A ummi cazin ah kal

A ummi cazin ah kal

“Cawnpiaknak kha Ngai U Law Fim tuah U”

“Cawnpiaknak kha Ngai U Law Fim tuah U”

“Ka fapale hna . . . cawnpiaknak kha ngai u law fim tuah u.”—PTB. 8:32, 33.

HLA: 34, 6

1. Fimnak kha zeitindah kan hmuh khawh, mah nih zeitindah a kan bawmh lai?

FIMNAK cu Jehovah sinin a rami a si i midang kha siang ngaiin a pek hna. Jeim 1:5 ah hitin kan hmuh: “Fimnak a baumi nan um ahcun, Pathian sinah thla cam sehlaw Pathian nih a pek ko lai; Pathian nih cun ahopaoh kha zaangfah ngai le siang ngaiin a pek ko hna.” Fimnak kan hmuh khawhnak lam pakhat cu Pathian chimhhrinhnak cohlannak thawngin a si. Fimnak nih thil ṭhalo tuahnak in a kan huhphenh lai i Jehovah he naih tein um zungzal awkah a kan bawmh lai. (Ptb. 2:10-12) Cun zungzal nunnak ruahchannak zong kan ngei lai.—Judas 21.

2. Pathian chimhhrinhnak kha zeitindah kan sunsak khawh?

2 Mitlinglo kan si ruang asiloah kan ṭhanning ruangah a caan ah chimhhrinhnak cohlan le a ṭhatnak in hmuh kan i harh kho men. Asinain Pathian chimhhrinhnak in ṭhatnak kan hmuh tikah Pathian nih zeitluk in dah a kan dawt ti kha kan hun hngalhthiam. Phungthlukbia 3:11, 12 ah hitin kan hmuh: “Ka fapa, BAWIPA chimhhrinnak cu zei rel loin um hin hlah. . . . BAWIPA nih a  dawtmi kha a mawhchiat ve hna.” Jehovah nih kan caah a ṭha bikmi a duh ti kha kan zumh khawh. (Hebru 12:5-11 rel.) Pathian nih ṭha tein a kan hngalh caah a chimhhrinhnak cu aa tlakmi le kan herhmi a si zungzal. Hi capar ah chimhhrinhnak phunli kong kan i ruah hna lai: (1) Mahle mah i chimhhrinnak, (2) nulepa chimhhrinhnak, (3) Khrihfabu in hmuhmi chimhhrinhnak le (4) chimhhrinhnak nakin a ṭhalo deuhmi.

Mahle Mah Chimhhrinh cu Zeicah Fim a Si?

3. Ngakchia pakhat cu mahle mah aa chimhhrinh khomi zeitindah a si khawh? Tahchunhnak pe.

3 Mahle mah chimhhrinhnak ah kan tuahsernak le kan ruahnak i uk khawhnak aa tel. Mahle mah chimhhrinhnak cu kan i chuahpimi a si lo caah kan cawn a hau. Tahchunhnak ah, ngakchia pakhat nih sehbing cit a cawn tikah a nu asiloah a pa nih ṭha tein an tlaihpiak. Asinain a hun thiam deuh tikah tlawmpal an thlahpiak pah lengmang. Ṭha tein mawngh a thiam tikah cun amah tein an citter cang. Cu bantukin nulepa nih an fale kha “Khrihfa ziaza le cawnpiaknak” he lungsau tein an cawnpiak hna ahcun an fale cu mahle mah aa chimhhrinh khomi le a fimmi an si lai.—Efe. 6:4.

4, 5. (a) Mahle mah chimhhrinhnak cu “mihring thar” hruknak ah zeicah aa tel? (b) Palhnak kan tuah tikah zeicah kan lung a dongh awk a si lo?

