A ummi cazin ah kal

A ummi cazin ah kal

“A Bami kha Thazaang a Pek hna”

“A Bami kha Thazaang a Pek hna”

“Jehovah aa bochanmi cu thazaang thar an la.”—ISA. 40:31.

HLA: 3, 47

1. Zei bantuk harnak cheukhat dah kan ton lai, asinain zumhfekmi a salle cungah Jehovah cu zeicah aa lawmh? (A hramthawknak hmanthlak zoh.)

HI CHAN ṭhalo nunnak cu a har tuk. Tahchunhnak ah, nan lak i tampi cu a zual tukmi zawtnak nan ngei. A cheu cu a tar cangmi an chungkhat pawl zohkhenh an hau. A dang tu cu an chungkhar pawcawmnak caah fakpi in an i zuam. Nan lak i tampi cu voikhat ah mah harnak hna lak i pakhat lawng kha si loin harnak tampi nan tong ti kha kan hngalh. Mah nih nan caan, nan thazaang le nan tangka tampi a dihter ko lai. Asinain Jehovah nih a kan bawmh lai ti kha nan zumh khawh. Mah cu Jehovah biakammi a si caah thil sining cu a ṭha deuh te lai ti kha nan hngalh. Nan zumhnak nih Jehovah lung a lawmhter taktak ko lai.

2. Isaiah 40:29 bia nih zeitindah thazaang a kan pek, asinain zei bantuk sualnak ngan dah kan tuah khawh?

2 Na tonmi harnak cu in awkah a har tuk tiah a caan ah na ruat maw? Na ruah ahcun nangmah lawng na si lo. Hlanlio zumhfekmi Pathian salle cheukhat zong nih cutin an ruah ve. (1 Si. 19:4; Job 7:7) Inkhawh awkah zeinihdah a bawmh hna?  Thazaang hmuh awkah Jehovah kha an rak i bochan. Pathian nih “a bami kha thazaang a pek hna” tiah Baibal nih a ti. (Isa. 40:29) Asinain ngaihchiat awk ngai a simi cu tuchan Pathian miphun cheukhat nih an tonmi buaibainak hna tei khawh awkah a ṭha bikmi lam cu biatak chungin chuah kha a si tiah an ruah. Jehovah biak kha thluachuah canah thilrit in an hun hmuh. Cucaah Baibal an rel ti lo, an i pum ti lo i phung an chim ti lo. Mah cu Satan nih tuahter a duhmi hna a si.

3. (a) Kan tha derter awkah Satan aa zuamnak kha zeitindah kan i kilven khawh? (b) Hi capar ah zei kong dah kan i ruah hna lai?

3 Satan nih ṭhawnter a kan duh lo. Jehovah biaknak ah kan rian a tam ahcun kan ṭhawng lai ti kha a hngalh. Cucaah pumsalei le thinlunglei in na bat tuk tikah Jehovah sinin i hlat hlah. Naih chinchin. Baibal nih “fehnak le thazaang . . . aan pek hna lai” tiah a ti. (1 Pet. 5:10; Jeim 4:8) Hi capar ah Jehovah nih thazaang a kan pek khawhnak kong kha Isaiah 40:26-31 in kan i ruah hna lai. Jehovah rianṭuannak ah tlawm deuh lawng a kan telter khomi thil sining pahnih zong kan i ruah hna lai. Cun inkhawhnak ngeih awkah a kan bawmmi Baibal phunglam zeitindah kan hman lai ti zong kan i ruah hna lai.

Jehovah aa Bochanmi cu Thazaang Thar an La

4. Isaiah 40:26 in zei kong dah kan cawn khawh?

Jehovah nih na tonmi buaibainak hna inkhawh awkah na herhmi thazaang aan pek khawh

