A ummi cazin ah kal

A ummi cazin ah kal

Chimhhrinhnak​—⁠Pathian Dawtnak Langhternak

Chimhhrinhnak​—⁠Pathian Dawtnak Langhternak

“Bawipa nih a dawtmi hna cu . . . a chimhhrin tawn hna.”—HEB. 12:6.

HLA: 43, 20

1. Baibal nih chimhhrinhnak kha zeitindah a langhter tawn?

“CHIMHHRIN” timi biafang na theih tikah zeitindah na ruah? Mi tampi nih cun dantatnak in an ruah. Asinain mah lawng a si lo. Baibal nih chimhhrinhnak cu kan caah a ṭhami in a langhter i a caan ah hngalhnak, fimnak, dawtnak le nunnak he hmunkhat ah a langhter tawn. (Ptb. 1:2-7; 4:11-13) Pathian chimhhrinhnak nih a kan dawt ti le zungzal in nunter a kan duh ti kha a langhter. (Heb. 12:6) Pathian chimhhrinhnak ah dantatnak aa tel tawn ko nain puarhrangpi in asiloah ṭihnung in a kan pehtlaih bal lo. ‘Chimhhrinhnak’ ah a bik in nulepa nih an fale an cawnpiak hna bantukin cawnpiaknak aa tel.

2, 3. Chimhhrinhnak ah cawnpiaknak le dantatnak zeitindah aa tel? (A hramthawknak hmanthlak zoh.)

2 Mah kong hi ruathmanh. Johnny timi ngakchiapa te cu inn chungah bawlung a chuih. Mah tikah a nu nih “Johnny, inn chungah bawlung chuih hlah. Pakhatkhat na hrawh sual lai” tiah a ti. Asinain a nu bia kha zeirel loin a chuih peng  caah pangpar chiahnak um kha a khawn i a kuai. A nu nih Johnny kha zeitindah a chimhhrinh lai? Johnny tuahsernak a palh kha a chimh lai i dan zong a tat khawh. Nulepa bia ngaih cu a caah a ṭha i an serpiakmi dingrep cu a herhmi le aa tlakmi a si ti kha a cawnpiak. Cun Johnny nih fimnak aa lak nakhnga chikkhat chung cu a bawlung a fimpiaknak thawngin aa tlakmi dantatnak a pek. Nulepa nawl a ngaih lo ahcun ṭhatlonak a chuak kho ti kha hngalhthiam awkah mah nih a bawmh lai.

3 Khrihfa pawl cu Pathian innchungkhar ah aa telmi kan si. (1 Tim. 3:15) Kan Pa, Jehovah cu a hmaan le hmaanlo kong ah biakhiahnak nawl a ngei i a bia kan ngaih lo tikah chimhhrinhnak nawl a ngei. Cun kan tuahsernak nih a ṭhalomi thil a chuahter tikah Jehovah chimhhrinhnak nih a nawl ngaih zeitluk in dah a biapit ti kha i cinken awkah a kan bawmh khawh. (Gal. 6:7) Pathian nih a kan dawt tuk i harnak tonter a kan duh lo.—1 Pet. 5:6, 7.

4. (a) Jehovah nih midang kha zeitindah cawnpiak hna seh ti a kan duh? (b) Hi capar ah zei kong dah kan i ruah hna lai?

4 Baibal hrambunh in kan chimhhrinh hna tikah kan fale asiloah Baibal kan cawnpiakmi hna kha Khrih zultu si dingin kan bawmh khawh hna. ‘Jesuh nih a kan fialmi vialte an zulh’ nakhnga le an theihthiam nakhnga Baibal hmangin kan bawmh khawh hna. (Matt. 28:19, 20; 2 Tim. 3:16) Annih zong nih midang kha Khrih zultu si awkah an bawmh khawh ve hna nakhnga Jehovah nih cutin cawnpiak si hna seh ti a duh. (Titas 2:11-14 rel.) A biapi tukmi biahalnak pathum hi i ruah hna u sih: (1) Pathian chimhhrinhnak nih a kan dawtnak kha zeitindah a langhter? (2) Pathian chimhhrinhnak a hmumi hna sinin zeidah kan cawn khawh? (3) Mi kan chimhhrinh hna tikah Jehovah le a Fapa kha zeitindah kan i zohchunh khawh hna?

