A ummi cazin ah kal

A ummi cazin ah kal

 A PHAW CAPAR | Hnemhnak Khoika In Dah Hmuh Khawh A Si?

Kan Dihlak In Hnemhnak Kan Herh

Kan Dihlak In Hnemhnak Kan Herh

Na ngakchiat lio i naa tenghmi kha naa cinken ti maw? Na kut le na khuk zong an kok men ko lai. Mah tikah na nu nih aan hnemhmi, na hma aan ṭawlpiakmi le bandage in aan menpiakmi hna kha naa cinken ko lai. Na rak ṭap ko nain aan hnemh i aan pom tikah na hma fahnak cu a dam deuhmi a lo ko lai. Na ngakchiat lio ahcun hnemhnak hmuh kha naa fawih ko lai.

Asinain kan hun upat thluahmah tikah nunnak ah buaibainak in a khat. Kan tonmi buaibainak hna cu a tam deuhdeuh bantukin hnemhnak hmuh zong a har deuhdeuh ve. Upat hnuah tonmi buaibainak hna cu bandage in mennak le nule kuhnak men in tawnghtham khawh a si ti lomi cu ngaihchiat awk ngai a si. Tahchunhnak cheukhat hi zohhmanh.

  • Ruahlopi in rian phuah na si i na lungre a theih tikah. Julian nih rian an ka phuah tikah ka lau tuk i ka lung aa tuaitaam tiah a ti. ‘Kum tampi chung teima tein rian ka ṭuan buin company nih zeicah san a tlai lo tiah an ka ruah hnga? Ka chungkhar tah zeitindah ka cawm hna lai?’ tiah a ruat.

  • Innchunghawi he i ṭhen ruangah na lung a dongh tikah. “A luancia thla 18 lioah ka vapa nih ruahlopi in a ka kaltak caah ka ngaih a chia tuk hringhran. Ka lungthin cu a kekkuai dih. Lungthinlei he, pumsalei he a ka hnorsuan i ṭihnak lungput hna ka hun ngei” tiah Rakel nih a chim.

  • A zual ngaimi zawtnak ruangah a dam kho ti lo ding na lawh tikah. “Ka hnabei a dong, nun hi ka duh ti lo” tiah a chimmi pupa Job bantukin na intuar caan a um men ko lai. (Job 7:16) Kum 80 leng a simi Luis zong nih “a caan ah cun thih ding lawng a hngakmi bantukin ka intuar” tiah a ti. Nang zong cutin na intuar ve men ko lai.

  • Dawtmi pakhatkhat nih thihtak ruangah hnemhnak na herh tikah. “Vanlawng accident in ka fapa a thih tikah a hmasa bik ka intuarnak cu ka zumh khawh lomi hi a si. Mah hnuah ka lung a fak, Baibal nih a tahchunh bantukin ka lungthin cu namte saupi nih chunh bangin a fak” tiah Robert nih a ti.—Luka 2:35, NW.

Robert, Luis, Rakel le Julian cu a har tukmi thil sining an tong ko nain hnemhnak an hmu. Khoika in dah an hmuh? Hnemhnak a kan pe kho biktu A Liannganmi Pathian sinin an hmuh. Nangtah na herhmi hnemhnak kha aan pe ve lai maw?