A ummi cazin ah kal

A ummi cazin ah kal

Pathian Mithmai Ṭha A Hmu Kho

Pathian Mithmai Ṭha A Hmu Kho

JEHOVAH kha kan biak i a mithmai ṭha le a thluachuah hmuh kan duh. Asinain zeitindah Pathian mithmai ṭha cu kan hmuh khawh? Baibal chan ah sualnak ngan a rak tuahmi mi cheukhat cu a hnuah Pathian mithmai ṭha an hmu ṭhan. Cheukhat tu cu sining ṭha an ngei ko nain a hnuah Pathian mithmai ṭha an sung. Cucaah “Jehovah nih kan sinin zeidah a zoh?” tiah kan i hal men lai. A phi hngalh awkah Judah siangpahrang Rehoboam kong nih a kan bawmh khawh.

Ṭhatlonak Aa Thawk

Rehoboam a pa, Solomon cu kum 40 chung Israel siangpahrang a ṭuan. (1 Si. 11:42) A pa a thih tikah siangpahrang si dingin Rehoboam cu Jerusalem in Shekem lei ah a kal. (2 Chan. 10:1) Siangpahrang ṭuan lai kha a ṭih maw? Solomon cu a fimnak ruangah a min a thangmi a si. A rauhhlan ah Rehoboam nih a harmi buaibainak hna tawnghtham awkah fimnak a za in a ngeih le ngeih lo kha a langhter cang lai.

Israel mi nih namneh kan si tiah an ruah caah Rehoboam kha tuahter an duhmi kong va chimh awkah aiawhtu kha an thlah hna. Hitin an ti: “Na pa nih kan seihnam cu a rihter. Cucaah nang nih cun na pa nih kan cungah rian har le seihnam rit a kan khinhmi cu zaanter law na rian kan ṭuan lai.”—2 Chan. 10:3, 4.

Rehoboam cu a harmi thimnak tuah awk a ngei. Mi nih tuahter an duhmi kha a tuah ahcun amah le a chungkhar, cun siangpahrang inn ah a ummi hna nih an hmuh tawnmi nunnuamhnak cheukhat kha an hmu ti men lai lo. Asinain an duhnak kha a zulh hna lo ahcun an ralchanh lai. Mah tikah zeidah a tuah? A pa a rak bawm tawnmi, kum upa pawl kha ruahnak a hal hmasa hna. Annih nih mi pawl duhnak zulh awkah ruahnak an cheuh. Asinain Rehoboam nih a ṭhikhat pawl kha ruahnak a hal hna i a mi pawl kha hrem awkah bia a khiah. Hitin a ti hna: “Ka pa nih nan seihnam cu a rak rihter ko, sihmanhsehlaw nan seihnam ka rihter chin lai; ka pa nih fungfek in aan chimhhrin hna, sihmanhsehlaw kei nih cun tlang ngaikuang in kaan chimhhrin hna lai.”—2 Chan. 10:6-14.

Mah in zeidah kan i cawn khawh ti kha na hngal maw? Tuchan ah kum tampi chung Jehovah a biami le a ṭhami biakhiahnak tuah awkah a kan bawm khomi kum upa tampi an um. An chimmi kha ngai law fimnak i lak.—Job 12:12.

“BAWIPA Bia Cu An Ngaih”

Rehoboam nih amah a ralchanhmi miphun pawl doh awkah a ralkap pawl kha a khawmh hna. Asinain Jehovah nih profet Shemaiah kha a thlah i hitin a ti:  “Nan hung kal awk a si lai lo i nan unau Israel mi cu a doh zong nan hung do hna lai lo. Hi thil cu keimah sinin a rami a si caah nan inn cio ah kir dih u.”—1 Si. 12:21-24. *

Rehoboam caah Jehovah nawlngaih cu a fawi maw? Mi nih an siangpahrang thar kha zeitindah an hmuh? Rehoboam nih “tlang ngaikuang in” dan kaan tat hna lai tiah a ti hna nain ralchanhnak ruangah atu cu zeihmanh a tuah kho lo. (2 Chanrelnak 13:7 he tahchunh.) Mi nih zeitin an hmuh hmanhah siangpahrang le a ralkap hna nih “BAWIPA bia cu an ngaih i BAWIPA bia bangin an inn cio ah an kir ṭhan.”

Mah in zeidah kan cawn khawh? Mi nih an kan nihsawh hmanhah Pathian nawlngaih cu fim a si ti kha a si. A nawl kan ngaih ahcun Pathian nih thluachuah a kan pek zungzal lai.—Deut. 28:2.

Rehoboam cu a nawlngaihnak ruangah thluachuah a hmu maw? Rehoboam cu Judah le Benjamin miphun i siangpahrang a si rih i khua thar sak awkah bia a khiah. Khuapi cheukhat zong kha “khua fek ngaingai ah a ser hna.” (2 Chan. 11:5-12) A biapi deuhmi cu caan caankhat chung Jehovah nawlbia kha a zulh. Phunhra pennak i mi hna nih siasal an hun biak caah mi tampi cu Rehoboam le a hmaanmi biaknak bawmh awkah Jerusalem ah an kal. (2 Chan. 11:16, 17) Rehoboam nih Jehovah nawl a ngaih caah a pennak cu a hung ṭhawng thluahmah.

