A ummi cazin ah kal

A ummi cazin ah kal

 Careltu Hna Biahalnak . . .

Christmas cu Khrihfa hna Puai a Si maw?

Christmas cu Khrihfa hna Puai a Si maw?

Vawleicung i mi nuai tampi nih Christmas puai cu Jesuh Khrih a chuah ni a si tiah an zumh. Asinain Jesuh he naih tein a ummi kumzabu pakhatnak i Khrihfa hna nih Christmas puai an tuah bal maw? Chuah ni puai he aa tlaiin Baibal nih zeidah a chim? Mah biahalnak a phi kha na hngalh ahcun Christmas cu Khrihfa hna puai a si maw, si lo ti kha biachahnak na tuah khawh lai.

Pakhatnak, Baibal ah Jesuh asiloah a dang zumhawktlak tein Pathian a biami hna nih chuah ni puai an tuah timi a um lo. Baibal chungah chuah ni puai a tuahmi pahnih lawng an um. An pahnih in Jehovah Pathian a bia lomi an si i an chuah ni ah thil ṭhalo an rak tuah. (Genesis 40:20; Marka 6:21) A hmasa Khrihfa hna nih “lawkih mi nih an tuahmi chuah ni puai” kha an tuah lo tiah Encyclopædia Britannica nih a ti.

Jesuh cu zeitik ah dah a chuah?

Baibal nih Jesuh a chuah ni kha fiang tein a chim lo. “Biakam Thar asiloah a dang ca hna nih Khrih a chuah ni kha an langhter lo” tiah McClintock le Strong’s Cyclopedia nih a ti. Jesuh nih a chuah ni puai kha a zultu pawl tuahter a duh hna ahcun a chuah ni kha a chimh ko hna lai.

Pahnihnak, Baibal ah Jesuh asiloah a zultu pakhatkhat nih Christmas an tuah ti a langhtermi a um lo. New Catholic Encyclopedia nih “Philocalus i Roman calendar” ah Christmas kong kha a hmasa bik a rak langhter tiah a ti. “Christmas cu AD 336 ah a hmasa bik rak tuah dawh a si.” Baibal an ṭial dih hnu le Jesuh a thih in kumzabu tampi a rauh hnuah Christmas puai tuah a si ti cu a fiang ko. Cucaah McClintock le Strong nih “Christmas puai tuah dingah Pathian nih a kan fial lo i Biakam Thar zongah a um lo” tiah an ti. *

Jesuh nih a zultu pawlkha zeitik ah dah ruahnolhnak puai tuah dingin a fial hna?

A Liannganmi Saya Jesuh nih a zultu pawl tuahter a duhmi hna kong kha fiang tein lamhruainak a pek hna i mah kha Baibal ah ṭial a si. Asinain Christmas puai kong cu aa tel lo. Sianginn saya pakhat nih siangngakchia pawl kha lamhruainak a pekmi hna lengin tuahter a duh hna lo bantukin Jesuh nih a zultu hna kha Cathiang chung i aa ṭialmi ‘phung lengin lonhter a duh hna lo.’—1 Korin 4:6.

Asinain hmasa Khrihfa hna nih an tuah tawnmi a biapi tukmi puai pakhat cu a um. Mah cu Jesuh a thih Philhlonak puai kha a si. Jesuh theng nih a zultu pawl kha mah puai tuah awkah a fial hna i zeitindah tuah ding a si ti zong a hmuhsak hna. Mah a fialmi hna lamhruainak le a thih ni cu Baibal ah aa ṭial.—Luka 22:19; 1 Korin 11:25.

Kan hngalh cang bantukin Christmas cu chuah ni puai caah tuahmi a si i lawkihmi phunglam a si caah hmasa Khrihfa hna nih an tuah lo. Mah lengah Jesuh asiloah midang pakhatkhat nih Christmas an tuah timi Baibal ah a um lo. Mah ruangah vawleicung pumpi i Khrihfa nuai tampi nih Christmas tuah lo awkah bia an khiah. ▪

^ cat. 6 Christmas aa thawknak he aa tlaiin tam deuh in hngalh awkah 2014, December 1, Vennak Innsang i “Careltu Hna Biahalnak . . . Christmas he aa Tlaimi Biatak cu Zeidah a Si?” timi capar ah zoh. Cun www.jw.org/cnh zongah zoh.