A ummi cazin ah kal

A ummi cazin ah kal

Jehovah Ta Kan Si

Jehovah Ta Kan Si

“An Pathian ah BAWIPA a simi miphun cu lunglawmmi miphun an si, BAWIPA nih a mi ah a thimmi hna cu lunglawmmi an si.”—SALM 33:12.

HLA: 31, 48

1. Zeizong vialte hi Jehovah ta a si tiah zeicah kan chim khawh? (A hramthawknak hmanthlak zoh.)

ZEIZONG vialte hi Jehovah ta an si. “Van hna le vawlei le a chungah a ummi thil vialte hi, BAWIPA na Pathian ta an si dih.” (Deut. 10:14; Biat. 4:11) Minung cu Jehovah nih a kan sermi kan si caah amah ta kan si. (Salm 100:3) Asinain mi vialte lak in Pathian nih cheukhat kha a hleikhunmi lam in amah ta si awkah a thim hna.

2. Baibal chim ningin ahote dah a hleikhunmi lam in Jehovah ta an si?

2 Tahchunhnak ah, Salm 135 nih zumhfek tein Jehovah a biami hlanlio Israel mi hna cu Jehovah nih ‘amah mi si awkah aa thim hna’ tiah a ti. (Salm 135:4) Israel mi a si lomi cheukhat zong Jehovah mi an hung si ve lai tiah Hosea nih a chimchung. (Hos. 2:23) Jehovah nih vancung ah Khrih he uktu ṭuan dingin Israel mi a si lomi a thim hna tikah mah chimchungbia cu a tling. (Lam. 10:45; Rom 9:23- 26) Thiang thlarau in chiti thuh a simi hna cu “miphun thiang” tiah auh an si. Annih cu Jehovah “miphun hrimhrim” an si. (1 Pet. 2:9, 10) Vawlei ah zungzal nun ding ruahchannak a ngeimi, tuchan i zumhfekmi Khrihfa hna tah zeitin? Jehovah nih annih zong kha “ka mi” le “ka thimmi” tiah a auh ve hna.—Isa. 65:22, NW.

3. (a) Tuchan ah ahote dah Jehovah he a hleikhunmi pehtlaihnak a ngei? (b) Hi capar ah zei kong dah kan i ruah hna lai?

3 Tuchan ah vancung ruahchannak a ngeimi “tuurun hmete” le vawlei ruahchannak a ngeimi “tuu dang” cu “tuurun runkhat” in hmunkhat ah Jehovah an biaṭi. (Luka 12:32; Johan 10:16) Jehovah he a hleikhunmi pehtlaihnak kan ngeih caah kan i lawmhnak langhter kan duh. Mah tinvo sung ruangah Jehovah cung kan i lawmhnak zeitindah kan langhter khawh ti kha hi capar ah kan i ruah hna lai.

Jehovah Sinah Kan I Pumpe

4. Jehovah he a ṭhami pehtlaihnak kan ngeih caah kan i lawmhnak zeitindah kan langhter khawh, mah kha Jesuh nih zeitindah a rak tuah?

4 Jehovah sinah kan i pumpe i tipil kan in tikah Jehovah cung kan i lawmhnak kan langhtermi a si. Cun Jehovah ta kan si i a nawlngaih kan duh ti kha mi vialte nih an hmuh khawh. (Heb. 12:9) Jesuh zong nih tipil a in lioah mah kha a rak langhter ve. Jesuh cu aa pumpe cangmi miphun a si ko nain amah pumpak theng tein Jehovah sinah aa pumpe. “Ka Pathian, zeitluk in dah na duhnak tuah cu ka duh” tiah a ti.—Salm 40:7, 8.

5, 6. (a) Jesuh tipil a in tikah Jehovah nih zeitindah a ti? (b) Kan i pumpeknak he aa tlaiin Jehovah hmuhning hngalh awkah zei tahchunhnak nih dah a kan bawmh khawh?

