A ummi cazin ah kal

A ummi cazin ah kal

Ahohmanh Thihnak In Luat Khawh A Si Lo

Ahohmanh Thihnak In Luat Khawh A Si Lo

NA UARMI le a min a thangmi, music tum a thiammi pakhat kong video ka zoh tiah na mitthlam ah cuanter hmanh. Video cu a ngakchiat lio kong, music tum a cawnnak kong le atu le atu a cawnnak kong in aa thawk. Cun ram tampi ah a kal i music a tummi le vawleicung pumpi ah minthangmi a hung sinak kong hna kha na hmuh. Asinain tlawmpal ah a hung tar i a thihnak in video cu a dong.

Mah video cu phuah chommi a si lo. A taktak a simi, a thi cangmi pakhat kong a si. Music tum a thiammi a si ah, science lei mifim a si ah, lentecelh a thiammi asiloah a dang minthangmi a si ah an tuanbia cu a huap in aa lo ko. Mi pakhat cu hlawhtlinnak tampi a hmu men lai, asinain a tar i a thih lo ahcun zeitluk in dah hlawhtlinnak a hmuh chinchin lai?

Ngaihchiat awk ngai a si ko nain mah cu ahopaoh nih kan ton dingmi a si. (Phungchimtu 9:5) Zeitluk in kan i zuam hmanhah kum upatnak le thihnak in luat khawh a si lo. Mah lengah accident asiloah zawtnak ruang zongah tuan tein kan thi kho. Baibal ah a chim bantukin kannih cu “minmei zaammi bantuk, atu te a hung um i a lo zaumi bantuk” kha kan si.—Jeim 4:14.

Zeitik caan paohah a thi khomi kan si caah mi pawl cu “thaizing ah pei kan thih ko lai cu, ei in ding ko ngat u sih” timi ruahnak an ngei. (1 Korin 15:32) Zeitik caan paohah kan thi kho ti kha an hngalh ca le hmailei ruahchannak an ngeih lo caah mi pawl cu cu bantuk lam in an nung. Caan khatkhat ah, a hleiin harnak ton tikah mi pakhat nih ‘nunnak hi mah vial lawng maw a si?’ tiah biahalnak a tuah men lai. Mah a phi cu khoika ah dah hmuh khawh a si?

Tuchan ah mi tampi nih science lei fimnak kha an i bochan. Science le sii lei fimnak ṭhanchonak ruangah minung nunnak a sauter deuh khomi lam hna kha an hmuh. Science lei mifim cheukhat nih cun kan nunnak sauter deuh awkah fakpi in an i zuam. Zeitluk in an i zuam hmanhah mah biahalnak hna i a phi cu an hngal kho rih lo: Zeicah kan tar i kan thih? Kan ral thihnak hi tei khawh a si lai timi ruahchannak a um maw? Mah kong hna kha a hnu capar ah a fianter lai. Cun nunnak hi mah vial lawng maw a si? timi biahalnak a phi zong a langhter lai.