Dawtnak In Pathian Chimhhrinhnak

5. Jehovah chimhhrinhnak nih a kan dawtnak kha zeitindah a langhter?

5 Jehovah nih a kan dawt caah kan palhnak a kan remhpiak i a kan cawnpiak. Amah he naih tein um hna sehlaw zungzal nunnak hmu hna seh ti a duh. (1 Johan 4:16) Pathian nih a kan serhsat bal lo i man ka ngei lo timi ruahnak zong a kan ngeihter bal lo. (Ptb. 12:18) Jehovah nih kan ngeihmi ziaza ṭha cungah a lungthin a chiah i zalong tein thimnak nawl a kan pek. Baibal, bupi chuahmi cauk, nulepa le Khrihfa upa sinin kan hmuhmi chimhhrinhnak kha Jehovah dawtnak langhternak in na hmu maw? Thil ṭhalo kan tuah sual tikah Khrihfa upa  hna nih nemnak le dawtnak he an kan chimhhrinhmi cu Jehovah dawtnak an i zohchunhmi a si.—Gal. 6:1.

6. Chimhhrinhnak ruangah mi pakhat cu tinvo sung hmuh awkah aa tlak ti lo hmanhah mah nih Pathian dawtnak kha zeitindah a langhter?

6 A caan ah chimhhrinhnak ah ruahnak cheuhnak lengin aa tel. Unau pakhat nih sualnak ngan a tuah tikah anih cu Khrihfabu i rian cheukhat kha hmuh awkah aa tlak ti lo. Cutin chimhhrinh a si hmanhah mah nih Pathian dawtnak kha a langhter. Tahchunhnak ah, tinvo sung pawl a sungh tikah Baibal hlathlainak, ṭha tein ruahnak le thlacamnak cu zeitluk in dah a biapit ti kha a hun hngalh men lai. Mah nih Jehovah he an i pehtlaihnak fehter deuh awkah a bawmh khawh. (Salm 19:7) A hnuah a sunghmi tinvo sung hna kha a hmuh ṭhan khawh. Mi pakhat cu bu chungin chuah a si hmanhah mah nih Jehovah dawtnak kha a langhter. Zeicahtiah Khrihfabu kha a ṭhalomi huham in a huhphenh caah a si. (1 Kor. 5:6, 7, 11) Pathian chimhhrinhnak cu a zungzal in a dingmi a si caah mah nih buchung chuah a simi pa kha a sualnak zeitluk in dah a ngan ti hngalhthiam awkah a bawmh. Cun i ngaihchih awk zongah a bawmh khawh.—Lam. 3:19.

Jehovah Chimhhrinhnak nih Ṭhatnak a Kan Pek

7. Shebna cu ahodah a si, zei bantuk a ṭha lomi ziaza dah a ngeih?

7 Chimhhrinhnak a biapitnak hngalhthiam awkah Jehovah nih a chimhhrinhmi mi pahnih kong atu i ruah hna u sih. Pakhat cu Siangpahrang Hezekiah chan ah a nungmi Israel mi Shebna a si, a dang pakhat cu tuchan i unaupa Graham a si. Shebna cu Siangpahrang Hezekiah “innchungkhar uktu bawi a si” i nawl a ngei ngaimi a si. (Isa. 22:15) Asinain a hun i porhlaw i a min a than nakhnga fakpi in aa zuam. Amah caah a man a fak tukmi thlan hmanh kha a ser i aa ‘uanthlarpi ngaingaimi rangleng’ kha aa cit.—Isa. 22:16-18.

