A ummi cazin ah kal

A ummi cazin ah kal

 An Zumhnak Kha I Zohchunh | David

“Raltuknak cu Jehovah Ta a Si”

“Raltuknak cu Jehovah Ta a Si”

DAVID nih i namchih lengmang in a tlimi ralkap pawl kha a hmuh hna. Annih cu ther le phang ngaiin raltuknak hmun in an rak zaam. Zeidah mah tlukin an ṭih? Thinphang ngaiin biafang pakhat atu le atu an chimmi kha David nih a theih. Mah cu mipa pakhat i a min a si. Nelrawn lakah langthiam ngaiin a dirmi pa kha David nih a hmuh, mah pa cu a hmuh balmi minung lakah a ngan bikmi a si.

Mah cu Goliath a si. Ralkap pawl nih an ṭihnak a ruang kha David nih a hngalhthiam cang. Mah pa i a tung cu van tawng sehlaw a lo. Aa hrukmi ralthuam tel lo hmanhin a pum cu mi pahnih fonh tluk a si. A rit tukmi ralthuam aa hruk lengah a ṭhawng tukmi le raltuknak ah hmuhtonnak a ngei ngaimi ralkap pakhat zong a si. Goliath nih aw thangpi in a zuamcawh lengmang hna. Israel ralkap le an siangpahrang Saul kha a serhsat hna tikah a thang tukmi a aw nih tlang a tlerh dihmi khi ruathmanh. Amah he i doh awkah pakhatkhat rak chuak u tiah a zuamcawh hna.—1 Samuel 17:4-10.

Israel ralkap nih an ngamh lo i Siangpahrang Saul zong nih a ngamh lo. Hi bantukin an umnak hi thlakhat leng a si cang ti kha David nih a hngalh. Nikhat hnu nikhat in Goliath nih a zuamcawh lengmang hna i Filistin ralkap le Israel ralkap cu zei tuah awk hngal loin, ral i tuk loin an um ko. Mah tikah David cu a lung a dong. Israel siangpahrang le a ralkap pawl nih an ṭih tukmi cu ningzah awk ngai a si. Mah ah David a ule pathum zong an i tel. David hmuhnak ah cun mah siasal a biami Goliath nih Israel ralkap lawng kha a serhsatmi hna a si lo, Israel mi hna Pathian Jehovah kha a serhsatmi a si. Asinain mino pakhat men a simi David nih zeidah a tuah khawh lai? David zumhnak in zeidah kan i cawn khawh?—1 Samuel 17:11-14.

“Amah cu Thuh tuah, zeicahtiah Amah hi Dakaw a Si cu”

Mah thil a can hlan, a luancia thla tampi lioah a cangmi kong kha zohhmanh u sih. Nikhat cu zanlei sang ah Bethlehem khua pawng tlanghrawn ah David nih a pa tuu kha a cawng. David cu kumhra fai hrawng lawng a si rih i muidawh, micuar sen le a mit au aa dawh ngaimi a si. Tingtang tum buin a caan a liamter tawn. Pathian sermi thil dawhdawh hna a hmuh tik paohah hla a phaan i a sak tawn. Suimilam tampi chung lungtho thatho tein a cawn caah tingtang tum zong a thiam chinchin. Tu zanlei ahcun a pa nih David kha atu hrimhrim ah rak tlung seh tiah mi pakhat kha a va auhter.—1 Samuel 16:12.

A pa, Jesse le a tar ngai cangmi pa pakhat bia an i ruahmi kha a hmuh. Mah tarpa cu zumhfekmi profet Samuel a si. Jesse fapa lakin pakhat kha Israel siangpahrang ca i chiti thuh awkah Jehovah nih a thlahmi a si. David a ule pasarih kha Samuel nih a hmuh cang ko hna nain Jehovah nih annih cu ka thimmi an si lo tiah fiang tein a chimh. Asinain David a rak phanh tikah Jehovah nih Samuel kha “amah cu thuh tuah; zeicahtiah amah hi dakaw a si cu” tiah a ti. Cucaah David a ule vialte hmaiah Samuel nih chiti khat tein a rawnnak ki kha a on i David lu ah a toih. Cutin chiti thuh a si hnuah David nunnak cu aa thleng cang. Baibal nih hitin a ti: “Jehovah Thlarau cu cu ni thawkin fakpi in David cungah a tlung.”—1 Samuel 16:1, 5-11, 13.

