A ummi cazin ah kal

A ummi cazin ah kal

Zei Bantuk Dawtnak nih dah Lawmhnak Taktak a Chuahpi?

Zei Bantuk Dawtnak nih dah Lawmhnak Taktak a Chuahpi?

“An Pathian ah Bawipa a simi hna cu lunglawmmi an si.”—SALM 144:15.

HLA: 28, 25

1. Kan chan cu a dang chan he zeicah aa dan tuk?

MINUNG tuanbia lakah aa thleidang bikmi caan ah kan nung. Baibal nih a chimchung bantukin Jehovah nih “phun kip, ram kip, holh kip le hrin kip chungin a rami” mibu nganpi kha a pumh hna. Annih cu ‘chun zan in Pathian rian a ṭuan’ i aa nuammi, nuai riat leng a simi “a ṭhawngmi miphun” kha an si. (Biat. 7:9, 15; Isa. 60:22) Hlanah Pathian le a minunghawi a dawmi hi mah tluk tam in an um bal lo.

2. Pathian hawikom a si lomi hna lakah a ping ah mi a hruaimi zei bantuk dawtnak dah kan hmuh? (A hramthawknak hmanthlak zoh.)

2 Baibal nih kan chan he aa tlaiin Pathian hawikom a si lomi hna cu a ping ah mi a hruaimi dawtnak, phundang cun mahzawn lawng ruahnak lungput an ngei lai ti zongin a chimchung. Lamkaltu Paul nih ni hmanung bik caan ah mi cu “anmah zawn lawng aa ruatmi, a hak a kaumi” le ‘Pathian nakin nuamhnak a duh deuhmi’ an si lai tiah a ti. (2 Tim. 3:1-4) Mahle mah biapi bik ah aa chiami cu bantuk dawtnak cu Pathian dawtnak he aa ralkahmi a si. Mahzawn lawng ruahnak nih mi kha an i ruahchanmi  bantukin nuamhnak a pe hna lo. Mah canah mahzawn ruahnak lungput kha a karhter i mikip kha harnak a pek hna.

3. Hi capar ah zei kong dah kan i ruah hna lai? Zeicah?

3 Lamkaltu Paul nih mahzawn ruahnak lungput cu a karh tuk lai i Khrihfa hna caah ṭihnung a si lai ti kha a hngalh. Cucaah mahzawn lawng aa ruatmi hna kha hrial awkah ralrin a pek hna. (2 Tim. 3:5) Asinain cu bantuk mi hna he i pehtlaihnak vialte cu kan hrial kho lai lo. Cu a si ah kan pawngkam mi hna lungput in i kilven awk le dawtnak Pathian, Jehovah lungton awkah zeidah kan tuah khawh? Pathian nih ngeihter a kan duhmi dawtnak le 2 Timote 3:2-4 ah langhtermi dawtnak aa dannak kha zohhmanh hna u sih. Cun kanmahle kanmah i check hna u sih law lungsinak le nuamhnak taktak a kan pemi dawtnak phun zeitindah kan langhter khawh ti kha zohhmanh hna u sih.

Pathian Dawtnak maw asiloah Mahle Mah Dawtnak dah?

4. Mahle mah i dawt cu zeicah a palh lo?

4 Paul nih “mi cu anmah zawn lawng aa ruatmi . . . an si lai” tiah a ti. Mahle mah i dawt hi a palh tinak a si maw? A si lo, mahle mah i dawt cu a phung a si i a herhmi zong a si. Jehovah nih cutin i dawt awkah a kan sermi kan si. Jesuh nih “na innpa kha nangmah naa dawt bantukin na dawt lai” tiah a ti. (Mar. 12:31) A tak ti ahcun kanmahle kanmah kan i dawt lo ahcun midang kha kan daw kho hna lai lo. Baibal zong nih hitin a ti: “Pa nih an nupile cu anmah pum an i dawt bantukin an dawt hna awk a si. A nupi a dawmi pa cu amahle amah aa dawt a si ko. Ahohmanh nih mah pum kha an hua bal lo. . . . A pum cu a zoh a khenh i a cawm.” (Efe. 5:28, 29) Cucaah mahle mah kan i dawt awk a si ti cu a fiang ko.

