A ummi cazin ah kal

A ummi cazin ah kal

Pathian Le Khrih Kong Biatak

Pathian Le Khrih Kong Biatak

Mi nih pathian tampi an biak ko hna nain a hmaanmi Pathian cu pakhat lawng a um. (Johan 17:3) Anih cu “Cungnung Bik,” zeizong vialte Sertu le nunnak vialte Hram a si. Amah lawng kan sinin biaknak hmuh awkah aa tlakmi a si. —Daniel 7:18; Biathlam 4:11.

Pathian Cu Ahodah A Si?

VOI 7,000 HRAWNG a hramthawk Baibal ah Pathian min kha langhter a si

JEHOVAH cu Pathian min a si

BAWIPA, PATHIAN, PA​—Jehovah upatnak min cheukhat

Pathian Min Cu Ahodah A Si? Pathian theng nih “Keimah lawnglawng hi BAWIPA [Jehovah, NW] na Pathian cu ka si” tiah a ti. (Isaiah 42:8) A hramthawk Baibal ah Pathian min voi 7,000 hrawng a um. Asinain Baibal lehnak tampi ah Jehovah timi min kha “Bawipa” ti bantuk upatnak min in an airolh. Pathian nih a hawi siter aan duh, cucaah ‘a min in auh’ awkah aan sawm.—1 Chanrelnak 16:8.

Jehovah Upatnak Min Hna. Baibal nih Jehovah kha “Pathian,” “Lianngan Bik,” “Sertu,” “Pa,” “Bawipa” le “Cungnung Bik” ti bantuk upatnak min in a langhter. Baibal ah langhtermi thlacamnak tampi ah Jehovah kha upatnak min in an rak auh.—Daniel 9:4.

 Pathian Muisam. Pathian cu hmuh khawh lomi thlarau a si. (Johan 4:24) Baibal nih “ahohmanh nih Pathian cu an hmu bal lo” tiah a ti. (Johan 1:18) Baibal nih Pathian intuarnak kong kha a langhter. Mi nih Pathian kha a ngaih an chiatter khawh asiloah a lung an ‘lawmhter’ khawh.—Phungthlukbia 11:20; Salm 78:40, 41.

Khuaruahhar A Simi Pathian Sining Hna. Pathian nih miphun le hnulei sining aa lo lomi, mi vialte kha aa ruang tein a zoh hna. (Lamkaltu 10:34, 35) Cun anih cu “zaangfahnak le velngeihnak in a khatmi Pathian a si, amah cu fawite in a thin hunter khawh lomi, a fekmi dawtnak tampi mi cungah a langhter i mi cungah zumhawk tlak ngaingai” a si. (Exodus 34:6, 7) Asinain a hleiin duh a nung tukmi Pathian sining pali a um.

Ṭhawnnak. Pathian cu “Lianngan Bik Pathian” a si caah a biakam vialte tlinter khawh awkah ri a ngei lomi ṭhawnnak a ngei.—Genesis 17:1.

Fimnak. Pathian fimnak cu ahohmanh nih an tluk kho lo. Cucaah Baibal nih amah “lawnglawng zeizong vialte a hngal dihtu a si” tiah a ti.—Rom 16:27.

Dinnak. Pathian nih a hmaanmi thil kha a tuah zungzal. A tuahmi thil cu “a tling” i “ṭhatlonak ngeilo” Pathian a si.—Deuteronomi 32:4.

Dawtnak. Baibal nih “Pathian cu dawtnak a si” tiah a ti. (1 Johan 4:8) Pathian nih dawtnak a langhter lawng si loin amah theng dawtnak a si. A sung khunmi a dawtnak cu a tuahmi thil vialte cungah huham a ngei i lam tampi in ṭhatnak a kan pek.

Pathian Le Minung An I Hawikomhnak. Pathian cu dawtnak a ngeimi vancung kan Pa a si. (Matthai 6:9) Pathian kan zumh ahcun a hawi kan si kho. (Salm 25:14) Pathian nih thlacamnak in amah naih awk le ‘amah nih aan zohkhenh caah na lungretheihnak vialte kha amah cungah chiah dih’ dingin aan sawm.—1 Peter 5:7; Jeim 4:8.

Pathian le Khrih An i Dannak cu Zeidah a Si?

Jesuh Le Pathian Cu An I Khat Lo. Jesuh cu Pathian nih a sermi a si caah Pathian he an i khat tiah ruah cu a si kho lomi a si. Asinain Jesuh cu aa theidang tukmi a si, amah lawnglawng kha Pathian nih direct in a sermi a si. Cucaah Baibal nih Pathian Fapa tiah a auh. (Johan 1:14) Jesuh a ser hnuah Jehovah nih a fater kha thil dang vialte sernak ah “rian thiam ngaimi” pakhat in a rak hman.—Phungthlukbia 8:30, 31; Kolose 1:15, 16.

 Jesuh Khrih nih Pathian ka si tiah a chim bal lo. Mah canah ‘kei cu [Pathian] sinin a rami ka si i a ka thlahtu cu amah kha a si’ tiah a ti. (Johan 7:29) A zultu pakhat sin bia a chim lioah Jesuh nih Jehovah kha “Ka Pa le nan Pa, ka Pathian le nan Pathian” tiah a auh. (Johan 20:17) Jesuh cu a thih hnuah Jehovah nih vancung nunnak in a thawhter ṭhan, cun a orhlei kam ah a ṭhutter i nawlngeihnak vialte kha a pek.—Matthai 28:18; Lamkaltu 2:32, 33.

Jesuh Khrih nih Pathian Naih awkah Aan Bawmh Khawh

Jesuh cu a Pa kong cawnpiak awkah vawlei ah a ra. Jehovah theng nih Jesuh kong he aa tlaiin hitin a ti: “Hihi ka dawtmi ka Fapa a si, a bia kha ngai u.” (Marka 9:7) Jesuh nih Pathian kong kha aho nakhmanh in a hngalh deuh. Hitin a ti: “Fapa le an sinah Fapa nih Pa a phuan duhmi hna dah ti lo nih cun Pa kha ahodah a si ti awk ahohmanh nih an hngal lo.”—Luka 10:22.

Jesuh nih Pathian Sining Hna kha Tling tein a Langhter. Jesuh nih a Pa sining hna kha naih tein aa zohchunh caah hitin a chim khawh: “Keimah a ka hmutu paoh nih cun ka Pa kha an hmuh ve ko.” (Johan 14:9) Jesuh nih a Pa dawtnak kha a biachim le a tuahsernak in a langhternak thawngin mi pawl kha Pathian sinah a hnuh hna. Hitin a ti: “Lam le biatak le nunnak cu keimah hi ka si; keimah sinin ti dah lo cun ahohmanh Pa sin an phan kho lo.” (Johan 14:6) Hiti zongin a ti: “Pathian a bia taktakmi nih cun thlarau le biatak in an biak . . . Hi bantukin a biami hna hi Pa nih a duhmi cu an si.” (Johan 4:23) Jehovah nih nangmah bantukin amah kong biatak hngalh a duhmi kha a kawl hna tiah na mitthlam ah cuanter hmanh.