Kan i toidor i kan lungput thlen kan duh ahcun Pathian nih thluachuah a kan pek lai (Catlangbu 8-10 zoh)

8. Jehovah nih Shebna kha zeitindah a chimhhrinh, a phichuak cu zeidah a si?

 8 Shebna nih amah pumpak thangṭhatnak a kawl caah Pathian nih a rian kha Eliakim sinah a pek. (Isa. 22:19-21) Mah thil cu Assiria Siangpahrang Sennakherib nih Jerusalem doh aa timh lioah a rak cangmi a si. A hnuah, Sennakherib nih Judah mi pawl tlerhkhonh awk le Siangpahrang Hezekiah kha an kut tang i, i dor awkah ralbawi pawl le ralkapbu nganpi pakhat kha a thlah hna. (2 Si. 18:17-25) Mah tikah Hezekiah nih ralbawi pawl ton awkah Eliakim le a dang pa pahnih a thlah hna. Mah lak i pakhat cu caṭialtu Shebna a si. Shebna nih toidornak ngeih awk le lungfah lo awkah a cawn lai ti kha mah in kan hngalh khawh. A niam deuhmi dirhmun kha cohlan duhnak lungput a ngei. Shebna sinin kan cawn khawhmi a kong pathum a um.

9-11. (a) Shebna sinin zei a biapimi kong dah kan cawn khawh? (b) Jehovah nih Shebna a pehtlaih ning kha zeitindah na hmuh?

9 Pakhatnak, Shebna nih a dirhmun a sunghnak in “porhlawtnak nih hin rawknak ah mi a kalpi tawn i uanthlarnak lungthin nih hin tluknak ah a hruai tawn” ti kha a kan hngalhter. (Ptb. 16:18) Khrihfabu ah a hleikhunmi rian kan ngei men lai i unau dang nih a biapimi in an kan ruah men lai. Mah tikah toidor tein kan um zungzal lai maw? Kan ngeihmi thiamnak le kan liimmi thilṭha hna cu Jehovah bawmhnak thawng lawngin a si ti kha kan i cinken maw? (1 Kor. 4:7) Lamkaltu Paul nih hitin ralrin a kan pek: “Nanmah le nanmah kha a sang tuk ah i ruat hlah u. Nan siningte tu kha i hngal u.”—Rom 12:3.

10 Pahnihnak, Jehovah nih Shebna kha fakpi in a chimhhrinhmi nih Shebna cu aa thleng kho ti a zumh kha a langhter. (Ptb. 3:11, 12) Mah cu tinvo sung a sungmi hna caah cawn awk a si. Thinhun le lungfah canah chimhhrinhnak kha Jehovah dawtnak in an hmuh ahcun Jehovah kha a ṭha bik an pek khawh lai. Toidor tein a um zungzalmi hna cu a donghnak ah kan Pa nih laksawng a pek hna lai ti kha i cinken. (1 Peter 5:6, 7 rel.) Toidor tein kan um i a nemmi tlak bantuk kan si ahcun dawtnak in Jehovah chimhhrinnak nih a kan sersiam khawh lai.

11 Pathumnak, Jehovah nih Shebna a pehtlaih ning in a biapimi kong kan cawn khawh. Jehovah chimhhrinh ning nih sualnak kha a huat i sualnak a tuahtu kha cu a dawt rih ko hna ti a langhter. Jehovah nih mi pawl i an ṭhatnak kha a kawl. Nang cu nulepa asiloah Khrihfa upa na si ahcun Jehovah chimhhrinh ning kha naa cawn kho lai maw?—Judas 22, 23.

12-14. (a) Mi cheukhat nih Jehovah chimhhrinhnak kha zeitindah an lehrulh? (b) Unaupa pakhat cu a lungput i thlen awkah Baibal nih zeitindah a bawmh, a phichuak cu zeidah a si?