4 Isaiah 40:26 rel. Van le vawlei ah arfi a dihlak in a rel khomi ahohmanh an um lo. Scientist pawl nih kanmah galaxy lawngah hin arfi billion 400 nak tam a um tiah an zumh. Asinain Jehovah nih cun arfi pakhat cio kha min a pek hna. Mah nih Jehovah kong zeidah a kan cawnpiak? Nunnak a ngei lomi arfi kong hmanh hngalh a duh ahcun nangmah kong chinchin cu zeitluk in dah hngalh a duh lai ti khi ruathmanh. Jehovah na biakmi cu na rian a si caah si loin na dawt caah a si. (Salm 19:1, 3, 14) Kan dawtmi kan Pa nih na kong vialte kha a hngalh dih. Baibal nih “nannih chinchin cu nan lu cung sam hmanh kha a rel dih” tiah a ti. (Matt. 10:30) Jehovah nih “a nawl a zulmi cu a zohkhenh hna” ti kha hngalhter a kan duh. (Salm 37:18) Jehovah nih na tonmi buaibainak vialte kha a hngalh dih i pakhat cio kha inkhawh awkah na herhmi thazaang aan pek khawh.

5. Jehovah nih thazaang a kan pek khawh ti kha zeitindah kan zumh khawh?

5 Isaiah 40:28 rel. Jehovah cu thazaang vialte Hram a si. Tahchunhnak ah, nika a pekmi thazaang kong kha ruathmanh. Science ca a ṭialtu David Bodanis nih sekanh pakhat ah nika nih a chuahmi thazaang cu atomic bomb billion tampi a puahmi thazaang nakin a ṭhawng deuh tiah a ti. A dang hlathlaitu pakhat nih nika nih sekanh pakhat lawngah a chuahmi thazaang cu vawleicung mi vialte nih kum 200,000 chungah an i zat dingmi thazaang a ngei tiah a ti. Cucaah nika thazaang a petu Jehovah nih kan tonmi buaibainak hna inkhawh awkah kan herhmi thazaang a kan pek khawh.

6. Zeiti lam in dah Jesuh seihnam cu bei a nuamh, mah nih zeitindah ṭhatnak a kan pek?

 6 Isaiah 40:29 rel. Jehovah biaknak nih lawmhnak tampi a kan pek. Jesuh nih a zultu hna kha hitin a ti hna: “Ka seihnam kha i bei u. . . . Dinhnak kha nan hmuh ko lai. Ka seihnam cu a bei a nuam i ka thil cu a zaang.” (Matt. 11:28-30) Mah cu a hmaan taktakmi a si. A caan ah i pumh awk le phungchim awkah inn in kan i thawh tikah kan ba tuk men ko lai. Asinain kan ṭin tikah zeitindah kan um? Hrimhnak kan hmu i kan tonmi buaibainak hna tei khawh awkah ṭha deuh in kan i tim kho. Jesuh a seihnam cu bei a nuam taktak ko.

7. Matthai 11:28-30 bia a hmaan ti a langhtermi hmuhtonnak pakhat in chim.

7 Unaunu pakhat hmuhtonnak hi ruathmanh. Anih cu caan saupi chung thadih, lungdongh le lufah zawtnak hna a tuarmi a si. Cucaah a caan ah i pumh cu a caah a har tuk tawn. Asinain nikhat cu aa pumh dih hnuah hitin ca a ṭial: “Phungchimnak cu lungdonghnak he aa tlaimi kong a si. Mah pumhnak ah ka theihmi nih ka thazaang a umter tuk i ka mitthli hmanh a tla. Mah nih pumhnak cu um ka herhnak hmun a si ti kha a ka hngalhter.” I pumh khawh dingin aa zuam caah aa lawm tuk.

8, 9. Lamkaltu Paul nih “ka derthawm tikah hin ka ṭhawn a rak si” tiah a ṭial tikah zeidah a chim duhmi a si?

8 Isaiah 40:30 rel. Thiamnak tampi kan ngei men ko lai nain kanmah thazaang in kan tuah khawhmi cu ri a ngei. Mah cu kan dihlak in kan hngalh a herhmi a si. Lamkaltu Paul nih thil tampi a tuah khawh ko nain a duhmi thil vialte kha cu a tuah kho lo. A intuarnak kha Jehovah sin a phuan tikah Jehovah nih “ka ṭhawnnak cu derthawmnak ah hin a lang” tiah a ti. Paul nih Jehovah bia kha a hngalhthiam. Cucaah “ka derthawm tikah hin ka ṭhawn a rak si” tiah a ti. (2 Kor. 12:7-10) Zeidah a chim duhmi a si?