5. Anmahle anmah aa daw tukmi hna kha zeitindah na hmuh hna?

5 2 Timote 3:2 ah kan hmuhmi mahle mah dawtnak cu a phung a simi asiloah a ṭhami dawtnak phun a si lo. Mah cu mahzawn lawng ruahnak kha a si. Mi pakhat nih amahle amah aa dawt tuk ahcun a herhmi lengin amahle amah kha aa ruat lai. (Rom 12:3 rel.) Midang nakin amah kong kha biapi deuh ah a chiah lai. Thil sining a ṭhat lo tikah amah canah midang tu kha a mawhchiat hna lai. Cu bantukin mahzawn lawng aa ruatmi minung cu nuamhnak taktak an hmu kho lai lo.

Pathian nih ngeihter a kan duhmi dawtnak nih a ṭhami ziaza tampi a kan ngeihter

6. Pathian kan dawt tikah zei ṭhatnak dah a chuak?

6 Paul nih donghnak caan ah a karh tuk dingmi, a ṭha lomi ziaza pawl a langhter tikah mahle mah dawtnak kha hmasa bik ah a langhtermi cu mah nih a hnuah a langhtermi a ṭha lomi ziaza pawl kha a chuahter caah a si tiah Baibal lei mifim cheukhat nih an ruah. Mah he i ralkah in Pathian dawtnak nih cun a ṭhami ziaza tampi a kan ngeihter. Mah cu lawmhnak, daihnak, lungsaunak, zaangfahnak, ṭhatnak, zumhnak, toidornak le mahle mah i tei khawhnak hna he aa pehtlai. (Gal. 5:22, 23) Salm caṭialtu pa nih “an Pathian ah  Bawipa a simi hna cu, lunglawmmi an si” tiah a ṭial. (Salm 144:15) Jehovah cu aa nuammi Pathian a si i a mi pawl zong an i nuam ve. Mahle mah aa daw tukmi hna le hmuhnak lei lawng a ruatmi hna he i ralkah in Jehovah salle cu midang peknak ah an i lawm.—Lam. 20:35.

Mahle mah aa dawmi, tangka a duh tukmi le nuamhnak a duhmi sinak kha zeitindah kan hrial khawh? (Catlangbu 7, 13, 18 zoh)

7. Pathian kan dawtnak i check awkah zei biahalnak hna nih dah a kan bawmh lai?

7 Mahle mah kan i dawtnak cu Pathian kan dawtnak nakin a ṭhawng deuh maw, ṭhawng deuh lo ti kha zeitindah kan hngalh khawh? Mah ruahnak cheuhnak hi ruathmanh: “Pakhat le pakhat i entainak le mah pumpak thangṭhat kawlnak kha nan lakah umter hlah u. Toidornak lungthin tu kha ngei cio u law midang nakin ka ṭha deuh tiah zeitikhmanh ah vaa ruat hlah u. Cun midang duhning kha hmuhthiam i zuam u law nanmah duhnak lawng kha ruat hlah u.” (Fil. 2:3, 4) Hitin kan i hal kho: ‘Mah ruahnak cheuhnak hi ka zul maw? Pathian nih tuahter a ka duhmi kha tuah awkah kaa zuam maw? Khrihfabu ah le phungchimnak ah midang bawmh khawhnak lam ka kawl maw?’ A zungzal in kan caan le kan thazaang pek cu a fawi lo. Cucaah fakpi in i zuam le mahca ṭhatnak hlawt a hau. Asinain van le vawlei ah Cungnung Bik mithmai ṭha kan hmu timi hngalhnak nakin a kan nuamhter kho deuhmi zeithil hmanh a um lo.

