A ummi cazin ah kal

A ummi cazin ah kal

Kan Ral a Simi Thihnak kha Zeitindah Tei Khawh a Si?

Kan Ral a Simi Thihnak kha Zeitindah Tei Khawh a Si?

HMASA bik kan nu le kan pa a simi Adam le Evi nih nawl an ngaih lo caah mi vialte cu misual kan si i kan thi. Asinain minung chungkhar ca i Pathian tinhnak cu aa thleng lo. Aa tinhnak aa thleng lo ti kha a Bia, Baibal ah atu le atu a langhter.

  • “A dingmi cu ram [vawlei, NW] chungah him tein an um lai i ram cu zungzal in anmah ta a si lai.”Salm 37:29.

  • “BAWIPA nih thihnak cu zungzal ca in a hrawh lai. Mi vialte cu an mitthli a hnawh hna lai.”Isaiah 25:8.

  • “Tei hmanung bik ding ral cu thihnak a si.”1 Korin 15:26.

  • “Thihnak a um ti lai lo, ngaihchiatnak le ṭahnak le fahnak zong a um ti lai lo.”Biathlam 21:4.

Pathian nih kan ral a simi thihnak cu zeitindah “zungzal ca in a hrawh lai” i a “tei” lai? Baibal nih “a dingmi cu . . . zungzal in” an nung lai tiah fiang tein a ti. Asinain ‘ṭhatnak a tuah zungzalmi miding pakhat hmanh vawleicung ah hin an um hrimhrim lo’ ti zongin a ti. (Phungchimtu 7:20) Pathian nih thihnak tei awkah a phunglam a hlaw lai maw? A hlaw hrimhrim lai lo. Pathian cu “lih a chim kho lomi” a si caah zeitikhmanh ah cutin a tuah lai lo. (Titas 1:2) A si ah cun minung ca i aa tinhnak tlinter awkah Pathian nih zeidah a tuah lai?

PATHIAN NIH “THIHNAK CU ZUNGZAL CA IN A HRAWH LAI.”—ISAIAH 25:8

Tlanhnak Man thawngin Thihnak Teinak

Pathian nih thihnak in kan luat khawh nakhnga tlanhnak man kha dawtnak in a kan timhpiak. Tlanhnak man timi a hrampi a sullam cu a rawkmi thil rulhnak caah pekmi a man asiloah ding tein a si nakhnga halmi a man he aa tlukmi kha a si. Minung cu misual kan si i thih dantatnak tangah a ummi kan si caah Baibal nih hitin fiang tein a ti: “Minung nih cun zeitikhmanh ah amah le amah aa tlan kho lo; a nunnak man kha Pathian a cham kho lo; zeicahtiah minung nunnak man cu a sung tuk.”—Salm 49:7, 8.

Mitlinglo a simi, mi pakhat a thih tikah amah a sualnak man lawng kha a pek khawh i amahle amah aa tlan kho lo. Cun midang sualnak man zong kha a pekpiak kho hna lo. (Rom 6:7) Amah a sualnak ca si loin kan sualnak ca i a nunnak a pe hngami, sualnak a ngei lomi mitling pakhat kan herh.—Hebru 10:1-4.

Pathian nih cutin a kan tuahpiak. A Fapa, Jesuh kha vancung in vawlei ah a rak thlah i a tlingmi le sualnak a ngei lomi minung in hrin a si. (1 Peter 2:22) “Mi tampi tlanhnak ding ca i ka nunnak pek awkah” ka ra tiah Jesuh nih a ti. (Marka 10:45) Kan ral a simi thihnak kha tei awkah Jesuh cu a thih caah nunnak kan hmu kho.—Johan 3:16.

Thihnak cu Zeitik Ah Dah Tei a si Lai?

Tuchan ah a tlingmi Baibal chimchungbia hna nih “harnak caan” a simi hi chan ṭhalo i “ni hmanung bik” caan ah kan nung ti kha a langhter. (2 Timote 3:1) Ni hmanung bik cu “Pathian zei i a rel lomi hna an biaceih a si ni le hrawh an si ni” ah a dong lai. (2 Peter 3:3, 7) Asinain Pathian a dawmi hna cu hrawhnak in an luat lai i “zungzal nunnak” thluachuah an hmu lai.—Matthai 25:46.

Jesuh cu ‘mi tampi tlanhnak ding ca i a nunnak pek awkah’ a ra.—Marka 10:45

Mi nuai tampi cu an thawh ṭhan tikah zungzal nun awkah a ruang nṭha an ngei lai. Jesuh nih Nain khua a tlawn lioah mithi a rak thawhter. Nuhmeinu nih fapa fangkhat te lawng a ngeihmi cu a thi. Jesuh nih “a zaang a fak ngaingai” caah a nunter  ṭhan. (Luka 7:11-15) Lamkaltu Paul nih hiti zongin a ti: “Minung hi miṭha he miṭhalo he thihnak in kan tho ṭhan dih lai, ti hi kaa ruahchanmi a si ve.” Mah a fiangmi ruahchannak cu Pathian nih minung a kan dawt ti a langhtertu a si.—Lamkaltu 24:15.

Mi nuai tampi nih zungzal nun dingin an i ruahchan kho. Baibal nih hitin a ti: “A dingmi cu ram [vawlei, NW] chungah him tein an um lai i ram cu zungzal in anmah ta a si lai.” (Salm 37:29) Mah tikah a luanciami kum 2,000 lio hrawngah lamkaltu Paul nih a ṭialmi bia a tlinmi kha anmah theng nih an hmuh lai. Hitin a ti: “Thihnak, na mi teinak cu khuazei ah dah a um? Thihnak mi fahnak na pek khawhnak hmual cu khuazei ah dah a um?” (1 Korin 15:55) Minung caah ṭihnung ngai a simi kan ral, thihnak cu tei a si cang lai.