A ummi cazin ah kal

A ummi cazin ah kal

Khual Dawtnak Langhter cu a Herh Tukmi a Si

Khual Dawtnak Langhter cu a Herh Tukmi a Si

“Phunzai loin pakhat le pakhat tlun inn i awnh u.” —1 PET. 4:9.

HLA: 50, 20

1. Kumzabu pakhatnak i Khrihfa hna nih zei harnak dah an ton?

AD 62 in 64 kar, caankhatkhat ah lamkaltu Peter nih “Pontus, Galatia, Kappadosia, Asia le Bithinia peng i ralzam bangin aa ṭhekmi” hna sinah ca a ṭial. (1 Pet. 1:1) Mah unau pawl cu hmun dangdang in a rami an si. Annih cu “a fakmi temh innak” le hremnak hna an tong i ṭih a nung tukmi caan ah an nung. Cucaah thapeknak le lamhruainak an herh. Peter nih “zeizong vialte donghnak caan hi a nai ko cang” tiah a ṭial. Mah hnuin kumhra hlanah Jerusalem khua cu a rawk cang lai. Mah a harmi caan ah inkhawhnak ngeih awkah Khrihfa pawl cu zeinihdah a bawmh hna lai?—1 Pet. 4:4, 7, 12.

2, 3. Peter nih unau pawl kha khual dawtnak langhter awkah zeicah a forh hna? (A hramthawknak hmanthlak zoh.)

2 Peter nih unau pawl kha “pakhat le pakhat tlun inn i awnh” awkah a forh hna. (1 Pet. 4:9) “Tlun inn awnh” timi Greek biafang cu “mising cungah dawt-zaangfahnak langhter”  timi sullam a ngei. Asinain unau pawl cu pakhat le pakhat an i thei cang i hmunkhat ah rian hmanh an ṭuanṭi cang ko nain Peter nih “pakhat le pakhat” tlun inn i awnh awkah a forh hna. Khual dawtnak langhternak nih zeitindah a bawmh hna lai?

3 Mah nih pakhat le pakhat a naihter deuh hna lai. Nang tah zeitin? Mi pakhat nih a inn ah len aan sawm i naa nuamh tuk lio caan kha naa cinken ti maw? Unau pakhatkhat kha inn ah len na sawm tikah mah nih aan naihter deuh hna lai. Khual dawtnak langhternak thawngin unau pawl he kan i theihngal deuh lai. Peter chan i Khrihfa pawl cu thil sining a chiat chin caah pakhat le pakhat naih tein an um a hau. “Ni hmanung bik” caan ah a nungmi kannih zong naih tein kan um a hau ve.—2 Tim. 3:1.

4. Hi capar ah zei kong dah kan i ruah hna lai?

4 Zeiti lam in dah “pakhat le pakhat” cungah khual dawtnak kan langhter khawh? Khual dawtnak langhter awkah zeinihdah a kan dawnh khawh, zeitindah kan tei khawh? A ṭhami khual si awkah zeinihdah a kan bawmh khawh?

Khual Dawtnak Langhter Khawhnak Caanṭha

5. Pumhnak ah khual dawtnak zeitindah kan langhter khawh?

5 Pumhnak: Jehovah le a bupi nih i pumh awkah a kan sawm. Pumhnak ah a rami mikip, a hleiin mithar pawl kha kan don hna. (Rom 15:7) Annih zong Jehovah khual an si ve caah siarem tein kan umter hna a hau, zei bantuk muisam, zei bantuk thil an i hruk hmanhah ṭha tein kan don hna. (Jeim 2:1-4) Amah te lawngin a rak i pummi kha na pawngah na ṭhutter kho lai maw? Pumhnak program kong na chimh i Baibal caang pawl na hmuhsak tikah aa lawm tuk ko lai. Mah cu ‘khual tlun inn awnhnak’ ah a ṭha bikmi lam a si.

6. Ahote cungah dah a bik in khual dawtnak kan langhter awk a si?

6 Rawl: Baibal chan ah midang kha inn ah rawl ei an sawm hnanak thawngin khual dawtnak an langhter. (Gen. 18:1-8; Biac. 13:15; Luka 24:28-30) Cutin an tuahmi nih midang he pehtlaihnak ṭha ngeih an duh kha a langhter. Ahote cungah dah a bik in khual dawtnak kan langhter awk a si? Kan Khrihfabu i unau pawl cungah kan langhter awk a si. Hi chan ṭhalo cu a chiat chin cang caah unau pawl kha kan i bochan hna a hau, cun zumhawktlakmi hawikom kan si a hau. 2011 ah Uktu Bu nih United States i Bethel chungkhar Vennak Innsang Cawnnak kha zanlei suimilam 6:45 in 6:15 ah an thlen. Zeicah? Pumhnak tuan tein a dih ahcun khual dawtnak langhter awk le cohlan awkah a caan a kan ngeihter deuh lai tiah thawngthanhnak ah an thanh. A dang zung ṭengnge pawl zong nih cutin an thlen ve. Mah nih Bethel chungkhar pawl kha pakhat le pakhat ṭha tein i theih hngalh deuh awkah a bawmh hna.