9 Paul nih amah thazaang in a tuah khawhmi cu ri a ngei ti kha a hngalh. Ṭhawnnak tam deuh in ngeih awkah pakhatkhat sinin bawmhnak a herh. Paul cu a tha a der tikah Pathian thiang thlarau nih ṭhawnnak a pek khawh. A herhmi nak tam deuh hmanhin a pek khawh. Amah thazaang in a tuah khawh lomi thil hna liim awk zongah Pathian thiang thlarau nih ṭhawnnak a pek khawh. Kannih zong cutin a kan pek khawh ve. Jehovah nih a thiang thlarau a kan pek ahcun ṭhawnnak taktak kan ngei lai.

10. Jehovah nih David kha a tonmi harnak hna inkhawh awkah zeitindah a rak bawmh?

10 Salm caṭialtu David cu Pathian thiang thlarau nih ṭhawnnak a pekmi kha a hmuh tawn. Hitin hla a sa: “Ka ral hna doh khawhnak thazaang a ka pek, an ralhau baoh khawhnak ṭhawnnak a ka pek.” (Salm 18:29) A sang tukmi vanpang cu kai khawh a si lo bantukin a caan ah kan tonmi buaibainak hna cu an ngan tuk caah kanmah thazaang in tawnghtham khawh a si lo. Mah tikah Jehovah bawmhnak kan herh.

11. Thiang thlarau nih kan tonmi buaibainak hna inkhawh awkah zeitindah a kan bawmh?

11 Isaiah 40:31 rel. Mupi cu amah thazaang lawng hmangin thli lakah a zuang kho lo. Thli lum in a chuakmi ṭhawnnak nih van ah a cawi. Mah nih mupi cu lamhlapi tiang a zuanter khawh i thazaang zong a khonter khawh. Cucaah harnak nih aan nenh tikah mupi kong kha ruat. “Bawmtu, thiang  thlarau” hmangin ṭhawnnak tampi aan pek nakhnga Jehovah kha nawl. (Johan 14:26) Jehovah nih a thiang thlarau kha nikhat ah suimilam 24, zeitik caan paohah a kan pek nakhnga kan hal khawh. Khrihfabu i unau pakhatkhat he kan lung aa khah lo tikah a hleiin Jehovah bawmhnak kan hal a hau. Asinain cu bantuk lung i khah lonak cu zeicah a um?

12, 13. (a) Khrihfa hna lakah a caan ah zeicah lung i khah lonak a um? (b) Josef kong nih Jehovah kong he aa tlaiin zeidah a kan cawnpiak?

12 Kan dihlak in mitlinglo kan si caah lung i khahlonak a um kho. A caan ah midang nih an chimmi asiloah an tuahmi nih kan thin a hunter khawh asiloah kanmah nih an thin kan hunter khawh hna. Mah cu a har tukmi hneksaknak a si kho men. Asinain mah nih Jehovah cungah zumhawktlak tein umnak caanṭha a kan ngeihter. Zeitin in dah? Unau pawl he lungrual tein rian ṭuanṭi awkah kan cawnnak thawngin a si. Unau pawl cu mitlinglo an si ko nain Jehovah nih a dawt hna caah kanmah zong nih kan dawt ve hna awk a si.

Jehovah nih Josef kha a kaltak lo i nang zong aan kaltak lai lo (Catlangbu 13 zoh)

13 Jehovah nih a salle kha hneksaknak ton lo dingin a huhphenh hna lo. Mah cu Josef kong in kan hngalh khawh. Josef cu a ngakchiat lio tein a ule nih an rak nahchuah. Cucaah sal in an zuar i Izipt ram ah kalpi a si. (Gen. 37:28) Jehovah nih a tonmi thil kha a dikthliar in a hmuh i zumhfekmi a sal le a hawi a simi Josef a ding lopi in pehtlaih a simi a hmuh tikah a lung a fak tuk lai ti cu a fiang ko. Asinain Jehovah nih thil sining kha a kham lo. A hnuah Potifar nupi nih tlaihhrem a ka timh tiah sual a puh i thongthlak a si tik zongah Jehovah nih Josef kha a khamh lo. Mah cu Pathian nih a hlawt tinak a si maw? A si lo. “BAWIPA nih khan Josef cu a umpi i a tuahmi paoh kha a tlam a tlinter” tiah Baibal nih a ti.—Gen. 39:21-23.

