A ummi cazin ah kal

A ummi cazin ah kal

Zungzal Nun Dingin Ser Kan Si

Zungzal Nun Dingin Ser Kan Si

KAN dihlak in saupi in nun le nuam tein nun kan duh. Zawtfahnak ton loin le nuam tein zungzal kan nun khawh ahcun zeitluk in dah a nuamh lai ti kha ruathmanh. Kan dawtmi hna he caan tam deuh kan hmangṭi kho lai i vawlei pumpi ah kan tlawng kho lai. Thiamnak thar hna kan cawn khawh lai i kan fimnak a ṭhangcho lai. Cun cawn kan duhmi thil tampi zong kan cawn khawh lai.

Cutin duhnak kan ngeihmi cu aa tlak lomi a si maw? A si lo. Pathian nih mah duhnak kha kan lungthin chungah a chiah tiah Baibal nih a ti. (Phungchimtu 3:11) Cun Baibal nih “Pathian cu dawtnak” a si ti zongin a ti. (1 Johan 4:8) Zungzal in kan nun khawh lo ding a si ahcun dawtnak Pathian nih zungzal in nun duhnak kha kan lungthin chungah a chia lai maw?

Ahohmanh nih thih kan duh lo. Cucaah Baibal nih thihnak cu kan “ral” a si tiah a ti. (1 Korin 15:26) Kum no tein a thimi an um bantukin kum upat hnuah a thimi zong an um. Ahohmanh thihnak in luat khawh a si lo. Mi tampi nih thihnak kong an ruah tikah an ṭih. Kan ral a simi thihnak hi tei khawh a si lai maw? Mah cu a si kho taktak lai maw?

Ruahchannak A Um

Minung hi thih dingin Pathian nih a kan sermi a si lo ti kha na hngalh ahcun na khuaruah a har ko lai. Minung hi vawleicung ah zungzal nun dingin Pathian nih aa tinhmi a si ti kha Genesis Baibal nih a langhter. Jehovah Pathian nih minung kan um khawh nakhnga vawlei kha ṭha tein a kan serpiak. Cun a hmasa bik mipa Adam kha a ser i paradis tiah auhmi Eden dum ah a umter. Mah hnuah, “Pathian nih a sermi thil vialte cu a zoh i a lung a si ngaingai.”—Genesis 1:26, 31.

Adam cu Pathian muikeng in sermi, mitling a si. (Deuteronomi 32:4) Adam nupi, Evi zong lungthinlei he pumsalei he tlinlonak zeihmanh a ngei lomi a si. Jehovah nih hitin nawl a pek hna: “Tefa tampi in ngei u law nan tefa cu vawleicung khuazakip  ah khat hna seh, cun annih nih vawlei cu uk hna seh. Nannih cu nga cung le va cung le ramlak saram a hme he a ngan he an dihlak cung i nawlngeihnak kaan pek hna.”—Genesis 1:28.

Adam le Evi nih an tefa vawleicung khuazakip ah an khah khawh nakhnga a caan an pek a hau. Pathian tinhnak bantukin vawleicung khuazakip ah mi an khah dih tiang Evi nih fa a hrin lai i a fale zong nih fa an hrin ve lai. (Isaiah 45:18) Jehovah nih Adam le Evi kha zeidah a cang lai ti hngal loin an fale le an tule an hmuh tiang lawng nun dingin a ser hna ahcun cutin nawl a pek hna lai tiah na ruat maw?

Saram pawl uk dingin nawlngeihnak a pekmi hna kong zong hi ruathmanh. Adam cu saram pawl min pek dingin fial a si. Cutin a tuah khawh nakhnga a caan a pek a hau lai. (Genesis 2:19) Saram pawl uk khawh awkah an kong kha a hlathlai a hau. Cun zeitindah zohkhenh ding timi zong a hngalh a hau. Cucaah Adam nih a caan tampi a pek a hau lai.

Pathian nih vawlei khah dih dingin le saram pawl uk dingin nawl a pekmi hna nih hmasa bik minu le mipa cu saupi nun dingin ser an si ti kha a langhter. Adam cu caan saupi an rak nung taktak.

MINUNG CA I PATHIAN TINHNAK CU VAWLEI PARADIS AH ZUNGZAL NUN DING KHA A SI

Saupi A Rak Nungmi Hna

Adam, kum 930

Methuselah, kum 969

Noah, kum 950

Tuchan, kum 70-80

Hlanlio chan i mi pawl cu tuchan i mi pawl nakin an nun a sau deuh ti kha Baibal nih a langhter. Adam cu “kum za kua le sawm thum a si ah a thi” tiah Baibal nih a ti. Kum 900 leng a nungmi minung paruk kong zong a langhter. Annih cu Seth, Enosh, Kenan, Jared, Methuselah le Noah an si. An dihlak in Noah chan i Buanchukcho a tlun hlanah a nungmi an si. Buanchukcho a tlun tikah Noah cu kum 600 a si cang. (Genesis 5:5-27; 7:6; 9:29) Zeicah mah tlukin an nun a sau?

An dihlak in minung mitling an si lio caan he aa naihmi caan ah a nungmi an si caah a si. Mah cu an nun a saunak a ruang a si men lai. Cu a si ah mitling sinak le nun saunak cu zeitindah aa pehtlaih? Thihnak cu zeitindah tei a si lai? A phi hngalh awkah zeicah kan tar i kan thih timi kong kha hngalh hmasa a hau.