A ummi cazin ah kal

A ummi cazin ah kal

1 Buaibainak Hrial Awkah A Kan Bawmh

1 Buaibainak Hrial Awkah A Kan Bawmh

Baibal cu Pathian thiang thlarau lamhruainak thawngin ṭialmi a si caah “biatak cawnpiaknak caah le palhnak cawnpiaknak alnak caah le palhmi remhnak caah . . . a ṭhahnemmi a si.” (2 Timote 3:16) Mah cu a hmaan maw? Thil sining a chiat tuk hlanah an tonmi buaibainak hrial khawh awkah Baibal ruahnak cheuhnak nih a bawmhmi hna kong kha zohhmanh u sih.

ZU TAM TUK DINNAK

A hmasa capar ah langhtermi Delphine cu a lungretheihnak ruangah zu tampi a hung ding. Baibal nih zu tlawmpal din cu sual a phaw lo nain “zuri hna he i kom hlah” tiah a ti. (Phungthlukbia 23:20) Zu tam tuk din ruangah ngandamnak a hnorsuan, chungkhar a ṭhencheuter i kum fatin mi nuai tampi cu thih cu loin an thi. Baibal ruahnak cheuhnak zulhnak thawngin cu bantuk buaibainak hna kha hrial khawh a si.

Delphine nih cutin a rak tuah. Hitin a chim: “Zu nih ka lungre theihnak kha a hlo kho hlei lo. Filipi 4:6, 7, ah ‘zeithil kong hmanhah lungrethei in um hlah u. Thla nan camnak ah Bawipa cu nan herhmi kha hal u’ timi ruahnak cheuhnak kha ka zulh. Zan kaa hngilh khawh lo caan ah khua ka ruat i ka lungre a theih tikah Jehovah sinah thla ka cam. Ka thinhunnak, ka lungfahnak, ka lungdonghnak ti bantuk ka intuarnak vialte kha Jehovah sinah ka phuan i a ṭhami lungput ngeih awkah ka bawm tiah ka nawl. Khua a hun dei tikah mah ka lungretheihnak vialte kha ka ruat ṭhan ti lo. Ka ngeih lomi kha si loin ka ngeihmi tu ah lungthin ka hun pek. Zu kha zeitikhmanh ah ka ding ṭhan ti lo. Atu cu lungdaihnak ka hmu cang i mah hi sungh ka duh lo.”

 ZIAZA RAWHRALNAK

Ziaza rawhralnak ruangah lungretheihnak a tongmi an tampi. Asinain Baibal phunglam nih ziaza rawhralnaklei a kalpi khotu velhle dawtnak langhternak, a thurhnawmmi hmanthlak zohnak ti bantuk hrial awkah a kan bawmh khawh. Samuel timi mino pakhat nih hitin a ti: “Velhle dawtnak langhter cu a fawi tuk. Keimahlei in cun ka duh lo nain amahlei in duhnak a langhter caah velhle dawtnak ka langhter ve.” Samuel nih velhle dawtnak a langhter ti lo hnu hmanhah a langhter tiin a min a chuak. Cucaah a hnuah cun hramhram in velhle dawtnak a langhter. Asinain mah nih hnahnawhnak a pek. Samuel nih “cutin tuah cu mahzawn lawng i ruah a si caah ṭih a nung tuk” tiah a ti.

Samuel nih jw.org website i mino caah taarmi capar pakhat kha a rel. Phungthlukbia 20:11 chung i “ngakchia hmanh nih a tuahmi a ṭhat le a din kha a tuahnak in amah lila nih a langhter ko” timi kong kha a ruah. Mah nih zeitindah a bawmh? Samuel nih velhle dawtnak langhter cu a ṭha lo ti kha a hun hngalh. Hitin a ti: “Velhle dawtnak a langhtermi mino pakhat cu innchunghawi ṭha a si kho lo ti kha ka hun hngalh. Nudang sinah velhle dawtnak ka langhtermi kha ka innchunghawi a si dingmi nih a hmuh tikah zeitindah a um lai ti kha ka ruat. Mah nih cu bantuk zia ṭih a nunning kha a ka hngalhter. Velhle dawtnak langhter cu a fawi tuk ko nain a hmaanmi tuahserhnak a si lo.” Atu ah Samuel cu aa thleng cang. Velhle dawtnak a langhter ti lo caah ziaza rawhralnak kha a hrial khawh.

Antonio cu ziaza rawhral dingin a fawi deuhmi sining ah a um: Mah cu a thurhnawmmi hmanthlak zoh nih a lem caah a si. A duhmi nu he an i um ko nain mah a zia kha a thlau kho lo. 1 Peter 5:8 i “fim hring tein um u, ralring tein um u! Nan ral Khuachia cu, seh awk kawl ah, chiandeih bangin a vak cuahmah ko” timi bia ruahnak nih a ka bawmh tiah a ti. Antonio nih hitin a ti: “A thurhnawmmi hmanthlak cu a kakip ah zoh khawh a si i mah hmanthlak cu lungthin chungah a caam kho. Lemsoinak aa thawknak kha ruah awkah mah Baibal caang nih a ka bawmh. A thurhnawmmi hmanthlak cu Khuachia sinin a rami a si ti kha ka hngalh colh. Ka ruahnak, ka thinlung le ka innchungkhar a hnorsuangmi thil hna doh khawh awkah ‘fim hring te le ralring tein’ um awkah Jehovah lawng nih a ka bawmh khawh ti kha atu cu ka hngalh cang.” Antonio nih a herhmi bawmhnak kha a hmuh caah a ṭhalomi a zia kha a hlawt khawh. Mah nakin a chia deuhmi thil sining hmanh kha a hrial khawh.

Baibal ruahnak cheuhnak nih a nganmi buaibainak hna hrial awkah a kan bawmh khawh ti cu a fiang ko. Asinain a hram aa sih cangmi buaibainak hna tah zeitin? Cu bantuk buaibainak hna tawnghtham khawh awkah Baibal nih a kan bawmh khawhning kha zohhmanh u sih.

Baibal ruahnak cheuhnak nih buaibainak cheukhat kha hrial awkah a kan bawmh khawh