12 Ngaihchiat awk ngai a simi cu unau cheukhat cu chimhhrinh an si tikah an lung a fak tuk i Pathian le Khrihfabu kha an kaltak. (Heb. 3:12, 13) Mah cu ahohmanh nih an bawm kho hna lo tinak a si maw? A si lo. Buchung in chuah a si i a hnuah a lut ṭhanmi Graham kong hi ruathmanh. Asinain anih cu phungchim a kal ti lo i aa pum ti lo. Mah tikah Khrihfa upa pakhat cu Graham he hawikom si awkah aa zuam. A donghnak ah Graham nih mah unaupa kha Baibal cawnpiak awkah a hal.

13 Mah Khrihfa upa nih hitin a chim: “Graham cu aa uah tuk. Amah bu chungin  a rak chuahtu Khrihfa upa pawl kha a thangchiat hna. Cucaah Baibal tlawmpal kan cawn hnuah porhlawtnak le mah nih a chuahtermi kong kha Baibal caang in kan i ruah. Mah tikah Pathian Bia thlalang in a sining kha fiang tein a hun i hmuh i mah kha a duh lo. A phichuak cu khuaruahhar a si. Porhlawtnak “thingtan” nih a khuh i thangchiat a hmangmi a si kha a hun i hngalh tikah khulrang in a hun i thleng. Pumhnak hmaan tein a hun i pum, lungtho tein Baibal a hlathlai i nifate thlacamnak kha a zia ah a canter. Chungkhar lu in thlaraulei a rian pawl zong kha a cohlan i a nupi le a fale cu an i lawm tuk.”—Luka 6:41, 42; Jeim 1:23-25.

14 Hitin a chim chap: “Nikhat cu Graham chimmi bia nih ka lung a ka suk tuk. ‘Biatak ka hngalhnak hi kum tampi a si cang i hmaikal hmanh ka rak ṭuan. Asinain atu lawngah Jehovah kha ka dawt tiah lungtak in ka chim khawh’ tiah a ti. A rauhhlan ah Graham cu pumhnak ah maih tlaitu in rian an pek i mah rian kha a sunsak tuk. Chimhhrinhnak a cohlang i Pathian hmaiah toidor tein a ummi cu thluachuah tampi an hmu ti kha Graham hmuhtonnak nih a ka cawnpiak.”

Chimhhrinhnak ah Pathian le Khrih kha i Zohchunh Hna

15. Hmualngei tein chimhhrinh khawh awkah zeidah kan tuah a herh?

Naa toidormi kha mi nih an hmuh tikah an in upat lai i ruahnak na cheuhmi hna kha cohlan awkah an i fawih deuh lai

15 Saya ṭha si na duh ahcun siangngakchia ṭha na si hmasa a hau. (1 Tim. 4:15, 16) Cu bantukin Jehovah nih midang chimhhrinh awkah a hmanmi na si ahcun Jehovah lamhruainak kha toidor tein zul zungzal. Naa toidormi kha mi nih an hmuh tikah an in upat lai i ruahnak na cheuhmi hna kha cohlan awkah an i fawih deuh lai. Jesuh sinin kan cawn khawh.

16. Hmualngei tein chimhhrinhnak le cawnpiaknak ah Jesuh sinin zeidah kan cawn khawh?

16 Jesuh nih a caah a har tukmi caan hmanhah a Pa bia kha a ngaih zungzal. (Matt. 26:39) A cawnpiaknak le a fimnak cu a Pa sinin a rami a si ti kha a bia a ngaitu pawl a hngalhter hna. (Johan 5:19, 30) Jesuh cu aa toidormi le nawl a ngaimi a si i mah nih dawtnak a ngeimi saya si awkah a bawmh. Lungthin ṭha a ngeimi hna cu a sinah an i nuam. (Luka 4:22 rel.) Jesuh chimmi bia nih a lung a dongmi le a tha a dermi hna kha thazaang a pek hna. (Matt. 12:20) Lamkaltu pawl lakah ahodah a ngan bik timi bia alnak a um tikah thinhun loin nemnak le dawtnak in a cawnpiak hna.—Mar. 9:33-37; Luka 22:24-27.