Mithar pawl kha hmunkhat ah ei supsap eiṭi awk, rawl eiṭi awk le kaa khatkhat i kalṭi awkah na sawm kho hna lai maw?

7, 8. Khual phungchimtu pawl cungah zeitindah khual dawtnak kan langhter khawh?

7 A caan ah kan Khrihfabu ah phungchim dingin a dang Khrihfabu in, peng zohkhenhtu asiloah Bethel aiawhtu in unaupa hna an ra tawn. Cu bantuk caan ah an cungah khual dawtnak langhternak caanṭha  kan hmu. (3 Johan 5-8 rel.) Khual dawtnak langhter khawhnak lamkhat cu kan inn ah rawl ei kan sawm hnanak in a si.

8 United States i unaunu pakhat nih hitin a ti: “Kum tampi chung phungchimtu pawl le an nupile cungah khual dawtnak langhternak caanṭha kan hmu. Cutin kan langhter fatin kan i nuam tuk i kan zumhnak zong a fek chin. Khual dawtnak langhternak ruangah kan i ngaichih bal lo.”

9, 10. (a) Ahote dah tlun inn awnh an hau? (b) Na inn cu a hmet hmanhah tlun inn na awnh kho hna lai maw? Tahchunhnak pe.

9 A rak i ṭhummi khual: Baibal chan ah khual cheukhat kha tlun inn an awnh tawn hna. (Job 31:32; File. 22) Tuchan zongah cutin kan tuah ve. Peng zohkhenhtu pawl nih Khirhfabu an tlawn tikah tlun inn an herh. Cun Baibal tinṭan a kaimi le inn satu pawl zong nih tlun inn an herh ve men lai. Leiser ral a tong i a inn a rawkmi pawl zong nih an inn an remh ṭhan hlan tiang umnak hmun an herh. Mah tikah inn nganpi a ngeimi lawng nih an bawmh khawh hna tiah kan ruah awk a si lo. Annih nih mah hlanah voi tampi an rak bawmh cang men hna lai. Na inn cu a hmet hmanhah tlun inn na awnh kho hna lai maw?

10 Thlanglei Korea i unaupa pakhat nih Baibal tinṭan a kaimi pawl kha tlun inn a awnh hna. Hitin a ṭial: “Nupi ka ngeihka a si i kan inn zong a hmet caah a hmasa ahcun kan i cungcang. Asinain nuva tuahkhat kha kan inn ah kan tlunter hna caah kan i nuam tuk. Nuva in Pathian an biakṭimi le thlaraulei hmuitinh phanh an i zuammi nih zeitluk in dah a nuamhter hna ti kha kan hmuh.”

11. Mithar pawl cungah khual dawtnak langhter cu zeicah a hauh?

11 Mithar pawl: Unau cheukhat cu nan Khrihfabu ah an rak i ṭhial men lai. A cheu cu nan Khrihfabu bawmh a herh caah an rak i ṭhialmi a si men lai. Asiloah hmaikal in rian pek an si men lai. Hmunthar, Khrihfabu thar, holh thar le nunphung thar hna cu an caah thlennak nganpi a si. Annih kha hmunkhat ah ei supsap eiṭi awk, rawl eiṭi awk le kaa khatkhat i kalṭi awkah na sawm kho hna lai maw? Mah nih hawithar ngeih awk le an caah aa thlengmi thil sining he i ziak awkah a bawmh hna lai.

12. Khual dawtnak langhter tikah thil tampi timhtuah a hau lo ti kha zei hmuhtonnak nih dah a langhter?

12 Khual dawtnak langhter tikah thil tampi timhtuah a hau lo. (Luka 10:41, 42 rel.) Unaupa pakhat nih a nupi he missionary an ṭuanka lio i thil sining kong kha hitin a chim: “Kan ngakchia rih i hmuhtonnak zong kan ngeih rih lo caah inn kha kan ngai tuk. Voikhat cu ka nupi nih inn kha a ngai tuk i zeiti ka hlemh len zongah san a tlai lo. Zanlei suimilam 7:30 hrawngah  innka kingh thawng kan theih. Baibal a cawngmi pakhat nih theithu pathum a kan put i missionary thar pawl conglawmh awkah ka ra tiah a ti. Innchung ah luh kan sawm din awk ti kan pek. Cun lakphak le chocolate a lummi te kan dangh. Kannih nih Swahili holh kha kan thiam lo i anih zong Mirang holh a thiam ve lo. Asinain mah ni thawkin cuka hmun i unau pawl he kan hun i kom.”

