A ummi cazin ah kal

A ummi cazin ah kal

Pathian Pennak Nih Zeitikah Dah Vawlei A Uk Lai?

Pathian Pennak Nih Zeitikah Dah Vawlei A Uk Lai?

Jesuh i zumhfekmi a zultu cheukhat nih Pathian Pennak nih zeitikah dah uk hram a thawk lai ti kha hngalh an rak duh. Jesuh nih Pathian Pennak nih zeitikah dah a uk lai ti cu fiang tein nan hngalh a hau lo tiah a rak leh hna. (Lamkaltu 1:6, 7) Asinain a hmasa ah a chimh cang hna bantukin caan khatte ah mah thil hna a canmi nan hmuh tikah “Pathian Pennak cu a nai cang” ti le Pathian Pennak nih vawlei uk hram a thawk cang ti kha nan hngalh lai tiah a ti hna.—Luka 21:31.

Jesuh Nih Zei Thil Dah A Cang Lai Tiah A Chim?

Jesuh nih hitin a ti: “Ram pakhat le pakhat an i do lai, cozah pakhat le pakhat an i tu lai; hmun kip ah ṭih a nungmi lihnin le mangṭam le ngal-eu zawtnak a tlung lai.” (Luka 21:10, 11) Mah thil hna hmunkhat ah an canmi cu a fiangmi hmelchunhnak a si lai. Cun mah thil hna hmunkhat ah an can dih tikah “Pathian Pennak cu a nai cang” ti kha fiang tein kan hngalh lai. Caankhat te ah vawleicung pumpi ah cu bantuk thil hna cu a cang lai maw? Mah langhtertu thil hna hi ruathmanh.

1. Raltuknak

1914 ah, minung tuanbia ah a um bal lomi raldohnak a rak um. Mah kum cu vawlei ralpi aa thawk hmasa bik caan a si caah tuanbialei mifim pawl nih thlennak kum in an langhter. Mah raldohnak chungah raltuknak ṭheng, vanlawng cungin thlakmi bomb [aerial bomb], seh meithal le siivai a ngeimi gas hna kha a hlan nakin tampi an rak hman. Ralpi pahnihnak ah atomic hriamnam hna kha an ser i a hmasa bik ah an rak hman. 1914 thawkin vawleicung khua zakip ah ral an i do i mi nuai tampi cu an rak thi.

2. Lihnin

Britannica Academic cauk nih “inn le lo a hrawk dihmi” lihninhnak cu kum fatin voi 100 hrawng aa hnin tiah a ti. Cun United States Geological Survey nih “tuanbia hlun ningin (1900 thawkin) kum fatin vio 16 hrawng li aa hnin” tiah an ti. Mi cheukhat nih li tampi aa hnih hmanhah ṭha deuh in an tawnghtham khawh ko lai tiah an ruah. Asinain thazaang a ṭhawngmi lihinhnak nih vawleicung pumpi ah mi tampi kha hlanah an ton bal lomi sifah harnak le thihnak a tonter hna.

3. Mangṭam

Mangṭam a tlunnak a ruang cu raldohnak, ziaza rawhralnak, chawlehnak harnak, cinthlak ning thiam lonak asiloah khua caan ṭhat lo ruang i cinthlaknak a har ruangah a si. Vawlei Rawl Tlaitu Bu nih “2018 ah minung nuai 821 cu rawl ei awk a za in an ngei lo i nuai 124 cu rawl loin an um” tiah an ti. Vitamin chambau ruangah ngakchia nuai 3.1 cu kum fatin an thi. Mah ruangah 2011 ah vawleicung pumpi ngakchia zatuak in 45 hrawng an thi.

4. Zawtnak Le Chawnh Khawhmi Zawtnak

Vawlei Pumpi Ngandamnak Phu nih hitin an ti: “Kumzabu 21 ah chawnh khawhmi zawtnak cu a karh tuk. Ngaleu zawtnak, palek zawtnak (plague) le tak aihret zawtnak hna cu zawtnak hlun pawl an si i SARS, tlangrai zawtnak, MERS, Ebola le Zika zawtnak hna cu zawtnak thar an si.” Scientist pawl le siibawi pawl nih zawtnak kong he aa tlaiin hlathlainak tampi an tuah ko nain zawtnak vialte kha an damter kho lo.

5. Vawleicung Pumpi Phungchimnak Rian

Jesuh nih a dang hmelchunhnak pakhat kong zong kha hitin a chimchung: “Miphun vialte hna ca i tehte si awkah Vancung Pennak kong Thawngṭha hi khuazakip ah chim a si lai, cun cu hnu lawngah cun donghnak cu a si lai.” (Matthai 24:14) Mi nih hi vawlei ah ṭih a nungmi buaibainak hna tampi an ton lioah mi nuai riat leng nih ram 240 ah holhphun 1,000 lengin mi vialte sinah Pathian Pennak kong thawngṭha kha an chim. Mah cu minung tuanbia ah a um bal lomi a si.

 Mah Hmelchunhnak Cu Kan Caah Zei Sullam Dah A Ngeih?

Jesuh chimmi hmelchunhnak hna cu tuchan ah a tling thluahmah ti cu a fiang ko. Zeicah mah kong kha hngalh kan duh awk a si? Zeicahtiah Jesuh nih hitin a ti: “Hi thil hna an hung um kha nan hmuh tikah Pathian Pennak cu a nai cang ti kha nan hngalh lai.”—Luka 21:31.

A rauhhlan ah Pennak nih vawlei ah Pathian duhnak kha a tlinter cang lai

Jesuh chimmi hmelchunhnak hna le Baibal cungah hrambunh in kan tuaktannak thawngin 1914 ah vancung ah Pathian nih Pennak a dirh cang ti kha kan hngalh khawh. * Mah caan ah Pathian nih a Fapa Jesuh Khrih kha Siangpahrang in rian a pek. (Salm 2:2, 4, 6-9) Pathian Pennak nih a rauhhlan ah vawlei a uk cang lai, cun a dang cozah vialte kha a hrawh dih hna lai i zungzal in kan nun khawh nakhnga vawlei kha paradis ah a ser lai.

A ruahhlan ah Jesuh nih a kan cawnpiakmi Bawipa thlacamnak ah kan cammi mah bia hi a tling cang lai: “Na Pennak cu rung tlung ko seh, Vancung khua ah na duhnak an tuah bangin vawleicung ah hin tuah si ve ko seh.” (Matthai 6:10) Asinain 1914 thawkin Pennak nih zeidah a tuah cang? Pennak nih minung uknak vialte a hrawh dih tikah zeidah kan i ruahchan khawh?

^ cat. 17 1914 kong he aa tlaiin a dihthliar in hngalh awkah Jehovah Tehte Hna nih an chuahmi Baibal Nih Zeidah A Kan Cawnpiak? timi cauk, a donghnak i fianternak 22, cahmai 217-220 ah zoh.