A ummi cazin ah kal

A ummi cazin ah kal

Ṭhatnak—Mah Ziaza Ngeih Awkah Zeitindah Naa Zuam Khawh?

Ṭhatnak—Mah Ziaza Ngeih Awkah Zeitindah Naa Zuam Khawh?

Kan dihlak in mi nih miṭha tiah kan ruat hna seh ti kha kan duh. Asinain tuchan ah miṭha si cu a har. Mi tampi nih “ṭhatnak kha an huat.” (2 Tim. 3:3) A hmaan, hmaanlo kong ah pumpak phunglam kha an zulh, cucaah ‘thilṭha cu thil ṭhalo an ti i thil ṭhalo cu thilṭha an ti.’ (Isa. 5:20) Hnulei kan sining le ka tlinlonak ruangah miṭha si cu a har. Cucaah kum tampi chung Pathian rian a ṭuanmi unaunu Anne * bantukin kan intuar ve men lai. “Miṭha si cu ka caah a har tuk” tiah a ti.

Lunglawmh awk ngai a simi cu kan dihlak in miṭha kan si kho. Ṭhatnak cu Pathian thiang thlarau nih a chuahtermi a si. Cucaah ṭhatnak cu vawlei huham, pawngkam minung asiloah kanmah thengte ti bantuk ruangah kan ton khawhmi zei bantuk harnak nakhmanh in a ṭhawng deuh. Ṭhatnak timi cu zeidah a si ti le mah kha zeitindah kan langhter khawh timi kong kha tam deuh in i ruah hna u sih.

Ṭhatnak timi cu Zeidah a Si?

Ṭhatnak timi ah ṭhatlonak si loin a ṭhami le a thiangmi ziaza aa tel. Miṭha pakhat nih cun midang bawmh khawhnak lam kha a kawl zungzal i an caah thilṭha a tuah.

Mi cheukhat cu an chungkhar le an hawile caah thilṭha tuah dingin timhcia an simi kha na hmuh men ko lai, asinain Jehovah hmuhnak ah miṭha an si hrimhrim lai tinak a si lo. A zungzal in ahohmanh miṭha kan si kho lo. Baibal nih hitin a ti: “Ṭhatnak a tuah zungzal i a sual bal lomi miding pakhat hmanh vawleicung ah hin an um hrimhrim lo.” (Pct. 7:20) Lamkaltu Paul nih “ka chungah hin ka minung sining ah hin ṭhatnak a um lo ti kha ka hngalh” tiah a ti. (Rom 7:18) Cucaah miṭha si kan duh ahcun ṭhatnak Hrampi a simi Jehovah sinin kan cawn a hau ti cu a fiang ko.

Jehovah Cu A Ṭha

Jehovah Pathian nih a ṭhami phunglam a ser. Baibal nih Jehovah kong he aa tlaiin hitin a ti: “Zeitluk in dah na ṭhat i zeitluk in dah na tuahmi cu an ṭhat. Na nawlbia cu ka cawnpiak tuah hna.” (Salm 119:68, NW) Mah Baibal caang ah a langhtermi Jehovah ṭhatnak kong pahnih kha i ruah hna u sih.

Jehovah cu a ṭha. Ṭhatnak cu Jehovah sining lakah pakhat a si. Jehovah nih Moses a chawnh lioah a cangmi hi ruathmanh: “Ka ṭhatnak vialte kha kaan hmuhter lai.” (Ex. 33:19, NW) Jehovah ṭhatnak le a sunparnak he aa tlaiin Moses nih mah bia hi a theih: “BAWIPA cu zaangfahnak le velngeihnak in a khatmi Pathian a si, amah cu fawi tein a thin hunter khawh lomi, a fekmi dawtnak tampi mi cungah a langhter i mi cungah zumhawktlak ngaingai a simi Pathian cu a si. A biakamnak kha mi thong tampi cungah a hmunhter i palhnak le ṭhatlonak le sualnak kha a ngaihthiam hna.” (Ex. 34:6, 7) Mah nih Jehovah cu lam kip in a ṭha ti kha fiang tein a langhter. Jesuh cu minung pakhat in ṭhatnak langhternak ah zohchunh awk ṭha bik a si ko nain hitin a ti: “Pathian dah ti lo cu ahohmanh miṭha an um ṭung lo.”—Luka 18:19.