4 An upat hnuah Jehovah kong a hngalmi zong cutin an si ve. Mahle mah aa chimhhrinh khomi an si ko lai nain Khrihfa nutling, patling cu an si rih lo. Asinain “mihring thar” i hruk awk le Khrih i zohchunh awkah an i zuam ahcun duhsah duhsah in Khrihfa nutling, patling an hung si lai. (Efe. 4:23, 24) Mahle mah chimhhrinhnak nih “Pathian zeirel loin kan um tawnnak le hi vawleicung pumsa duhnak hlawt kha a kan cawnpiak i hi vawleicung ah hin mahle mah aa uk khomi si awk le ding tein nun le Pathian ṭihzah in um kha a kan forh.”—Titas 2:12.

5 Asinain kan dihlak in misual kan si. (Pct. 7:20) Asinain palhnak kan tuah tikah mahle mah aa chimhhrin kho lomi le santlai lomi kan si tinak a si lo. Phungthlukbia 14:16 ah “miṭha mi cu voi sarih tiang tlu hmanh sehlaw a tho ṭhan zau lai” tiah a ti. ‘Thawh ṭhan’ awkah zeinihdah a kan bawmh lai? Kanmah thazaang si loin Pathian thiang thlarau nih a kan bawmh lai. (Filipi 4:13 rel.) Thlarau nih a chuahtermi ziaza hna ah mahle mah i uk khawhnak aa tel i mah cu mahle mah i chimhhrinnak he aa pehtlai.

6. Zeitindah Baibal hlathlainak cu na caah a hun fawi khawh? (A hramthawknak hmanthlak zoh.)

6 Thlacamnak, Baibal hlathlainak le ruahnak nih mahle mah i chimhhrinh khawh awkah a kan bawmh lai. Asinain Baibal hlathlainak tuah cu na caah a har asiloah na huam lo ah tah zeitin? Na lung dong hlah. Pathian Bia, Baibal kha “duh” awkah Jehovah nih a kan bawmh lai. (1 Pet. 2:2) Baibal hlathlai dingin mahle mah i chimhhrinh khawh awkah Jehovah sinah bawmhnak hal. A hmasa ahcun Baibal hlathlainak kha minit tlawmpal tein na tuah khawh. Cuticun Baibal hlathlainak tuah cu a hung fawi deuh lai i naa nuam deuh lai. Jehovah kong kha dai tein ruah awkah a caan pek na duh lai.—1 Tim. 4:15.

7. Mahle mah chimhhrinhnak nih thlaraulei hmuitinh phanh awkah zeitindah a kan bawmh khawh?

 7 Mahle mah chimhhrinhnak nih thlaraulei hmuitinh phanh awkah a kan bawmh khawh. Tahchunhnak ah, fa a ngeimi pa pakhat cu a lungthawhnak a tlau tiah a ruah caah hmaanhmaan hmaikal ṭuan dingin hmuitinh a chiah. Hmaikal ṭuannak kong he aa tlaimi mekazin pawl kha a rel i thla a cam. Mah nih Jehovah he an i pehtlaihnak kha a fehter chin. Cucaah a si khawh tikah manh caan hmaikal a ṭuan. A hmuitinh phanh khawh lo awkah zeithil hmanh aa dawnhter lo. A hnuah hmaanhmaan hmaikal a hung ṭuan kho.

Na Fale kha Jehovah Chimhhrinhnak in Ṭhanter Hna

Ngakchia cu an chuahka in a hmaan, hmaanlo an thleidan khawh lo caah cawnpiak an hau (Catlangbu 8 zoh)

8-10. Nulepa nih fale kha Jehovah biak awkah zeitindah an bawmh khawh hna? Tahchunhnak pe.

8 Jehovah nih fale kha “Khrihfa ziaza le cawnpiaknak” he ṭhanter awkah nulepa kha rian a pek hna. (Efe. 6:4) Mah rian cu tuchan ah a har kho men. (2 Tim. 3:1-5) Ngakchia nih an chuahka in a hmaan, hmaanlo kha an thleidang kho lo, zeicahtiah an chiaṭha thleidannak cu cawnpiak a si rih lo. Cucaah cawnpiak an herh. (Rom 2:14, 15) Baibal lei mifim pakhat nih “chimhhrinhnak” tiah lehmi Greek biafang  cu “fale zohkhenhnak” timi sullam zong a ngei tiah a ti.