17. Zei ziaza nih dah Khrihfa upa pawl kha Khrihfabu ṭha tein zohkhenh awkah a bawmh hna lai?

17 Khrihfa upa nih Baibal phunglam hrambunh in mi an chimhhrinh hna tik paohah Khrih an i zohchunh a hau. Cuticun Pathian le a Fapa lamhruainak an zulh kha an langhter khawh. Lamkaltu Peter nih  hitin a ṭial: “Pathian nih aan pekmi hna tuurun a khaltu kha si u law Pathian nih zohkhenh hna seh ti aan duh hna bantukin lungtho lo si loin lungtho tein zohkhenh hna u. Ṭuan man hmuh ding men ah si loin ṭuan nan duh taktak ruang tu ah nan rian kha ṭuan u. Nanmah zohkhenh awkah chiahmi hna kha a uk in uk hna hlah u, sihmanhsehlaw an i zohchun ding tu si i zuam u, tiah kaan nawl hna.” (1 Pet. 5:2-4) Khrihfa upa nih Pathian le Khrih tang ah lunglawm tein an i dor tikah anmah le an zohkhenhmi hna nih ṭhatnak an hmu lai.—Isa. 32:1, 2, 17, 18.

18. (a) Nulepa kha Jehovah nih zeidah a hal hna? (b) Pathian nih nulepa kha zeitindah a bawmh hna?

18 Innchungkhar chimhhrinhnak le cawnpiaknak kong ah tah zeitin? Jehovah nih chungkhar lu pawl kha hitin a ti hna: “Nan fale kha an thin hung seh ti in ti hna hlah u. Khrihfa ziaza le cawnpiaknak he tu ṭhanter hna u.” (Efe. 6:4) Chimhhrinhnak le cawnpiaknak cu a herh taktakmi a si maw? Phungthlukbia 19:18 ah hitin kan hmuh: “Na fale cu an no rih lioah chimhring hna, cuti na tuah lo ahcun an rawhnak dingah na bawmh hna a si.” Jehovah nih nulepa kha fale chimhhrinh, cawnpiak awkah rian a pek hna. Cutin an tuah lo ahcun Pathian nih bia a ceih hna lai. (1 Sam. 3:12-14) Asinain nulepa nih thlacamnak in Pathian sinah bawmhnak an hal i Baibal le thiang thlarau lamhruainak an i bochan ahcun an herhmi fimnak le thazaang a pek hna lai.—Jeim 1:5 rel.

Dai tein Um Zungzal Khawh Awkah Cawnnak

19, 20. (a) Pathian chimhhrinhnak kan cohlan ahcun zei thluachuah dah kan hmuh lai? (b) A hnu capar ah zei kong dah kan i ruah hna lai?

19 Pathian chimhhrinhnak kan cohlan i Jehovah le Jesuh chimhhrinh ning kan i zohchunh ahcun thluachuah tampi kan hmu lai. Cun kan innchungkhar le Khrihfabu ah daihnak a um lai, mikip nih dawtnak, sunsaknak le himnak an hmu lai. Mah cu hmailei ah kan hmuh laimi thluachuah a langhtermi tlawmpal lawng a si. (Salm 72:7) Jehovah chimhhrinhnak cu Jehovah kan Pa uknak tangah a ummi, a dai i a lung aa rualmi chungkhar he zungzal in umṭi awkah a kan timhtuahtu a si. (Isaiah 11:9 rel.) Mah kha kan i cinken ahcun chimhhrinhnak cu Pathian dawtnak langhternak lam a si ti kha kan hngalh lai.

20 A hnu capar ah chungkhar le Khrihfabu i chimhhrinhnak he aa tlaimi kong tam deuh in kan hngalh lai. Kanmahle kanmah zeitindah kan i chimhhrinh khawh ti kha kan i ruah hna lai. Cun chimhhrinhnak in hmuhmi fahnak nakin a ṭhalo deuhmi kong zong kan i ruah hna lai.