5 Jesuh tipil a in tikah Jehovah zeitindah a um? Baibal nih hitin a ti: “Tipilnak a in dih cangka cun Jesuh cu ti chung cun a chuak. Van kha aa hung i Pathian Thlarau cu ṭhuro bantukin a rung zuan i a cung i aa fut kha a hmuh. Cun vancung in aw pakhat a rung thang i, ‘Amah hi ka dawtmi ka Fapa a si, Amah cungah hin ka lung a tling,’ tiah a ti.” (Matt. 3:16, 17) Jesuh cu Pathian ta a si ciami a si. Asinain Jesuh nih a nunnak kha Pathian rianṭuannak ca lawngah hman a duh ti kha Jehovah nih a hmuh tikah aa lawm tuk. Kannih zong Jehovah sin kan i pumpek tikah Jehovah cu aa lawm tuk i thluachuah a kan pek lai.—Salm 149:4.

6 Zeizong vialte cu Jehovah ta an si dih ko. A caah zeidah kan pek khawh? Aa dawh tukmi pangpar dum a ngeimi pa pakhat kha na mitthlam ah cuanter hmanh. Nikhat cu a fanute nih a dum chung i pangpar pakhat kha a ṭawh i a pek. Mah pangpar cu amah ta a si ko nain mah laksawng cungah aa lawm tuk. A fanute nih a dawt ti kha mah nih a langhter. A fanu nih a pekmi mah pangpar cu a dum chung i a ummi a dang pangpar pawl nakin a caah a sunglawi deuh. Cu bantukin Jehovah sinah lungtho tein kan i pumpek tikah Jehovah cu aa lawm tuk.—Ex. 34:14

7. Jehovah nih lungtho tein a rian ṭuan a duhmi hna a hmuh hnaning hngalhthiam awkah Malakhi nih zeitindah a kan bawmh?

7 Malakhi 3:16 rel. Jehovah sinah i  pumpek le tipil in cu zeicah a biapit tuk? Kan i sem cangka in Sertu, Jehovah ta kan si ti cu a hmaan ko. Asinain Jehovah kha kan Uktu in kan cohlan i a sin kan i pumpek tikah zeitluk in dah aa nuamh lai khi ruathmanh. (Ptb. 23:15) Jehovah nih lungtho tein amah biak a duhmi kha a hngalh hna i “a hmaika i cazin” chungah an min a ṭial hna.

8, 9. Jehovah nih a “cazin” chungah a min a khumhmi hna sinin zeidah aa ruahchan?

8 Jehovah “cazin” chungah kan min umter zungzal kan duh ahcun kan tuah dingmi thil pakhat a um. Malakhi nih Jehovah ṭih le a min kong ruah a hau tiah a ti. Mi pakhatkhat asiloah thil pakhatkhat kha kan biak ahcun Jehovah cazin chungin kan min hloh a si lai.—Ex. 32:33; Salm 69:28.

Kan nunchung Jehovah nawl kan ngaih kha kan tuahsernak in kan langhter a hau

9 Cucaah Jehovah duhnak tuah awkah bia i kam in tipil in lawngin a za lo. Mah cu voikhat lawng tuahmi a si ko nain Jehovah biaknak cu kan nunchung dihlak caah a si. Kan nunchung nifatin Jehovah nawl kan ngaih kha tuahsernak in kan langhter a hau.—1 Pet. 4:1, 2.

Vawlei Duhnak Kha Kan Hlawt

10. Jehovah rian a ṭuanmi le a ṭuan lomi kha zeitindah thleidan khawh an si?

10 Kain, Solomon le Israel mi hna nih Jehovah kan biak an ti nain a cungah zumhfek tein an um lo ti kha a hmasa capar in kan hngalh cang. An kong nih Jehovah kan biak ti chimnak men lawngin a za lo ti kha a kan cawnpiak. Thil ṭhalo kha huat in thil ṭha kha duh a hau. (Rom 12:9) Jehovah nih hitin a ti: “Miṭha kha miṭhalo sinin nan thleidan khawh ṭhan hna lai i Pathian rian a ṭuanmi kha a ṭuan lomi sinin nan thleidan khawh ṭhan hna lai.”—Mal. 3:18.

