A ummi cazin ah kal

A ummi cazin ah kal

‘Jehovah Ṭhatnak kha Khuaruahhar in Zoh’

‘Jehovah Ṭhatnak kha Khuaruahhar in Zoh’

Lungre a theihtermi thil sining hna nih fakpi in a kan hnorsuan khawh. Mah kong lawngte kan ruat kho, kan tha a derter khawh i nunnak kan hmuhning kha a hnorsuan khawh. Hlanlio Israel Siangpahrang David cu harnak tampi a rak tong. Mah kha zeitindah a tawnghtham? David nih salm hla ah hitin a chim: “Bawmhnak hmuh duh ah BAWIPA cu ka auh i amah cu ka nawl. Ka harnak vialte kha amah ka chimh dih i ka retheihnak vialte kha ka hngalhter. Ka thlarau kha ka chungah a baat tikah, zeidah ka tuah awk a si kha nangmah nih na hngalh.” David cu Pathian bawmhnak hmuh awkah toidor tein thla a cam.—Salm 142:1-3.

David nih harnak a ton caan ah Jehovah kha toidor tein bawmhnak a hal

David nih a dang salm hla ah hitin a ti rih: ‘Jehovah cu thil pakhat ka hal, ka duhmi thil cu pakhat lawnglawng a si ko: cucu ka nun chung vialte Jehovah inn chung i um le a ṭhatnak kha khuaruahhar in zoh le a biakinn kha sunsaknak he zoh kha a si.’ (Salm 27:4, NW) David cu Levi mi a si lo nain puan biakinn tual pawngah a dirmi kha na mitthlam ah cuanter hmanh. Mah lio caan ah puan biakinn cu a hmaanmi biaknak i a biapit biknak hmun a si. David cu aa lawmh tuk caah a nun chung vialte cuka ah um a duh i Jehovah ‘ṭhatnak kha khuaruahhar in zoh’ a duh.

‘Ṭhatnak’ timi biafang nih Pathian a sunparnak le a lianhngannak kha a langhter. Mah kong a ruah tikah David cu aa nuam. David nih biaknak he aa tlaimi Pathian timhtuahnak kha sunsaknak he a zoh zungzal. Kannih zong ‘David bantuk lungput ka ngei ve maw?’ tiah kan i hal awk a si.

Pathian Timhtuahnak kha ‘Sunsaknak he Zoh’

Tuchan ah amah naih awkah Jehovah nih a timhtuahmi cu inn taktak a si ti lo. A hmaanmi biaknak ca timhtuahnak a simi Pathian i thlaraulei biakinn a si cang. * Mah timhtuahnak kha ‘sunsaknak he kan zoh’ ahcun ‘Jehovah ṭhatnak kha khuaruahhar in kan zoh’ khawh ve lai.

Pumhnak thlam luhnak pawngah a ummi dar in sermi khanghthawinak biakṭheng kha ruathmanh. (Ex. 38:1, 2; 40:6) Mah biakṭheng nih Jesuh pekmi raithawinak kha Pathian nih cohlan a duh ti a langhter. (Heb. 10:5-10) Mah cu kan caah zei sullam dah a ngeih kha ruathmanh. Lamkaltu Paul nih hitin a ṭial: “Kannih cu Pathian ral kan rak si, sihmanhsehlaw a Fapa thihnak thawngin a hawi ah a kan ser cang.” (Rom 5:10) Jesuh thletmi thisen kan zumh kha kan langhter ahcun Jehovah “hawikom” kan si lai. (Salm 25:14) Mah tikah Pathian nih a kan zumh lai i a mithmai ṭha kan hmu lai.

Kan ‘sualnak cu hnawhpiak’ kan si caah “Bawipa nih thlarau thazaang thar hmuhnak caanṭha” a kan pek. (Lam. 3:19, 20) Kan sining cu a hmuh laimi dantatnak a hngah lioah a sualnak aa ngaichih i thlennak nganpi a tuahmi thongtla pakhat he aa lo. Mah kha a dingmi biaceihtu nih a hmuh tikah thah ding timi dantatnak in a luatter ṭhan. Mah tikah thongtlapa cu a hna a ngam tuk lai i aa nuam tuk lai. Mah biaceihtu bantukin Jehovah nih a sualnak aa ngaichihmi hna kha mithmai ṭha a pek ṭhan hna i thih dantatnak in a luatter hna.