9 Nulepa nih fale kha dawtnak he an cawnpiak hna tikah fale nih himnak an hmu. Zalonnak ah ri a um i an biakhiahnak le an tuahsernak vialte cu an nunnak ah huham a ngei ti kha an hngalh. Cucaah Khrihfa nulepa nih fale zohkhenhnak ah Jehovah fimnak i bochan cu a biapi tukmi a si. Fale zohkhenh ning cu nunphung pakhat le pakhat, chankhat le chankhat an i lo lo. Asinain Pathian nawl a ngaimi nulepa nih an tuah awk a simi thil kha an ruahdamh lo asiloah minung ruahnak le hmuhtonnak kha an i bochan lo.

10 Noah sinin kan cawn khawh. Jehovah nih lawng sak a fial tikah zeitindah sak ding a si ti kha a hngal lo. Jehovah kha aa bochan i Jehovah nih “a fialmi vialte cu a tuah dih.” (Gen. 6:22) A phichuak cu zeidah a si? Mah lawng nih Noah le a chungkhar kha a khamh hna. Noah cu a hlawh a tlingmi pa a si. Zeicah? Pathian fimnak aa bochan caah a si. Noah nih a fale kha ṭha tein a cawnpiak hna i an caah zohchunh awk ṭha a chiah. Buanchukcho a tlun hlan, mah a ṭhalo tukmi caan ah cutin tuah cu a fawimi a si lo.—Gen. 6:5.

11. Nulepa cu fale cawnpiak awkah zeicah fakpi in an i zuam awk a si?

11 Nulepa na si ahcun Pathian fialmi zeitindah na “tuah dih” khawh? Jehovah bia ngaihnak thawngin a si. Na fale zohkhenhnak ah Jehovah lamhruainak zul. Baibal le bupi ruahnak cheuhnak hna kha hmang. A hnuah na fale cu na cungah an i lawm ko lai. Unaupa pakhat nih hitin a ṭial: “Ka nu le ka pa nih an ka zohkhenh ning cungah kaa lawm tuk. Ka lung suk khawh awkah an si khawh chungin an i zuam. Thlaraulei ka ṭhanchomi hi ka nu le ka pa bawmhnak thawngin a si.” Nulepa nih an fale kha an si khawh chungin an cawnpiak hna hmanhah an fale nih Jehovah kha an kaltak men ko lai. Asinain a si khawh chungin aa zuammi nulepa hna cu a ṭhami chiaṭha thleidannak an ngei kho i an fa zong nikhatkhat cu Jehovah sinah a kir ṭhan kho.

12, 13. (a) Fale buchung chuah an si tikah nulepa nih Pathian nawl an ngaih kha zeitindah an langhter khawh? (b) Chungkhar pakhat i nulepa nih Jehovah nawl an ngaih caah zeitindah ṭhatnak an hmuh?

12 Nawlngaihnak he aa tlaiin nulepa cheukhat caah a har bikmi hneksaknak pakhat cu buchung chuah a simi fale he pehtlaihnak ah a si. Buchung chuah a simi a fanu inn in a chuah tikah a nu nih hitin a ti: “Ka fanu le ka tunu pehtlaih khawhnak lam a um hnga maw tiah bupi chuahmi cauk ah ka kawl. Asinain ka vapa nih kan fanu cungah rian kan ngei ti lo, Jehovah cungah zumhfek tein kan um a hau tiah a ka ti.”