14. Thinhun in kan um lo tikah zeitindah ṭhatnak kan hmuh?

14 A dang tahchunhnak pakhat cu David a si. Tam deuh nih cun David bantukin a ding loin pehtlaihnak cu kan tong theng lai lo. Asinain mah Pathian hawipa nih thinhunnak kha aa ukter lo. Hitin a ṭial. “Thinhung in um hlah u, hrut sual hlah u! Lungrethei  in um hlah u! Cu nih cun zeihmanh aan ṭhathnem hna lai lo.” (Salm 37:8) Thinhun in ‘um lo’ awkah a biapi bikmi a ruang cu ‘kan sualnak ningin a kan lehrulh lomi,’ Jehovah kha i zohchunh kan duh caah a si. (Salm 103:10) Thinhun in umlonak thawngin hmuhmi a dang ṭhatnak tampi a um rih. Tahchunhnak ah, thinhunnak nih thi a kaiter khawh i thawchuah hmaan loin a umter khawh. Cun thin le pawpi zawtnak a chuahter khawh. Kan thin a hun tikah ṭha tein khua zong kan ruat kho ti lo. Kan chimmi asiloah kan tuahmi nih midang lung a fahter khawh i mah nih caan saupi chung lungnuam loin a kan umter khawh. Cucaah dai tein um cu a ṭha deuh. “Lungdaihnak nih pum kha a ngan a damter” tiah Baibal nih a ti. (Ptb. 14:30) Midang nih kan lung a kan fahter tikah zeidah kan tuah khawh, unau pawl he daihnak zeitindah kan ser khawh? Baibal ruahnak cheuhnak kan zulhnak thawngin a si.

Unau pawl Ruang i Kan Ngaih a Chiat tikah

15, 16. Pakhatkhat nih kan lung a kan fahter tikah zeidah kan tuah awk a si?

15 Efesa 4:26 rel. Jehovah a bia lomi hna nih a ding loin an kan pehtlaih tikah kan khuaruah a har lo. Asinain unau asiloah chungkharmi pakhatkhat nih an chimmi asiloah an tuahmi nih kan lung a fahter tikah kan ngaih a chia tuk. Kan tonmi thil kha kan philh khawh lo ah tah zeitin? Kum tampi chung kan thin kan i hunter lai maw? Asiloah thil sining tawnghtham colh awkah Baibal ruahnak cheuhnak kha kan zul lai maw? Thil sining tawnghtham loin saupi kan um ahcun unau pawl he daihnak ser awkah a har chinchin lai.

16 Unau pakhat ruangah na lung a fak i mah kong kha ruat loin na um khawh lo ah tah zeitin? Daihnak ser awkah zeidah na tuah khawh? Pakhatnak ah, Jehovah sinah thla na cam kho. Na unau he ṭha tein nan i chawnhbiak khawh nakhnga bawmhnak hal. Anih zong Jehovah hawikom a si ve ti kha philh hlah. (Salm 25:14) Anih cu Pathian nih a dawt. Jehovah nih a hawile kha zaangfahnak he a pehtlaih hna i cutin pehtlaih ve awkah kan sinin aa ruahchan. (Ptb. 15:23; Matt. 7:12; Kol. 4:6) Pahnihnak ah, na unau sinah na chim dingmi bia hna kha ṭha tein ruat. Ka lung fahter a duh ti in ruat hlah. Mah cu thil sining na theihthiam lomi a si kho men. Buaibainak chuahternak ah kaa tel kho ti kha cohlang. Hitin biaruahnak na thawk khawh: “A hleihluat tuk in kaan lehrulhmi a si kho men, asinain nizan i bia na chim lioah khan ka . . . ” Cutin biaruahnak nih nangmah le na unau karah daihnak a chuahter lo hmanhah i zuam peng. Na unau caah thla cam. Thluachuah a hmuh nakhnga le a ngeihmi ziaza ṭha hna ah lungthin na pek khawh nakhnga Jehovah sinah bawmhnak hal. Pathian hawi a si vemi na unau he daihnak ser awkah lungtak in naa zuammi kha Jehovah nih a duh lai ti kha na zumh khawh.

