A ummi cazin ah kal

A ummi cazin ah kal

Minung cikor remhnak cu nun sau khawh ning lam a si maw?

Nun Saunak An Kawl Ning

Nun Saunak An Kawl Ning

“Pathian nih kan cung i a kan khinhmi rian cu ka hngalh cang. Zeizong vialte hi anmahle an caan te a serpiak cio hna; cun hmailei thil hngalh duhnak kha minung kan lungthin chungah a chiah.”Phungchimtu 3:10, 11.

HLANLIO mifim a simi, Siangpahrang Solomon bia nih nunnak he aa tlaiin minung intuarnak kong kha a hmaan ning tein a langhter. Nunnak cu a tawi i thihnak zong hrial khawh a si lo caah minung nih nun sau duhnak lungthin an rak ngei zungzal. Cucaah mi nih nun sau khawh ning lam an kawlnak kong tuanbia tampi a um.

Tahchunhnak ah, Sumerian siangpahrang Gilgamesh kong hi ruathmanh. A kong he aa tlaiin phuahchommi tuanbia tampi a um. Gilgamesh lungphun ah an ṭialmi biazai ningin thihnak in luat khawh ning kong hlathlai awkah ṭih a nung tukmi khual a rak tlawng. Asinain a hlawh a tling lo.

AD 500 le AD 1500 kar i hneksaknak khaan chung ah mifim pakhat

BC kumzabu pali ah Tuluk ram i mifim (alchemist) hna nih nun saunak sii ser dingin an rak i zuam. Mercury le lungvar siivai an cawhmi sii hang kha an ser. Mah sii ruangah Tuluk siangpahrang tampi an rak thi. AD 500 le AD 1500 kar i Europe i mifim cheukhat nih sui aa telmi sii kha an ser. Zeicahtiah sui cu a rawk kho lo i minung nunnak kha a sauter khawh tiah an ruah caah a si.

Tuchan ah thilnung pawl a hlathlaitu mifim le cikor lei mifim hna nih minung hi zeicah kan tar timi kong hlathlai awkah an i zuam. Mah nih “nun saunak sii” ser awkah aa zuammi hna bantukin annih zong tar le thih an duh lo ti kha a langhter. Asinain a phichuak cu zeidah a si?

PATHIAN NIH “HMAILEI THIL HNGALH DUHNAK KHA MINUNG KAN LUNGTHIN CHUNGAH A CHIAH.”—PHUNGCHIMTU 3:10, 11

Tarnak A Ruang Kawlnak

Minung cell kong a hlathlaimi science lei mifim hna nih kan tar i kan thihnak a ruang kha theory 300 lengin an fianter. Nai kum hna ah minung le saram cell hna ah fawi tein a tarter kho lomi cikor le protein hna kha thilnung pawl a hlathlaitu mifim hna nih an hlathlai khawh. Cucaah “thihnak kong buaibainak” hlathlai awkah minthangmi mirum cheukhat nih tangka an bawmh hna. Zeidah an hmuh?

Nunnak sauter dingin i zuamnak. Telomeres tiah auhmi chromosomes a par lei ah kan tarnak a ruang a um tiah thilnung pawl a hlathlaitu mifim cheukhat nih an zumh. Cell a karh tik paohah telomeres nih cell ah a ummi cikor kha a kilvenpiak. Asinain cell a karh tik paohah telomeres cu a tawi deuh i cell a karh ti lo tikah kan hung tar.

2009 ah Nobel laksawng a hmumi Elizabeth Blackburn le amah he rian a ṭuanṭimi hna nih cell a tarter khotu telomeres tawinak a kham khomi enzyme phunkhat kha an hmuh. Asinain telomeres  cu “nunnak a sautertu a si lo” tiah report ah an langhter.

Tarnak tei khawhnak lam khat cu cell remh ṭhannak thawngin a si. Cell a tar i a karh khawh ti lo tikah a pawngah a ummi, zawtnak a kham khomi cell pawl kha ralrin a pekmi hna a hmaan lo caah phinnak, caan saupi fahnak le zawtnak hna a chuahter. Naiah France ram i science lei mifim hna nih kum 100 leng a simi tar cheukhat pawl i an cell kha an remhpiak ṭhan hna. Cell hna ah “tarnak in noter ṭhannak” kha kan hngalh cang tiah hlathlainak tuahnak i hruaitu a simi Professor Jean-Marc Lemaître nih a thanh.

Science Fimnak Nih Kan Nunnak A Sauter Kho Lai Maw?

Tar lo dingin siithlop ning hna nih minung nunnak a sauter khawh timi he aa tlaiin science lei mifim dihlak nih an cohlang lo. Kumzabu 19 thawkin minung nunnak cu duhsah duhsah in a sau deuh ti cu a hmaan ko. Asinain mah cu pum i thianhhlimhnak, chawnh khawhmi zawtnak kham khawhnak, zawtnak rungrul thahnak sii le i runvennak sii hna ruangah a si. Minung nunnak cu ri a ngei ṭhiamṭhaim ko tiah cikor lei mifim hna nih an zumh.

A luanciami kum 3,500 hrawngah Baibal ṭialtu Moses nih hitin a ti: “Kan chan cu kum sawm sarih a si ko, kan thazaang a ṭhawn deuh le sawm riat a si; cu hmanh ah retheihnak le harnak lawng kha kan ing ko, kan nunnak cu a dih zau i kan lo ko.” (Salm 90:10) Nun sau dingin mi pawl nih an i zuam ko nain Moses nih a chimmi tiang hrawng lawng kan nung hna.

Rili sen ah a ummi, thilnung phunkhat a simi [urchin] asiloah cangkareuh phun cu kum 200 leng an nung kho. Sequoia thungkung cu kum thong tampi a nung kho. Mah he tahchunh ahcun minung ‘nunnak cu kum 70 asiloah kum 80 lawng maw a si?’ tiah kan ruah men lai.