13 Kum tlawmpal hnuah an fanu cu buchung ah a rak lut ṭhan. A nu nih hitin a chim: “Atu cu nifate ti awk tlukin phone a ka chawnh, ca a ka kuat. Kan nuva in Pathian nawl kan ngaih caah a kan upat tuk. Atu cu a ṭha tukmi pehtlaihnak kan ngei cang.” Na fale pakhatkhat buchung chuah an si ahcun ‘Jehovah kha na lung chung dihlak in naa bochan’ lai maw? ‘Nangmah fimnak naa rinh lo’ kha na langhter lai maw? (Ptb. 3:5, 6) Jehovah chimhhrinhnak nih Jehovah cu zeitluk in dah a fim i zeitluk in dah a kan dawt ti a langhter kha i cinken. Na fale telin mi vialte caah  a Fapa a kan pek ti kha zeitikhmanh ah philh hlah. Pathian nih mikip kha zungzal nunnak hmuhter a duh hna. (2 Peter 3:9 rel.) Cucaah nulepa hna, Jehovah chimhhrinhnak le lamhruainak kha i bochan u. Nan caah a har hmanhah Jehovah nawl kha ngai u. Pathian chimhhrinhnak kha cohlang u law zeitikhmanh ah ralchanh hlah u.

Khrihfabu Ah

14. “Zumhawktlak le a fimmi sal” nih a kan pekmi Jehovah lamhruainak in zeitindah ṭhatnak kan hmuh khawh?

14 Jehovah nih Khrihfabu kha zohkhenh awk, huhphenh awk le cawnpiak awkah bia aa kam. Lam tampi in cutin a tuah. Tahchunhnak ah, Khrihfabu zohkhenh awkah a Fapa kha rian a pek i Jesuh nih zumhfek tein kan um khawh nakhnga a bawmmi thlarau rawl pek awkah “zumhawktlak le a fimmi sal” kha rian a pek. (Luka 12:42) Mah “sal” nih a sunglawimi lamhruainak le chimhhrinhnak a kan pek. Na ruahnak le na tuahsernak thlen awkah aan bawmmi phungchimnak pakhat na theihmi asiloah mekazin chung i na relmi capar kong kha na ruah khawh. Mah nih thlennak tuah awkah aan forh ahcun Jehovah cawnpiaknak in ṭhatnak na hmu tinak a si caah i lawm ko.—Ptb. 2:1-5.

15, 16. (a) Khrihfa upa pawl an rian in zeitindah ṭhatnak kan hmuh khawh? (b) Khrihfa upa nih an rian nuam tein an ṭuan khawh nakhnga zeitindah kan tuah khawh?

15 Khrih nih dawtnak he Khrihfabu a zohkhenhmi Khrihfa upa pawl zong a kan pek. Baibal nih mah pa hna kha “minung laksawng” tiah a ti hna. (Efe. 4:8, NW, 11-13) Khrihfa upa pawl an rian in zeitindah ṭhatnak kan hmuh khawh? An zumhnak le an tuahsernak kha kan i zohchunh khawh hna i Baibal hmangin a kan pekmi ruahnak cheuhnak kha kan zulh khawh. (Hebru 13:7, 17 rel.) Khrihfa upa pawl nih a kan dawt i Pathian he naihter a kan duh. Pumhnak kan baumi le kan lungthawhnak a zormi kha an hmuh tikah khulrang in an kan bawmh colh. Kan bia an kan ngaihpiak, dawtnak in tha an kan pek i Baibal in ruahnak an kan cheuh. An in bawmhnak kha Jehovah dawtnak in na hmu maw?

16 Khrihfa upa caah ruahnak an kan cheuhmi cu a fawi lo. Siangpahrang David nih a nganmi a sualnak thuh dingin aa zuam tikah profet Nathan caah David chimhhrinh cu zeitluk in dah a har lai ti khi ruathmanh. (2 Sam. 12:1-14) Lamkaltu 12 lakah aa telmi Peter nih Judah mi kha miphun dang hna nakin ṭha deuh in a pehtlaih hna tikah chimhhrinh awkah Paul nih ralṭhatnak a ngeih a hau. (Gal. 2:11-14) Cu a si ah Khrihfa upa caah ruahnak cheuh a fawimi na si nakhnga zeitindah na tuah khawh? I toidor, lawmhnak lungthin ngei law chawnh fawimi si. An in bawmhnak kha Pathian dawtnak langhtertu in hmu. Mah tikah ṭhatnak na hmu lai i Khrihfa upa pawl zong an rian ah an i nuam lai.