Khual Dawtnak Langhter awkah Zeihmanh i Dawnhter Hlah

13. Khual dawtnak langhternak nih zei ṭhatnak dah aan hmuhter khawh?

13 Khual dawtnak langhter awkah naa cungcang bal maw? Cutin na si ahcun a nuam tukmi caan ngeih awk le a hmunmi hawikom ser awkah caanṭha na sung lai. Khual dawtnak langhternak cu lilen lo awkah bawmtu ṭha bik a si. Cu a si ah khual dawtnak langhter awkah zeicah an i cungcang? A ruang cheukhat hi zohhmanh u sih.

14. Khual dawtnak langhter awk le cohlan awkah a caan a za in kan ngeih lo ahcun zeidah kan tuah khawh?

14 A caan le thazaang: Jehovah miphun pawl cu rian tampi an ngei i an rian a tam tuk. Cucaah khual dawtnak langhter awkah a caan le thazaang a za in kan ngei lo tiah cheukhat nih an ruah men lai. Cutin na ruah ahcun khual dawtnak langhter awk le cohlan awkah na caan na sersiam a hau men lai. Baibal nih khual dawtnak langhter dingin a kan forh caah mah cu a biapi tukmi a si. (Heb. 13:2) Khual dawtnak langhter cu kan tuah dingmi le tuah awkah aa tlakmi a si. Asinain khual dawtnak langhter awkah a biapi deuh lomi thil caah kan caan tam tuk pek lo a hau.

15. Mi cheukhat nih khual dawtnak kan langhter kho lai lo tiah zeicah an ruah?

15 Nangmahle nangmah naa hmuh ning: Khual dawtnak langhter na duh ko nain ka tuah kho lo tiah na ruat bal maw? Na ning a zah ca le khual pawl an um a har lai ti na phan caah a si men lai. Asiloah tangka tampi na ngeih lo ca le unau dang bantukin ka zohkhenh kho hna lai lo tiah na phan caah a si men lai. Na inn cu inn ṭha, lo ṭha si a hau lo. A thiangmi a si i nangmah zong komh a fawimi na si ahcun na khual pawl cu an i nuam ko lai.

16, 17. Khual ngeihnak he aa tlaiin na lungre a theih ahcun zeidah na tuah khawh?

16 Khual ngeihnak he aa tlaiin na lungre a theih ahcun nangmah lawng na si lo. Britain ram i Khrihfa upa pakhat nih hitin a chim: “Khual ca timhtuah tikah lungre a thei tuk. Asinain Jehovah biaknak he aa tlaiin hmuhmi ṭhatnak le lungsinak cu lungretheihnak nakin a tam deuh. Khual pawl he hmunkhat ah ṭhutṭi in, coffee din le biaruah kha ka duh tuk.” Khual cungah pumpak siaherhnak langhter cu a ṭha. (Fil. 2:4) Mi tampi cu an hmuhtonnak kong chim kha an duh. Anmah he hmunkhat i kan umṭi lawngah an hmuhtonnak kan theih khawh lai. A dang Khrihfa upa pakhat nih hitin a ṭial: “Unau pawl kha inn ah len ka sawm hna caah an kong le biatak an hngalh ning kong hna kha ṭha deuh in ka hun hngalh.” Khual cungah pumpak siaherhnak na langhter ahcun an i nuam lai ti kha na zumh khawh.

17 Baibal tinṭan a kaimi unau pawl kha a  inn ah a tluntermi hmaikal unaunu pakhat nih hitin a chim: “Ka inn cu a sawhsawhte a si i ka thilri pawl cu secondhand lawngte an si caah a hmasa ahcun ka lungre a thei. Asinain tinṭan petu pakhat i a nupi chimmi bia nih ka hna a ka ngamter. Khualtlawng rian an ṭuan lioah thilri chawva tampi a ngei lomi, nunning sawhsawh tein a nung i thlaraulei nutling, patling a simi hna sin kan i ṭhumh tikah kan i nuam bik tiah a ti. Mah bia nih ka nu nih a chim tawnmi ‘Dawtnak aa telnak zanriah cu an hringso he lawng hmanh siseh law a ṭha deuh’ timi bia kha a ka hngalhter ṭhan.” (Ptb. 15:17) Dawtnak nih khual dawtnak langhter awkah a kan forh. Cucaah lungretheih a hau lo.

18, 19. Khual dawtnak nih a ṭhalomi lungput tei awkah zeitindah a kan bawmh khawh?

