A ummi cazin ah kal

A ummi cazin ah kal

A Zual Tukmi Zawtnak Ngeih Tikah

A Zual Tukmi Zawtnak Ngeih Tikah

“Ka cuap le ka pawpi cancer a si ti ka hngalh tikah ka thi cang lai tiah ka ruah. Asinain inn ka ṭin hnuah hitin ka ruah: ‘Mah hi kaa ruahchanmi a si lo, asinain mah thil sining hi inkhawh awkah kaa zuam a hau.’”—Linda, kum 71.

“A zual tukmi zawtnak ka ngei, mah nih ka hmai kehlei thari kha a hnorsuan. A caan ah a fah tuk caah lung dongh zawtnak ka hun ngei. Ka li a leng i voi tampi mahle mah i thah ding hmanhin ka ruat.”—Elise, kum 49.

NANGMAH asiloah na dawtmi pakhatkhat nih nunnak caah ṭih a nungmi zawtnak nan ngeih ahcun nan lungre a thei tuk lai ti cu a fiang ko. Zawtnak lawng si loin mah nih thintawinak, lungretheihnak hna zong aan ngeihter khawh. Siithlopnak he aa tlaiin ṭihnak ngeih ruang, sii thlop awkah harnak a um ruang asiloah siithlopnak ah a phichuak a ṭhat lo ruangah ṭihnak le lungretheihnak cu a zual kho. Lungretheih tuknak nih zawtnak kha a zualter khawh.

Khoika in dah bawmhnak kan hmuh khawh? Mi tampi cu Pathian sinah thla an camnak thawngin le hnemhnak a pemi Baibal caang an relnak thawngin hnemhnak taktak an hmu. Cun chungkhar le hawikom sinin hmuhmi dawtnak le bawmhnak thawng zongin hnemhnak an hmu men lai.

 Tawnghtham Khawh Ning Lam Cheukhat

Kum 58 a simi Robert nih hitin a ti: “Na zawt tikah Pathian cungah zumhnak ngei law na zawtnak kha innkhawh awkah aan bawmh lai. Jehovah sinah thla cam law na intuarnak kha chim. Thiang thlarau bawmhnak hal. Chungkhar thazaang a pe khomi, a ṭhatnaklei in hmuhnak a ngeimi le zawtnak inkhawh awkah lungdaihnak a ngeimi si awkah ka bawm ko tiah Pathian sinah thlacam.”

“Na chungkhar nih lungthinlei in an in bawmh tikah mah cu na caah bawmtu taktak a si. Nifate ka chungkharmi pakhat asiloah pahnih nih ‘na dam maw?’ tiah phone an ka chawnh. Hmundang ah a ummi ka hawilei sin zongin thazaang peknak ka hmu. Thazaang an ka ngeihter i lungdongh lo awkah an ka bawmh.”

A zawmi na hawi pakhatkhat sin na len tikah Linda chimmi hi i cinken: “A zawmi hna nih a si khawh ahcun a hmasa an nunning kha hmuhṭhan an duh i an zawtnak kong chim zungzal kha an duh lai lo ti cu a fiang ko. Cucaah na chim tawnmi kong kha chim.”

A zual tukmi zawtnak kan ngeih hmanhah Pathian sinin hmuhmi thazaang, Baibal in hmuhmi hnemhnak, chungkhar le hawikom sinin hmuhmi bawmhnak thawngin nun man cu a phu ko ti kha kan zumh khawh.