Jehovah ṭhatnak kha a thil sermi in kan hmuh khawh

Jehovah tuahmi cu an ṭha. Jehovah nih a tuahmi vialte cu an ṭha. “Aho cung paohah a ṭha i a sermi hna an dihlak cungah zaangfahnak a ngei.”  (Salm 145:9) Jehovah cu a ṭha i thleidannak a ngeih lo caah mi vialte kha nunnak le nunnak caah a herhmi thil kha a pek hna. (Lam. 14:17) A kan ngaihthiam tik zongah miṭha a si kha a langhter. Salm caṭialtu nih hitin a ti: “Na ṭha i ngaihthiamnak . . . in na khat, maw BAWIPA.” (Salm 86:5) “A dingmi thil a tuahtu paoh cu thilṭha kha pe loin a um hna lo” ti kha kan zumh khawh.—Salm 84:11.

‘Ṭhatnak tuah kha Cawng U’

Jehovah nih amah he i lo in a kan ser. Mah cu miṭha kan si kho i thilṭha kan tuah kho tinak a si. (Gen. 1:27) Asinain mah cu amah tein a cangmi a si lo. Jehovah nih “a dingmi thil [ṭhatnak, NW] tuah tu kha cawng cang u” tiah a kan ti. (Isa. 1:17) Ṭhatnak tuah kha zeitindah kan cawn khawh? Kan cawn khawhnak lam pathum kong kha i ruah hna u sih.

Pakhatnak, thiang thlarau hmuh awkah thla kan cam khawh. Thiang thlarau nih Khrihfa hna kha Pathian hmaiah miṭha si awkah a kan bawmh khawh. (Gal. 5:22) Cun Pathian thiang thlarau nih thilṭha kha duh in thil ṭhalo kha huat awkah a kan bawmh khawh. (Rom 12:9) Jehovah nih “a ṭhami kha nan tuah ngam nakhnga le nan chim ngam nakhnga ralṭhatnak” an pek khawh hna tiah Baibal nih a ti.—2 Thes. 2:16, 17.

Pahnihnak, Baibal kan rel a hau. Baibal kan rel tikah Jehovah nih ‘miṭha mi hna lam zulh awk’ le “thilṭha phun zakip tuah khawh awkah” a kan cawnpiak. (Ptb. 2:9; 2 Tim. 3:17) Kan lungthin cu lungvar mansung in a khatmi kuang he aa lo. Baibal kan rel i ṭha tein kan ruah tikah kan lungthin chungah thilṭha kan khonmi a si. Mah cu a hnuah a kan bawm khomi thil mansung hna kuang chungah kan khonmi bantuk a si.—Luka 6:45; Efe. 5:9.

Pathumnak, ‘a ṭhami nawl i cawn’ awkah kan si khawh chungin kan i zuam. (3 Johan 11) Baibal ah zohchunh awk a ṭhami kong hna kan hmuh. Zohchunh awk a ṭha bikmi cu Jehovah le Jesuh an si ti cu a hmaan ko. Asinain miṭha tiah hngalh a simi midang zong an um. An lak i pahnih cu Tabitha le Barnabas an si. (Lam. 9:36; 11:22-24) Baibal nih an kong a chimmi na hlathlai tikah an sinin ṭhatnak na hmu kho. Hlathlainak na tuah lioah midang bawmh awkah zeidah an tuah ti kha i cinken. Cun na chungkhar asiloah Khrihfabu i mi cheukhat bawmh awkah na tuah khawhmi kha ruat. Tabitha le Barnabas nih midang cungah thilṭha an tuah caah zei ṭhatnak dah an hmuh ti zong kha i cinken. Nang zong cubantuk ṭhatnak na hmu kho ve.

Tuchan ah thilṭha a tuahmi hna an kong zong kan ruah khawh. Tahchunhnak ah, “thilṭha a  duhmi,” rian aa zuammi Khrihfa upa pawl kong kha ruat. An biachim le an tuahsernak in “ṭhatnak a cawnpiaktu” zumhfekmi unaunu pawl kong zong kha ruat. (Titas 1:8; 2:3, NW) Unaunu Roslyn nih hitin a ti: “Ka hawi pakhat cu Khrihfabu ah a ummi hna kha bawmh awk le thazaang pek awkah fakpi in aa zuam. An sining kha a ruah i a sawhsawh te a simi laksawng kha a pek lengmang hna asiloah a dang lam in a bawmh hna. Anih cu miṭha taktak a si tiah ka ruah.”

Jehovah nih a miphun kha ‘ṭhatnak kawl’ awkah a forh hna. (Amos 5:14) Cutin kan tuah ahcun Jehovah phunglam kha duh lawng si loin ṭhatnak tuah kan duhnak zong a ṭhawng chin lai.