A Hmaanmi Biaknak ah i Nuam

David nih Jehovah inn ah a hmuhmi a hmaanmi biaknak he aa tlaimi thil ah Israel mi tampi an i pumhmi, tlangbawi le Levi mi hna nih Nawlbia an relmi le an fiantermi, rimhmui an khanghthawimi  le Pathian rian an ṭuanmi hna aa tel. (Ex. 30:34-38; Nam. 3:5-8; Deut. 31:9-12) Hlanlio Israel mi hna nih an tuahmi mah thil hna cu tuchan tuahmi he aa lawhnak a um.

Hlanlio bantukin tuchan zongah “unau rual i rem tein khuasakṭi hi zeitlukin dah a ṭhat i a nuamh!” (Salm 133:1) Vawleicung pumpi “unau” rual cu khuaruahhar in kan karh. (1 Pit. 2:17) Pumhnak ah Baibal kha an rel i an fianter. Jehovah nih Bupi kha hmangin lamhruainak tampi a kan pek. Pumpak le chungkhar Baibal hlathlainak ca i hman awkah thlarau rawl tampi kha cauk in kan hmuh. Uktu Bu ah aa telmi pakhat nih hitin a chim: “Jehovah Bia ṭha tein ruahnak, a sullam tuaktannak, hngalhthiamnak le thleidan thiamnak kawlnak hna nih thlaraulei ah a ka rumter i lungsi hnangamnak a ka pek.” ‘Hngalhnak cu kan lungthin caah a nuammi a hung si.’—Ptb. 2:10.

Tuchan ah Pathian salle hna i cohlan awktlak thlacamnak cu Jehovah sinah nifate a kai. Jehovah caah cu bantuk thlacamnak cu a rim a thawmi zihmui bantuk a si. (Salm 141:2) Jehovah nih toidor tein thlacamnak in amah kan naihmi kha a duh ti kan hngalhmi nih a kan lawmhter taktak.

Moses cu hitin thla a cam: “Kan cungah na thluachuahnak cu um sehlaw kan thil timi kip ah khan khuaawng kan pemhter ko!” (Salm 90:17) Phungchimnak rian kha lungtho tein kan ṭuan tikah Jehovah nih thluachuah a kan pek. (Ptb. 10:22) Mi cheukhat kha biatak hngalh awkah kan rak bawmh men hna lai. Zeirel lonak, damlonak, lungdonghnak asiloah hremnak ton buin kum tampi chung phungchimnak ah kan i tel men lai. (1 Thes. 2:2) Asinain ‘Jehovah ṭhatnak’ kha kan hmuh i kan i zuamnak kha vancung kan Pa nih a sunsak tuk ti kan hngalh, a si ko lo maw?

David cu hitin hla a sa: “Nangmah dah ti lo cu ka ngeihmi dang zeihmanh a um lo, maw BAWIPA, ka herhmi vialte cu nangmah nih na ka pek, ka nunnak cu na kut chungah a um. Laksawng na ka pekmi cu zeitlukin dah khuaruahhar an si.” (Salm 16:5, 6) David cu a “ngeihmi” thil caah aa lawm, mah cu Jehovah he pehtlaihnak ṭha a ngeihmi le a rian a ṭuan khawhmi kha a si. David bantukin kannih zong harnak cu kan tong ko nain thlaraulei thluachuah tampi kan hmu. Cucaah a hmaanmi biaknak ah i nuam u sihlaw Jehovah i thlaraulei biakinn kha ‘sunsaknak he zoh’ zungzal hna u sih.

^ cat. 6 1996, July 1, Vennak Innsang, cahmai 14-24 [Kawl] zoh.