8. Khrihfa cheukhat nih Pathian an dawt caah zeidah an tuah?

8 Khrihfa cheukhat cu Pathian an dawt ca le a rian ah tam deuh in tel an duh caah a ṭha tukmi an rian kha an hlawt. Siibawi a simi Ericka nih siilei a rian nakin hmaikal rian tu kha ṭuan awkah aa thim. Cucaah a vapa he ram tampi ah Pathian rian an ṭuan. Hitin a chim: “Ramdang holh hmannak lohmun ah kan ṭuanmi nih hmuhtonnak tampi a kan  ngeihter, hawikom zong a kan ngeihter i kan nunnak ah rumnak taktak kan hmu.” Ericka cu siibawi rian a ṭuan ko nain a caan le a thazaang tam deuh kha Jehovah kong midang cawnpiaknak le unau pawl bawmhnak caah a hman. Mah nih “lungtak tein i nuamhnak le lungsi hnangamnak” a ka pek tiah a ti.

Vancung Rumnak maw asiloah Vawlei Rumnak dah?

9. Tangka a duh tukmi pakhat nih zeicah lawmhnak a hmuh lo?

9 Paul nih mi cu “a hak a kaumi” an si lai tiah a ṭial. A luancia kum tlawmpal lioah Ireland ah a ummi hmaikal pakhat nih mipa pakhat kha Pathian kong a chimh. Mah pa nih a tangka bawm kha a kau i a tangka kha a lak i “mah hi ka pathian a si” tiah a ti. Mi tampi nih mah bia cu an chim lo nain cu bantuk ruahnak an ngei ve. Tangka in an duhmi thil an cawk khawh caah tangka kha an duh tuk. Asinain Baibal nih hitin ralrin a kan pek: “Tangka duhmi na si ahcun, zeitikhmanh ah kaa za cang na ti kho bal lai lo. Rum a duhmi na si ahcun, na duhmi vialte kha cu na hmu kho bal lai lo.” (Pct. 5:10) Tangka a duhmi nih cun zeitikhmanh ah a za cang timi ruahnak a ngei bal lo. Tangka kha tam chinchin in hmuh a duh i hmuh khawh awkah a caan vialte kha a hman. Mah nih “ngaihchiatnak a phunphun” a tonter khawh.—1 Tim. 6:9, 10.

10. Baibal nih rumnak le sifahnak kong he aa tlaiin zeidah a chim?

10 Kan dihlak in tangka kan herh ti cu a hmaan ko. Mah nih huhphenhnak cheukhat a kan pek khawh. (Pct. 7:12) Asinain a hrampi a herhmi caah kan i zatnak men in kan i nuam kho lai maw? Kan i nuam kho ko. (Phungchimtu 5:12 rel.) Jakeh fapa Agur nih hitin a ṭial: “Chamhbaunak siseh, rumnak siseh, ka pe hlah; ka ca i a herhmi rawl in ka cawm ko.” Mah pa nih sifah a duh lonak a ruang kha fawi tein kan hngalh khawh. Firnak nih Pathian thang a chiatter khawh caah fir dingin lemsoi a si lai a duh lonak kong kha a chim. Asinain zeicah rum tah a duh lo? Hitin a ṭial: “Zeicahtiah tam tuk ka ngeih ahcun kaan hlawt sual lai i, ‘BAWIPA cu aho hen dah a si?’ ka ti sual lai.” (Ptb. 30:8, 9) Pathian nakin rumnak aa bochan deuhmi mi hna kha na hngalh men ko hna lai.

11. Tangka kong he aa tlaiin Jesuh nih zeidah a chim?

11 Tangka a duh tukmi pakhat nih cun Pathian lung a tong kho lo. Jesuh nih hitin a ti: “Ahohmanh bawi pahnih sal nan si kho lai lo; pakhat kha nan dawt deuh lai i pakhat kha nan huat deuh lai; pakhat sinah khan cun zumhawktlak tein nan um lai i pakhat tu kha cu zei ah nan rel lai lo. Pathian le tangka cu an rian nan ṭuan kep kho lai lo.” Cun hitin a ti chap: Rungrul le cirik nih an ei khawh i mifir nih an baoh khawh i an fir khawhnak vawlei ah hin nan chaw va khong hlah u. Rungrul le cirik nih an ei khawh lonak le mifir nih an baoh i an fir khawh lonak vancung khua tu ah khin nan chaw cu va khong u.”—Matt. 6:19, 20, 24.