11. Jehovah lawng kan biak ti kha mi vialte nih zeicah fawi tein an hngalh awk a si?

11 Jehovah nih a miphun ah i tel dingin a kan thim caah kan i lawm tuk. Jehovah leiah a ṭangmi kan si kha mi vialte nih fawi tein an hmuh awk a si. (Matt. 5:16; 1 Tim. 4:15) Hitin i hal: ‘Jehovah cungah zumhfek tein ka um kha midang nih an hmu maw? Jehovah Tehte pakhat ka si ti kha mi sinah uangthlar ngaiin ka chim maw?’ Jehovah ta ka si ti kha mi sin chim awkah kan ning a zah ahcun Jehovah zeitluk in dah a ngaih a chiat lai ti khi ruat.—Salm 119:46; Marka 8:38 rel.

Na nunning nih Jehovah Tehte na si kha fiang tein a langhter maw? (Catlangbu 12, 13 zoh)

12, 13. Unau cheukhat cu Jehovah Tehte an si kha midang nih zeicah an thleidan khawh hna lo?

12 Ngaihchiat awk ngai a simi cu Jehovah Tehte cheukhat hmanh nih “hi vawlei thlarau” nawl an cawng. Cucaah Jehovah a bia lomi hna he an i dang theng lo. (1 Kor. 2:12) “Hi vawlei thlarau” nih mi pawl kha anmah pumpak duhnak tuah awkah a forh hna. (Efe. 2:3) Tahchunhnak ah, hruk-aihnak kong he  aa tlaiin ruahnak cheuhnak kan hmu ko nain cheukhat nih cun zoh aa dawh lomi thil an i hruk men lai. Khrihfa hawikomhnak hmanhah aa tet tukmi le ṭha tein a khup dih lomi thil hna kha an i hruk. Asiloah an sam kha a hleihluat tukin an ṭamh. (1 Tim. 2:9, 10) Cucaah Jehovah Tehte an si le si lo kha mi nih hngalh awkah an i harh men lai.—Jeim 4:4.

13 Jehovah Tehte cheukhat cu vawlei he an i dan theng lonak a dang a ruang a um rih. Tahchunhnak ah, party ah an laamning le an tuahserning cu Khrihfa nih cohlan awkah aa tlak lo. Cheukhat cu Internet ah vawlei ruahnak a langhtermi an hmanthlak hna kha an taar i ca an ṭial. Sualnak ngan nan tuah tiin Khrihfabu in chimhhrinh cu an si men lai lo. Asinain an tuahsernak cu vawlei he i thleidan awkah aa zuammi unau pawl caah a ṭha lomi huham a ngei kho.—1 Peter 2:11, 12 rel.

Jehovah leiah fiang tein a ṭang lomi hna nih in iap hna hlah seh

14. Jehovah he kan i pehtlaihnak kilven awkah zeidah kan tuah a herh?

14 Vawleicung ah a ummi thil vialte cu “pumsa duhnak te hna, mi nih zoh an duhmi thil hna, mi nih porhlawtnak ah an hmanmi thil” hna kha biapi ah chiah dingin ser an si. (1 Johan 2:16) Jehovah ta kan si caah kan i dang tuk. ‘Pathian zeirel loin umnak le hi vawleicung pumsa duhnak kha kan hlawt’ i “hi vawleicung ah hin mahle mah aa uk khomi si awk le ding tein nun le Pathian ṭihzah” in kan nung. (Titas 2:12) Kan biachim, kan ei, kan din, kan thilhruk-aih le kan rian hna tel in kan nunning kip ah Jehovah ta kan si kha kan langhter awk a si.—1 Korin 10:31, 32 rel.

 ‘Pakhat le Pakhat Lungtak in Kan i Daw’

15. Unau pawl kha nemnak le dawtnak in zeicah kan pehtlaih hna awk a si?

15 Unau pawl kan pehtlaih hna ningin Jehovah hawi si kan sunsaknak kha kan langhter. Kanmah bantukin annih zong Jehovah ta an si. Mah kha kan i cinken ahcun dawtnak le nemnak he kan pehtlaih zungzal hna lai. (1 Thes. 5:15) Mah cu zeitluk in dah a biapit? Jesuh nih a zultu pawl kha hitin a ti hna: “Pakhat le pakhat nan zawn nan i ruah ahcun mi vialte nih, hi hna hi amah a zultu kha an si, tiah an in hngalh hna lai.”—Johan 13:35.