Miṭha si awk le ṭhatnak tuah awkah kan i zuam

Miṭha si awkah midang kha an lung a hmuihtermi thil tuahpiak asiloah a man a fakmi laksawng pek a hau lo. Tahchunhnak ah, thingkung a ṭhan nakhnga voikhat ah ti tampi kan toih lo, mah canah ti kha tlawmte in atu le atu kan toih. Cu bantukin midang caah bawmtu a simi thil hmetete kha atu le atu kan tuah ahcun miṭha kan si ti kan langhtermi a si lai.

Baibal nih thilṭha tuah awkah ‘timcia’ tein um dingin a kan forh. (Titas 3:1) Midang nih an tonmi thil sining cungah lungthin kan pek ahcun midang “an ṭhatnak ding kha kan tuah” khawh lai i “zumhnak ah an ṭhan khawh nakhnga” kan bawmh khawh hna lai. (Rom 15:2) Mah ah kan ngeihmi thil pakhatkhat hrawm ve aa tel. (Ptb. 3:27) Tahchunhnak ah, mi pakhat kha rawl sawhsawhte eiṭi ding asiloah thazaang a pemi hawikomhnak tuahṭi dingin kan sawm khawh. Mi pakhatkhat kha a zaw ti kan hngalh ahcun ca kan kuat khawh, kan len khawh asiloah phone kan chawnh khawh. “A herhmi zawn i ṭhatnak a chuahpitu le a theimi thluachuah vanluh a petu ding bia” chimnak caanṭha tampi kan hmu kho.—Efe. 4:29.

Jehovah bantukin mi vialte cungah ṭhatnak tuah awkah kan i zuam. Cucaah thleidannak ngei loin midang kha kan pehtlaih hna. Jehovah bantukin midang kha thleidannak ngei loin kan pehtlaih khawh hnanak a ṭha bikmi lam pakhat cu phung kan chimh hnanak thawngin a si. Jesuh nih nawl a kan pek bantukin a kan huatu hna cung hmanhah ṭhatnak tuah awkah kan i zuam. (Luka 6:27) Midang cungah a ṭhami le zaangfahnak a ngeimi si cu zeitikhmanh ah a palh lo. “Cu bantuk thil hna caah cun nawlbia zeihmanh a herh lo.” (Gal. 5:22, 23) Mi nih a ding loin a kan pehtlaih tik asiloah harnak kan ton tik hmanhah ṭhatnak kan tuah ahcun midang kha biatak ah kan hnuh khawh hna lai i Pathian thang kan ṭhatter khawh lai.—1 Pet. 3:16, 17.

Ṭhatnak kan Tuah tikah Laksawng kan Hmu

“Miṭha nih a tuahmi thawng khan laksawng a hmuh lai.” (Ptb. 14:14) Zei laksawng dah kan hmuh? Midang cungah ṭhatnak kan tuah ahcun midang zong nih kan cungah ṭhatnak an tuah ve lai. (Ptb. 14:22) Midang nih ṭha tein a kan pehtlaih lo hmanhah an caah ṭhatnak kan tuah zungzal awk a si. Cutin kan tuah tikah an lungput aa thleng kho i ṭha tein a kan pehtlaih ṭhan khawh.—Rom 12:20.

Ṭhatnak kan tuah i ṭhatlonak kan hrial tikah kanmah theng ṭhatnak kan hmu. Unau tampi nih cutin ṭhatnak an hmuhnak kong kha an chim. Unaunu Nancy hmuhtonnak kong hi ruathmanh. Hitin a ti: “Kei cu a puarhrangmi, ziaza a rawkralmi le upatnak a ngei lomi pakhat in a ṭhangmi ka si. Asinain a ṭhami Jehovah phunglam kha ka cawn i ka nunnak ah ka hman tikah ka hun i nuam. Atu cu upatnak a ngeimi ka si cang.”

Ṭhatnak kan tuahnak a ruang bik cu mah nih Jehovah lung a lawmhter caah a si. Mi nih kan tuahmi kha an hmuh lo hmanhah Jehovah nih a hmuh. Thilṭha kan tuahmi le kan ruahmi paoh kha a hngalh. (Efe. 6:7, 8) Zeitindah laksawng a kan pek? “BAWIPA nih miṭha cu a lawmh hna.” (Ptb. 12:2) Cucaah ṭhatnak tuah zungzal hna u sih. “Ṭhatnak a tuah mi vialte cu Pathian nih sunparnak, upatnak le daihnak” ka pek hna lai tiah bia aa kam.—Rom 2:10.

^ cat. 2 An min thlen a si.