Hlanlio Kan Tuahsernak ruangah Ka Sual timi Ruahnak Kan Ngeih tikah

17. Palhnak kan tuah tikah Jehovah nih amah he kan i pehtlaihnak ṭhatter ṭhan awkah zeitindah a kan bawmh, mah bawmhnak kha zeicah kan cohlan awk a si?

17 Mi cheukhat cu sualnak ngan an tuah caah Jehovah biak awkah kaa tlak lo timi ruahnak an ngei. Ka sual timi ruahnak nih daihnak, lawmhnak le thazaang kan ngeihmi  a tlauter khawh. Siangpahrang David nih ka sual timi ruahnak kha a doh i hitin a chim: “Ka sualnak kha ka phuan hna lo tikah chun nitlak in ka ṭap. BAWIPA, chunzan in dan na ka tat i ka thazaang cu a dihlak in a zor.” Lunglawmh awk ngai a simi cu Jehovah nih a salle tuahter a duhmi hna kha David nih ralṭha tein a rak tuah. Hitin a ṭial: “Khi tikah ka sualnak cu nangmah sinah ka phuan hna; . . . ka nawlbuarnak vialte cu na ka ngaihthiam dih.” (Salm 32:3-5) Sualnak ngan na tuah tikah Jehovah cu ngaihthiam awkah timhcia a si. Amah he nan i pehtlaihnak ṭhatter ṭhan dingin naa zuammi kha bawmh aan duh. Asinain Khrihfa upa hmangin aan pekmi bawmhnak kha na cohlan a hau. (Ptb. 24:16; Jeim 5:13-15) Cucaah hngak hlah, zungzal nunnak na hmuh dingmi cu mah cungah aa hngat. Asinain ngaihthiam na si hnupi hmanhah ka sual timi ruahnak na ngei rih men lai. Mah tikah zeidah na tuah khawh?

18. Jehovah biak awkah kaa tlak lo timi ruahnak a ngeimi hna kha Paul kong nih zeitindah a bawmh khawh hna?

18 Lamkaltu Paul cu hlanah a rak tuahmi sualnak ruangah a lung a dongh caan a tampi. Hitin a chim: “Pathian Khrihfabu kha ka rak hrem hna i cucaah cun lamkaltu vialte hna lakah nauta bik ka si, a ngaingai ti ahcun lamkaltu ti awk hmanh kaa tlak hrimhrim lo.” Asinain Paul nih “Pathian vel thawngin atu i ka sining hi ka si” tiah a ti. (1 Kor. 15:9, 10) Jehovah nih Paul cu mitlinglo a si ti kha a hngalh. Asinain Paul kha a cohlan i a sining kha hngalhter a duh. Na rak tuahmi thil he aa tlaiin naa ngaihchih taktak i mah kong kha Jehovah sinah na phuan, a herh ahcun Khrihfa upa sin na phuan tikah Jehovah nih aan ngaihthiam hrimhrim lai. Jehovah nih aan ngaihthiam lai kha zum law aan ngaihthiamnak kha cohlang.—Isa. 55:6, 7.

19. 2018 kumcaang Baibal cu zeidah a si, mah cu zeicah a herh?

19 Hi chan donghnak kan naih thluahmah bantukin buaibainak zong a tam chinchin lai ti kha kan i ruahchan khawh. ‘A dermi le a bami thazaang a petu’ Jehovah nih zumhfek tein amah na biak khawh nakhnga na herhmi zeipaoh aan pek lai ti kha na zumh khawh. (Isa. 40:29; Salm 55:22; 68:19) 2018 chungah Biakinn i kan i pumh tik le “Jehovah aa bochanmi cu thazaang thar an la” timi kumcaang Baibal kan hmuh tik paohah mah a biapi tukmi biatak hi kan hngalh lai.—Isa. 40:31.