16. A miphun pawl cung i Jehovah dawtnak he aa tlaiin Moses Nawlbia in zeidah kan hngalh?

16 Moses Nawlbia nih unau pawl zeitindah pehtlaih awk a si ti hngalhthiam awkah a kan bawmh khawh. Jehovah biakinn ah biaknak caah an hmanmi umkheng pawl a um. Levi mi nih mah umkheng pawl kha zeitindah an zohkhenh lai ti kha Nawlbia nih fiang tein a chimh hna. Mah lamhruainak a zul lomi cu thah an si lai. (Nam. 1:50, 51) Jehovah nih biaknak caah hmanmi mah thilri pawl zeitindah tawnghtham ding ti hmanh biapi ah a chiah ahcun zumhfek tein amah a biami hna zeitindah pehtlaih ding ti cu biapi ah a chiah chinchin lai. A caah zeitluk in dah kan sunlawi ti kha hitin a kan hngalhter: “Nanmah aan tawngtu hna cu keimah ka mit falai a tawngmi an si.”—Zek. 2:8, NW.

Khualdawtnak, siannak, ngaihthiamnak le nemnak kan langhtermi kha Jehovah nih a hmuh

17. Jehovah nih zeidah ‘a theih i a ngaih’?

17 A miphun nih pakhat le pakhat zeitindah an i pehtlaih ti kha Jehovah nih “an bia a theihpiak hna i a ngaihpiak hna” tiah Malakhi nih a ti. (Mal. 3: 16) Jehovah nih “amah ta a simi cu a hngalh ko hna.” (2 Tim. 2:19) Jehovah nih kan chimmi le kan tuahsernak vialte kha a hngalh dih. (Heb. 4:13) Unau cungah dawtnak kan langhter lo tikah Jehovah nih a hmuh. Khualdawtnak, siannak, ngaihthiamnak le nemnak kan langhtermi zong Jehovah nih a hmuh ti kha kan hngalh khawh.—Heb. 13:16; 1 Pet. 4:8, 9.

‘Jehovah nih a Mi cu a Hlaw hna Lo’

18. Jehovah nih a miphun si dingin a kan thim caah kan i lawmhnak kha zeitindah kan langhter khawh?

18 Jehovah miphun in a ta kan si caah kan i lawmhnak kha langhter kan duh. Jehovah sin kan i pumpek tikah kan tuah khawhmi lakah a ṭha bikmi kan tuah ti kha kan hngalh. “Hrokhrolnak le ṭhatlonak in a khatmi chan ah” kan nung ko nain “sualnak ngei lo le a thiangmi” kan si kho i hi vawlei ah ceunak kan ceuter khawh. (Fil. 2:15) Cucaah Jehovah nih a huatmi thil vialte kha hrial awkah bia kan khiah. (Jeim 4:7) Unau pawl cu Jehovah ta an si ve caah kan dawt hna i kan upat hna.—Rom 12:10.

19. Jehovah nih amah ta a simi hna kha zeitindah laksawng a pek hna?

19 “BAWIPA nih a mi cu a hlaw hna lai lo” tiah Baibal nih bia a kan kamh. (Salm 94:14) Mah cu aamah khan a si. Zeithil kan ton hmanhah Jehovah cu kan sinah a um lai. Kan thih hmanhah a kan philh lai lo. (Rom 8:38, 39) “Kan nun ahcun Bawipa caah kan nung i kan thih ahcun Bawipa caah kan thi. Cucaah kan nun ah siseh, kan thih ah siseh, Bawipa ta kan si.” (Rom 14:8) Jehovah nih zumhfek tein a thimi a hawile pawl a thawhter ṭhan hna lai caan kha kan i ngaih tuk. (Matt. 22:32) Cun atu hmanhah kan Pa sinin a ṭha tukmi laksawng tampi kan hmu. Baibal nih hitin a ti: “An Pathian ah BAWIPA a simi miphun cu lunglawmmi miphun an si, BAWIPA nih a mi ah a thimmi hna cu lunglawmmi an si.”—Salm 33:12.