Sahrang pawl a teimi hna cu Jehovah ruangah a si ti kha David nih toidor tein a cohlan

Mah tikah David nih siangpahrang sinak kong lawng kha a ruat maw? A ruat lo. A ngan deuhmi rian  pawl ṭuan dingah a caan a cu cang tiah Jehovah thlarau nih a hngalhter lai caan kha lungtho tein a hngak. Mah caan chungah a nautami tuukhalhnak rian kha a ṭuan rih ko. Mah rian kha a lungthin le a nunnak pek in ralṭha tein a ṭuan. A pa tuurun pawl cu voihnih tiang chiandeih le vom dohnak an tong. Mah tikah David nih a himnak hmun, lamhlapi in mah ṭihnungmi sahrang pawl kha ṭhawl ding lawngah aa zuam lo. Mah canah a zuan hnawh colh hna i bawmtu a ngei lomi tuu pawl kha a huhphenh hna. A voihnih ningin ṭih a nung ngaimi sahrang pawl kha amah lawng nih a thah hna.—1 Samuel 17:34-36; Isaiah 31:4.

A hnuah David cu mi pakhat nih a rak auh ṭhan. A min thannak cu Siangpahrang Saul sin tiang a phan. Saul cu a ṭhawngmi ralkap cu a si rih ko nain Pathian lamhruainak a zulh lo caah Jehovah mithmai ṭha a sung. Jehovah nih a thlarau kha Saul sinin a lak caah thlarau ṭhalo cu a sinah a lut. Cucaah a thin a hung, lunghrinnak a ngei i a puarhrang tawn. Saul sinah cu bantuk thlarau ṭhalo a luh tikah a lungthin a daihter khotu thil pakhat cu tingtang a si. Saul salle cheukhat nih David tingtang tum a thiammi le doh a thiammi kha an hngalh. Cucaah David cu an auh i anih cu Saul inn ah tingtang tumtu le a hriamnam putu a hung si.—1 Samuel 15:26-29; 16:14-23.

Cu bantuk thil sining i David zumhnak in mino pawl nih an i cawn khawhmi thil tampi a um. David nih aa dinh caan hna kha Jehovah naihnak ah a hmanmi kha i cinken. Mah lengah a sining pawl ṭhancho dingin lungsau tein a cawn caah hmailei a ṭuan hngami rian caah timhcia a siter. A biapi bikmi cu Jehovah thiang thlarau lamhruainak ningin a rak tuah. Mah cu kan caah zohchunh awk ṭha taktak a si.—Phungchimtu 12:1.

“Amah ruangah hin Ahohmanh An Lung Dong hna Hlah seh”

David cu Saul sinah rian a ṭuan ko nain atu le atu inn ah a kir i tuu a cawng tawn, a caan ahcun saupi a caam tawn. Cu bantuk caan ah Jesse nih Saul sinah ralkap a ṭuanmi a fale pathum i an sining hngalh awkah David kha a thlahmi a si. David nih a pa bia kha ngai in a ule caah ei awk aa phorh i Elah Nelrawn ah a va kal. A va phanh tikah hi capar a thawknak ah kan hmuh bantukin ralkap phuhnih cu ral i do loin awlokchong in an rak ummi kha a va hmuh i a lung a dong tuk. A ngan ngaimi nelrawn i khattalei le khattalei tlanghrawn ah an rak um ko.—1 Samuel 17:1-3, 15-19.

David nih thil sining cu a ing kho lo. A nungmi Pathian, Jehovah ralkap cu siasal a biami, mah minung menmen ruangah zeicah an tlik lai? Goliath nih Jehovah thengte kha a serhsatmi a si tiah David nih a ruah. Cucaah Goliath a doh lainak kong kha ralkap pawl sinah lungtho tein a chim. Tlawmpal ah David i a upa, upa bik a simi Eliab nih David chimmi bia kha a theih. Mah tikah a naupa kha fakpi in a sik i raltuknak zoh awkah na ra ko hih tiah sual a puh. Asinain David nih “zei hen dah ka tuah i? Bia kaakhat chim thamtham cu” tiah a leh. Cun Saul sinah a bia a phanh tiang Goliath dohnak kong kha a chim lengmang. Mah tikah siangpahrang nih David cu a sin i ratpi awkah a fial hna.—1 Samuel 17:23-31.

