmanthlak Drama” an piah. A zohtu tampi cu ‘aw aa telmi video’ a voikhatnak an zoh a si i an khuaruah a har tuk. Hmanthlak pakhat hnu pakhat rangpi in a kal thluahmah caah mi nih ar fate a keuhmi le a mommi pangpar a par thluahmahmi kha an hmuh khawh. Mah hmanthlak hna nih Jehovah i khuaruahhar a simi a fimnak kha an langhter. A hramthawknak ah aa ṭial bantukin “Hmanthlak Drama” a thawknak ah Unaupa Russell a cuanmi an hmuh tikah a zohtu pakhat nih “Unaupa Russell taktak hmuh bantuk a si” ti hmanh in a ti.

Philh Khawh Lomi Baibal Cawnpiaknak

1914, January 11 ah “Hmanthlak Drama” kha New York City i a ṭha ngaimi mah baisikup zung ah an piah, mah lioah mah inn a ngeitu cu Vawleicung Pumpi Baibal Siangngakchia Bu an si

Caṭialtu le film lei hlathlaitu Tim Dirks nih “Hmanthlak Drama cu aw (aw khumhmi), a cawlmi hmanthlak le a rong a ummi slide, voikhat te ah an piahṭimi a hmasa bik a si” tiah a ti. “Hmanthlak Drama” hlanah chuahmi film hna ah cutin an dihlak in an piahṭi lo, cheukhat lawng an telh, a hleiin Baibal kong piahmi film ah an telh lo. Cun “Hmanthlak Drama” a zohmi cu Chaklei America, Europe, Australia le New Zealand ah a kum khatnak lawngah nuai kua hrawng an si i a dang film a zohmi hi mah tlukin an tam bal lo.

“Hmanthlak Drama” cu 1914, January 11 ah New York City ah an rak piah hmasa bik. Mah hnu thla sarih ah Vawlei Ralpi Inak aa thawk. Asinain mi tampi cu “Hmanthlak Drama” zoh awkah an i pum rih ko i a ra laimi Pennak thluachuah a langhtermi a fiangmi hmanthlak in hnemhnak an hmu. Zeiti a si hmanhah “Hmanthlak Drama” cu 1914 caah philh khawh lomi a si.

Chaklei America i hmun kip ah “Hmanthlak Drama” ṭuai kul an hman