17. Khrihfa upa pawl nih unaunu pakhat kha zeitindah an bawmh?

17 Unaunu pakhat cu hlanah a tonmi thil ruangah Jehovah kha dawt awkah aa harh. Hitin a chim: “Hlanlio ka tonmi le thil dang ruangah ka lung a dong tuk i Khrihfa upa pawl he biaruah ka hau ti kha ka hngalh. Annih nih sualphawt loin thazaang tu an ka pek. Pumh a dih tik paohah zeitluk in an  rian a tam hmanhah a tlawm bik pakhat paoh nih zei na lawh tiah an ka hal. Hlanlio ka sining ruangah Pathian dawtnak hmuh awkah kaa tlak lo tiah ka ruah. Asinain Jehovah nih Khrihfabu le Khrihfa upa pawl hmangin atu le atu dawtnak a langhter. Zeitikhmanh ah Pathian he kan i pehtlaihnak cahter lo awkah thla ka cam.”

Chimhhrinhnak nakin a Ṭhalo deuhmi

18, 19. Chimhhrinhnak nakin a ṭhalo deuhmi cu zeidah a si? Tahchunhnak pe.

18 Chimhhrinhnak cu a fak ko lai nain Pathian chimhhrinhnak cohlan lo ruangah a chuakmi ṭhatlonak cu a fak chinchin. (Heb. 12:11) Kain le Siangpahrang Zedekiah i a ṭhalomi an tuahsernak in kan cawn khawh. Kain nih a naupa a huat i thah a duh ti kha Pathian nih a hmuh tikah hitin ralrin a pek: “Zeicahdah na thin a hun i na hmai a chiat? Ṭhatnak kha rak tuah law cu na merh ko hnga; sihmanhsehlaw ṭhatlonak kha na rak tuah caah sualnak nih cun nangmah tei awkah sahrang bantukin aan bawh ko. Nangmah kha uk aan duh, sihmanhsehlaw nangmah nih na tei awk a si.” (Gen. 4:6, 7) Kain nih Jehovah chimhhrinhnak kha a cohlang lo i a naupa kha a rak thah, mah ruangah a nunchung thil ṭihnung a rak tong. (Gen. 4:11, 12) Kain nih Pathian bia rak ngai sehlaw fahnak tampi a tong hnga lo.

19 Zedekiah cu a tha a dermi le a ṭhalomi siangpahrang a si. Amah nih a uk lioah Jerusalem mi hna cu thil ṭhalo an tong. Cucaah profet Jeremiah nih Zedekiah kha i thlen awkah atu le atu ralrin a pek. Asinain siangpahrang nih Jehovah chimhhrinhnak kha a cohlan lo caah ngaihchiatnak a rak tong. (Jer. 52:8-11) Jehovah nih a herh loin cu bantuk fahnak hna in ding kha a kan duhpiak lo.—Isaiah 48:17, 18 rel.

20. Pathian chimhhrinhnak a cohlangmi le a cohlang lomi nih zeidah an ton lai?

20 Tuchan vawlei mi tampi nih Pathian chimhhrinhnak kha capo ah an saih i zei ah an rel lo. Asinain cu bantuk mi hna cu a rauhhlan ah harnak an tong cang lai. (Ptb. 1:24-31) Cucaah ‘cawnpiaknak kha ngai u sih law fim hna’ u sih. Phungthlukbia 4:13 nih “cawnpiaknak kha i tlaih peng law thlah hlah; cucu zul peng tuah, na nunnak a si” tiah a ti.