David nih “amah [Goliath] ruangah hin ahohmanh an lung dong hna hlah seh” tiah siangpahrang kha tha a pek. Saul le a ralkap pawl cu Goliath ruangah an lung a dong taktak ko. Minung phung ningin anmahle anmah kha minganpa pi he an i tahchunh i kannih cu mah pa i a tai asiloah  a ṭaang can lawng kan si tiah an ruah caah a si kho men. Hriamnam aa putmi mah minganpa pi nih fawi tein le khulrang in a kan tei lai tiah an ruah. Asinain David nih cun cutin a ruat lo. David nih thil sining a hmuhning cu anmah he aa dang tuk ti kha kan hmuh lai. Cucaah Goliath doh awkah nawl a hal.—1 Samuel 17:32.

Saul nih David cu a al i, “hi Filistin mipa va doh awkah hin na kal kho lai lo, zeitintiah nang cu tlangval te men na si i anih cu a tlanval ri in pei ralkap a si cang cu” tiah a ti. David cu ngakchiate lawng ma a si taktak? A si lo. Asinain ralkap i luh awkah a ngakchia tuk rih. Cun a muisam zong ngakchiate a lo i a si men lai. David cu doh a thiammi in a min a thangmi a si caah mah lioah kum 19 hrawng a si men cang lai.—1 Samuel 16:18; 17:33.

Saul nih a zumh nakhnga David nih chiandeih le vom a thahnak kong kha a chimh. Mah cu aa uanthlar caah a si maw? A si lo. Zei ruangah dah teinak a hmuh ti kha David nih ṭha tein a hngalh. Hitin a ti: “Chiandeih tin chung le vom tin chungin a ka chuahtu Jehovah nih hi Filistin mipa kut chung hin a ka chuah ko lai.” A donghnak ah Saul nih David cu, “va kal law, Jehovah cu na sinah um ko seh,” tiah a ti.—1 Samuel 17:37.

David bantuk zumhnak ngeih kha na duh maw? David zumhnak cu saduhthah menmen a si lo. Pathian kong he aa tlaiin a hngalhnak le a hmuhtonnak ruangah Pathian cungah zumhnak a ngeihmi a si. Jehovah cu dawtnak a ngeimi Hupphengtu le a biakam ningin a Tuahtu a si ti kha a hngalh. Cu bantuk zumhnak ngeih kan duh ve ahcun Baibal in Pathian kong kha kan cawn zungzal awk a si. Kan hngalhmi ningin kan nun tikah ṭhatnak a chuahmi kha kan hmuh lai i kan zumhnak a fek chin lai.—Hebru 11:1.

“Jehovah nih Nangmah cu Keimah Kut chungah a Ka Pek lai”

A hmasa ah Saul nih David kha amah ralthuam pawl a hrukter. Mah cu Goliath ta he an i lo ngaingai, darsen in sermi an si, a ngan tuk i a rit tuk. David nih aa hruk tikah a ngan hnawh tuk lengah umkalnak ah hna a hnawh i a sia a rem lo. Anih cu ralkap pakhat in cawnpiakmi a si lo caah raltuknak thilthuam hruk kha aa ziak lo. A hleiin mah angki cu Israel mi lakah a sang bikmi Saul nih aa hrukmi a si. (1 Samuel 9:2) Cucaah a phoih dih ṭhan i aa hruk tawnmi, tuu cawnghnak a thil kha aa hruk ṭhan.—1 Samuel 17:38-40.

David nih tuu a cawnghnak a ṭhiangṭhunh kha aa lak, a zal kha aa bei i lungherh chehnak kha aa put. Lungherh chehnak cu aa tlak lomi a lo ko nain a tak ti ahcun ṭih a nung ngaimi hriamnam a rak si. Saphaw hri a sau nawnmi pahnih kha zal hmete he an ṭhit chih, mah cu tuukhal pawl caah a biapi ngaimi hriamnam pakhat a si. Zal chungah lung pakhat an sanh, an kut kha an hler i hri kha fakpi in an vawr tawn. Cun an i tinhnak zawn kha an khen ahcun thih khawh a si. Mah hriamnam hi san a tlaih tuk caah hlanlio ralkap lakah lungherh chehnak a hmangmi phu hmanhin an um tawn.

David cu timhcia a sile cangka a ral sinah a va tli colh. Nelrawn chung i a reomi tiva in lungmil tete panga a char pah in David nih lungtak tein thla a cammi kha na mitthlam ah na cuanter khawh. Mah hnuah raltuknak hmun leiah a tlik in a tli.

Goliath nih David kha a hmuh tikah zeitindah a ruah? “Zeite ah a rel lo; zeicahtiah amah cu misen tertarte, mi chuakthiam ngai, tlangval kate hi a si” tiah Baibal ah kan hmuh. Mah tikah Goliath nih “uico maw ka si i fung he na ka rat hnawh?” tiah a rak au hnawh. David nih aa putmi ṭhiangṭhunh kha Goliath nih fiang tein a hmuh nain lungherh chehnak aa putmi kha cu a hmu rua lo. Filistin mi i an pathian hna chalh in David kha chiat a serh, cun a sa kha van i a zuangmi va hna le vawlei i a ummi saram hna ka pek hna lai tiah a ti.—1 Samuel 17:41-44.