18 Midang na hmuh hna ning: Nan Khrihfabu i pakhatkhat nih na thin an in hunter maw? A hramthawk ahcun na thin a hung ve men ko lai nain na tawnghtham lo ahcun thil sining cu a chia chin lai. Mah he ziaza aa khat lomi cungah khual dawtnak langhter na duh men lai lo. Asiloah hlanah na lung aan fahtermi kha philh awkah naa harhmi zong a si kho men.

19 Khual dawtnak na langhter ahcun na ral pawl he hmanh pehtlaihnak ṭha na ngei kho lai tiah Baibal nih a ti. (Phungthlukbia 25:21, 22 rel.) Khual dawtnak langhternak nih lung i khah lonak kha a zorter  khawh. Cun Jehovah nih biatak i a hnuh lioah a hmuhmi a ṭhami ziaza hna kha na hun hmuh ve lai. (Johan 6:44) Dawtnak in len na sawm tikah a ṭhami pehtlaihnak nan ngei kho lai. Dawtnak in na tuahmi a si kha zeitindah na langhter khawh? Lamkhat cu Filipi 2:3 i “toidornak lungthin tu kha ngei cio u law midang nakin ka ṭha deuh tiah zeitikhmanh ah vaa ruat hlah u” timi ruahnak cheuhnak zulhnak thawngin a si. Kan unau pawl cu kanmah nakin an ṭha deuh tiah kan ruah awk a si. An langhtermi zumhnak, inkhawhnak le a dang Khrihfa ziaza hna in kan cawn khawh. An ngeihmi ziaza ṭha hna ruahnak nih kan dawtnak kha a fehter chin lai i an cungah khual dawtnak langhter awkah a fawi deuh lai.

A Ṭhami Khual Si

Inn-ngeitu nih khual pawl caah ṭha tein an timhtuah tawn (Catlangbu 20 zoh)

20. Sawmnak pakhat kan cohlan tikah a biakam ningin a tuahmi kan si kha zeitin le zeicah kan langhter awk a si?

20 Salm caṭialtu David nih “BAWIPA, na biakinn chungah ahodah a um lai?” tiah a hal. (Salm 15:1) Mah hnuah Jehovah nih a khual pawl ngeihter a duhmi hna sining pawl kha David nih a langhter. Mah lak i pakhat cu biakam ningin tuah kha a si. “Zeitluk in a har hmanhah a biakam ningin a tuah zungzal.” (Salm 15:4) An kan sawmmi kan cohlan cang a si ahcun a herh loin kan let ṭhan awk a si lo. Kan let ahcun inn-ngeitu nih kan caah an timhtuahmi vialte cu pakpalawng ah a cang lai. (Matt. 5:37) Cheukhat cu anmah kal an duh deuhnak hmun ah an kal khawh nakhnga sawmnak kha an let ṭhan. Mah cu dawtnak le upatnak langhter a si lai maw? Inn-ngeitu nih an kan pekmi paoh kha lunglawm tein kan cohlan awk a si. (Luka 10:7) Let ṭhan a hauh ahcun inn-ngeitu kha a rannak in kan theihternak thawngin dawtnak le zawnruahnak kan langhter khawh.

21. Nunphung upatnak nih a ṭhami khual si awkah zeitindah a kan bawmh khawh?

21 Hmunhma nunphung zong upat a biapi. Nunphung cheukhat ahcun sawm loin a rami khual kha ṭha tein an conglawmh ko hna nain cheukhat tu nih cun a hlankan in timhtuah hmasa kha an duh. Hmun cheukhat ahcun inn-ngeitu nih khual kha rawl thawthaw an pek hmasa hna i a hnuah anmah chungkhar an ei. Hmun cheukhat ahcun hmunkhat ah an eiṭi dih hna. Hmun cheukhat ahcun khual nih pakhatkhat an i put i cheukhat ahcun i put a hau lo. Nunphung cheukhat ahcun khual nih a voikhatnak asiloah a voihnihnak sawmnak kha upatnak tein an al tawn. Asinain hmundang ahcun sawmnak cohlan lo cu mi zeirel lo bantuk a si. A kan sawmtu inn-ngeitu kha kan si khawh chungin kan lawmhter hna awk a si.

22. “Pakhat le pakhat tlun inn i awnh” cu zeicah a biapit tuk?

22 Peter nih “zeizong vialte donghnak caan hi a nai ko cang” tiah a ti. (1 Pet. 4:7) Atu ah a um bal lomi harnak nganpi kan tong. Hi chan ṭhalo cu a chiat chin cang caah unau pawl kha kan dawt chinchin hna awk a si. “Pakhat le pakhat tlun inn i awnh u” timi Peter ruahnak cheuhnak kha atu ah kan zulh chinchin awk a si. (1 Pet. 4:9) Khual dawtnak langhter cu duh a nungmi ziaza a si i a zungzal in a herhmi a si.