A ummi cazin ah kal

A ummi cazin ah kal

Innchunghawi Zumhawktlak loin a Um tikah

Innchunghawi Zumhawktlak loin a Um tikah

“Ka vapa nih nupi dang ka ṭhit lai tiah a ka ti tikah thih hmanh ka duh deuh. Mah vialte cu a ding lomi a lo, a hleiin a caah mahca ṭhatnak ka hlawtmi kong ka ruah tikah a si.” —Maria, Spain.

“Ruahlopi in ka nupi nih a ka kaltak tikah ka pum cheubang a thimi a lo. Kan saduhthah, kan i ruahchanhnak le kan hmuitinh cu a rawk dih. Lungretheihnak in ka luat tiah ka ruah caan a um ko nain hnulei kong ka ruah tikah ka lungre a thei tuk ṭhan.”—Bill, Spain.

MI PAKHAT cu a innchunghawi zumhawktlak loin a um tikah a lung a fak tuk. Mi cheukhat nih aa ngaichihmi an innchunghawi kha an ngaihthiam hna i pehtlaihnak ṭha ngeih ṭhan awkah an i zuam ti cu a hmaan ko. * Asinain an ngaihthiam hna zong, ngaihthiam hna lo zongah innchunghawi zumhawktlak loin umnak a tongmi hna nih an tonmi lungfahnak tu cu zungzal in a hmun. Cubantuk mi hna nih an lungfahnak kha zeitindah an tawnghtham khawh?

Aan Bawm Khomi Baibal Caang Hna

Sualnak a ngei lomi innchunghawi tampi cu an ngaih a chia tuk ko nain Baibal in hnemhnak an hmu. An lungfahnak le an mitthli kha Pathian nih a hmuh ti kha an hngalh.—Malakhi 2:13-16.

“Khuaruahhar vansang au in ka um tikah na ka hnemh i ka lung na ka lawmhter.”Salm 94:19.

Bill nih hitin a ti: “Mah Baibal caang ka rel tikah zaangfahnak a ngeimi pa bantukin Jehovah nih ka lungfahnak kha a ka hnemh tiah ka mitthlam ah ka cuanter.”

“Nang cu zumhawktlak a simi sinah zumhawktlak in na um ve.”Salm 18:25.

Thla tampi chung a vapa zumhawktlak loin a ummi Carmen nih hitin a ti: “Ka vapa cu ka cungah zumhawktlak loin a um. Asinain Jehovah cu ka cungah zumhawktlak tein a um lai ti kha ka zumh khawh. Zeitikhmanh ah a ka kaltak bal lai lo.”

“Zeithil kong hmanhah lungrethei in um hlah u. Thla nan camnak ah Bawipa cu nan herhmi kha hal u . . . Cun Pathian daihnak, minung hngalhnak a lonhtu nih cun, . . . nan lungthin le nan ruahnak cu him tein a chiah lai.”Filipi 4:6, 7.

Sasha nih hitin a ti: “Mah Baibal caang kha atu le atu ka rel. Voi tampi thla ka cam caah Pathian nih daihnak a ka pek.”

A cunglei ah langhtermi hna cu a caan ah an lung a dong. Asinain Jehovah Pathian kha an i bochan i Baibal in thazaang an i lak. Bill nih hitin a ti: “Zeizong vialte cu a rawk dihmi a lawh hmanhah ka zumhnak nih ka nunnak cu sullam a ngeihter. ‘A thuk bikmi muihnak chung’ ka kal caan hmanhah Pathian cu ka sinah a um.”—Salm 23:4.

^ cat. 4 Ngaihthiam awk a si maw, si lo timi kong he aa tlaiin 2001, August 8, I Hlau! [Kawl] chung i “Innchunghawi Zumhawktlak loin a Um tikah” timi capar i cahmai 3, 5 le 9 ah zoh.