David nih a lehmi bia cu zumhnak langhternak bia in tuchan tiangah hman a si. Mino pate David nih Goliath hitin a au hnawhmi kha na mitthlam ah cuanter hmanh: “Nang nih cun vainam le fei nganpi he na ka chuah hnawh; sihmanhsehlaw kei nih cun ralkapbu Jehovah, Israel ralkapbu hna i an Pathian, na zawmhtaihmi min khan kaan chuah hnawh.” David nih minung ṭhawnnak le hriamnam hna cu a biapi tukmi an si lo ti kha a hngalh. Goliath nih Jehovah Pathian cungah upatnak a langhter lo caah Jehovah nih a lehrulh cang lai. Cucaah David nih “raltuknak cu Jehovah ta a si” tiah a ti.—1 Samuel 17:45-47.

David nih Goliath a pumrua le a hriamnam hna kha a hmuh lomi a si lo. Asinain mah hna ruangah lungdongh kha a duh lo. Saul le a ralkap pawl bantukin  palhnak a tuah lo. David nih amahle amah kha Goliath he aa tahchunh lo. Mah canah Jehovah tu he a tahchunh. Pekua le a cheu a sangmi Goliath cu midang nakin a sang deuh tuk ko nain van le vawlei ah A Lianngan Bikmi he tahchunh tikah zeitluk in dah a ngan khawh lai? Midang bantukin rungrul tluk men a si ko. Mah lengah mah pa kha hrawh awkah Jehovah cu timhcia a si cang.

David nih a ral sin lei a tlik pah in a zal chung i lung pakhat kha a lak. Cun a lungherh chehnak chungah a rawn i fakpi in a vawr lioah Goliath cu David leiah a ra. Goliath pawngah a phaw a kenpiaktu zong a um ve. A tak ti ahcun Goliath a san tukmi hi a caah dawnkhantu a si. A phaw a kengtu cu zaran pumrua a ngeimi lawng a si caah minganpi Goliath i a lu kha huhphenh awkah a tung nih a phan men lai lo. Mah ruangah Goliath a lu kha David nih aa tinhnak a si.—1 Samuel 17:41.

Jehovah Pathian he a tahchunh tikah minganpi hmanh zeihmanh a si lo ti kha David nih a hngalh

David nih aa tinhnak zawn ah a lung in a cheh liote kha na mitthlam ah cuanter hmanh. David nih lungdang in cheh ṭhan awkah a hauh ti nakhnga lo Jehovah nih a tuah. A hmuitinh kha a khen i Goliath calpadar ah lung cu a pil. Mah tikah Goliath cu a bawktakhup in vawlei ah a tlu. Goliath i a phaw a putu pa cu a ṭih tuknak ah rak tlik dawh a si. David nih Goliath cu a tlik hnawh i amah namte lila in a lu cu a tan.—1 Samuel 17:48-51.

A donghnak ah, Saul le a ralkap pawl cu ralṭhatnak an hun ngei. Thangpi in an au i Filistin mi kha an dawi hna. David nih Goliath kha “nannih cu kan kut chungah pek nan si lai” tiah a rak ti bantukin a si taktak.—1 Samuel 17:47, 52, 53.

Mah cu hlanlio ah a rak cangmi thil a si. Tuchan ah Pathian salle cu ral taktak dohnak ah an i tel lo. (Matthai 26:52) Asinain David ngeihmi zumhnak kha kan i zohchunh a hau. David bantukin Jehovah kha a um taktakmi in, amah lawng hi kan biak awk le kan ṭihzah awk a simi in kan hmuh a hau. A caan ah kan tonmi buaibainak hna kha kan tahchunh tikah lungdong in kan um kho, asinain Jehovah i ri a ngei lomi a ṭhawnnak he kan tahchunh ahcun kan tonmi buaibainak hna cu zeihmanh an si lo. Jehovah kha kan Pathian in kan i thim i David bantukin a cungah zumhnak kan ngeih ahcun zei bantuk zuamcawhnak le buaibainak hmanh kan ṭih a hau lo. Jehovah ṭhawnnak nakin a ṭhawng deuhmi zeihmanh a um lo. Cucaah teinak kan hmuh ko lai.