Rehoboam Sualnak Le Ngaihchihnak

Rehoboam nih a pennak cu a hun ṭhawn tikah thil pakhat a tuah. Jehovah nawlbia kha a zul ti lo i a hmaan lomi pathian hna a hun biak. Zeicah? Ammon miphun a simi a nu cu a cungah huham a ngeih caah a si maw? (1 Si. 14:21) Mah cu kan hngal lo nain a mi hna nih a ṭha lomi a tuahsernak kha an i cawn. Cucaah Jehovah nih Judah pennak chung i khua tampi kha lak awkah Izipt Siangpahrang Shishak kha a awnh. Rehoboam nih mah khua hna kha fek taktak in a tuah ko buin cutin a rak cang.—1 Si. 14:22-24; 2 Chan. 12:1-4.

Shishak le a ralkap nih Rehoboam a uknak hmun, Jerusalem khua tiang ra in an hun doh tikah thil sining cu a chia chin. Mah tikah profet Shemaiah nih Rehoboam le a bawi pawl kha Pathian sinin a rami mah bia hi a chimh hna: “Nan ka kaltak caah kei zong nih Shishak kut chungah kaan kaltak ve hna lai.” Rehoboam nih mah chimhhrinhnak kha zeitindah a lehrulh? A ṭha tukmi lam in a rak lehrulh. Baibal nih hitin a ti: “Israel bawi hna le siangpahrang nih cun an lung an ṭhumh i, ‘BAWIPA cu a ding,’ tiah an ti.” Cucaah Jehovah nih Rehoboam cu a khamh i Jerusalem khua cu hrawh a si lo.—2 Chan. 12:5-7, 12.

Mah hnuah Rehoboam nih Judah pennak kha a uk rih. A thih hlanah a fapale kha laksawng tampi a pek hna. Amah hnuah siangpahrang a ṭuan dingmi, Abijah kha a unau pawl nih an ralchanh nakhnga lo ṭha tein a timhtuah. (2 Chan. 11:21-23) Cutin a tuahnak thawngin Rehoboam cu a no lio nakin fim deuh ngaiin rian a ṭuan.

Rehoboam cu Miṭha maw a Siasiloah Miṭhalo dah?

Rehoboam nih thilṭha cheukhat a tuah ko nain Baibal nih “ṭhatlonak kha a tuah” tiah a ti. Zeicah? “BAWIPA kawl kha a lung in aa sehchih lo.” Cucaah Rehoboam nih Jehovah lung a tong lo.—2 Chan. 12:14.

Rehoboam cu David bantukin Jehovah he a ṭhami pehtlaihnak a ngei lo

Rehoboam kong in zeidah kan cawn khawh? A caan ah Pathian nawl a ngai i Jehovah miphun caah thilṭha cheukhat a tuah. Asinain Jehovah he a ṭhami pehtlaihnak a ngei lo i a lungton awkah aa zuam lo. Cucaah a hmaanmi thil tuah kha a ngol i a hmaan lomi pathian hna kha a biak. Hitin na ruah men lai: ‘Rehoboam nih Jehovah chimhhrinhnak a cohlanmi cu a sualnak kha aa ngaihchih taktak ca le Pathian lungton a duh caah a si maw? Asiloah mi nih an fial ca men ah a ngaihmi maw a si?’ (2 Chan. 11:3, 4; 12:6) A nunnak a donghlei ah thil ṭhalo a rak tuah ṭhan. Anih cu a pu Siangpahrang David he cun an i dang tuk. David zong palhnak a rak tuah ve ti cu a hmaan ko. Asinain a tuahmi sualnak nganpi ruangah lungtak in a rak i ngaichih. Jehovah kha a dawt i a nunchung dihlak a rak biak.—1 Si. 14:8; Salm 51:1, 17; 63:1.

Mah Baibal tuanbia in tampi kan cawn khawh. Mi nih an innchungkhar an zohkhenh i midang ca  thilṭha an tuah tikah thangṭhat awk an tlak. Asinain Jehovah mithmai ṭha hmuh awkah a duhmi lam in kan biak a hau i amah he a fekmi pehtlaihnak kan ngeih a hau.

Mah hmuitinh phanh awkah Jehovah kan dawtnak kha fehter a hau. Mei a alh zungzal nakhnga thing tih chap a herh bantukin Pathian kan dawt zungzal nakhnga Baibal hmaan tein hlathlai, thukpi in ruah le teima tein thla kan cam zungzal a hau. (Salm 1:2; Rom 12:12) Mah dawtnak nih kan tuahmi kip ah Jehovah lungton awkah a kan forh lai. Palhnak kan tuah tikah i ngaihchih taktak in Jehovah sinah ngaihthiam hal awk zongah a kan forh lai. Mah tikah Rehoboam bantuk kan si lai lo i a hmaanmi biaknak ah fek tein kan um kho zungzal lai.—Judas 20, 21.

^ cat. 9 Solomon cu zumhawktlak tein a um lo caah Pathian nih pennak pahnih in aa ṭhen lai ti kha a rak chimchung cang.—1 Si. 11:31.