12. Nunning sawhsawh tein nunnak nih Pathian rian ṭuan awkah zeitindah a kan bawmh khawh? Tahchunhnak pe.

12 Jehovah salle tampi cu nunning sawhsawh tein nun an i zuam. Jehovah rian ah tam deuh in i tel khawhnak lam kha an kawl i mah nih nuamhnak a hmuhter hna. United States ah a ummi Jack nih a nupi he hmaikal an ṭuan khawh nakhnga a inn nganpi le a rian kha a zuar. Hitin a chim: “Aa dawh tukmi kan inn le kan thilri pawl hlawt cu a har ngai. Mah  hlan kum tampi lioah cun rian ah buaibainak a um caah lungretheih buin inn ah ka ṭin tawn. Hmaanhmaan hmaikal a ṭuanmi ka nupi tu cu aa nuam zungzal. Ka nupi nih ‘kei cu a rum bikmi rianngeitu ka ngei!’ tiah a ti. Atu cu hmaikal ka ṭuan ve cang i kan pahnih in Jehovah sinah rian kan ṭuanṭi.”

Tangka kong he aa tlaiin Baibal chimmi ka zumh taktak kha ka nunnak ah ka langhter maw?

13. Tangka kong he aa tlaiin kan hmuhning i dothlat awkah zeinihdah a kan bawmh khawh?

13 Tangka kong he aa tlaiin kan hmuhning kan i dothlat tikah hitin kan i hal a hau: ‘Tangka kong he aa tlaiin Baibal chimmi ka zumh taktak kha ka nunnak ah ka langhter maw? Ka caah tangka hi a biapi bikmi a si maw? Jehovah le midang he kan i pehtlaihnak nakin thilri chawva kha biapi deuh ah ka chia maw? Ka herhmi thilri Jehovah nih a ka pek lai ti kha ka zum taktak maw?’ Amah aa bochanmi hna cu Jehovah nih zeitikhmanh ah an lung a donghter hna lai lo ti kha kan zumh khawh.—Matt. 6:33.

Jehovah maw asiloah Nuamhnak dah Kan Duh Deuh?

14. Nuamhnak he aa tlaiin a tlarimi hmuhnak cu zeidah a si?

14 Baibal nih ni hmanung bik ah mi cu ‘nuamhnak a duhmi’ an si lai ti zongin a chimchung. Kanmahle kanmah, cun tangka he aa tlaiin a tlarimi hmuhnak ngeih cu a palh lo ti kan hngalh. Cu bantukin nuamhnak he aa tlaiin a tlarimi hmuhnak ngeih zong a palh lo ti kha kan hngalh. Mi cheukhat nih zei bantuk nuamhnak hmanh kan tuah awk a si lo tiah an ruah. Asinain mah cu Jehovah nih a kan duhpiakmi a si lo. Baibal nih zumhfekmi Pathian salle hna kha hitin tha a pek hna: “Va kal ko, na rawl cu va ei law va nuam ko, na zu cu va ding law na tha va nuam ko.”—Pct. 9:7.

15. ‘Nuamhnak a duhmi’ timi bia nih zeidah a chim duhmi a si?

15 2 Timote 3:4 nih nuamhnak a duhmi hna le Pathian a kaltakmi hna kong a chim. Mah Baibal caang nih Pathian nakin nuamhnak an duh deuh lai tiah a timi kha i cinken. Mah cu Pathian cungah dawtnak tlawmpal an ngei tinak a si. Asinain Baibal lei mifim pakhat nih hitin a ṭial: “Mah Baibal caang nih zeitluk in dah Pathian an dawt ti kha a langhter duhmi a si lo. Pathian an daw lo ti kha a langhtermi a si.” Mah cu nuamhnak a duhmi hna caah ralrin peknak taktak a si. Baibal nih nuamhnak a duhmi hna kha an nunnak ah nuamhnak nih “a rial dipmi” hna bantukin a langhter.—Luka 8:14.

16, 17. Jesuh nih nuamhnak he aa tlaiin zeitindah zohchunh awk ṭha a chiah?

16 Nuamhnak he aa tlaiin a tlarimi hmuhnak ngeih timi a sullam kha Jesuh nih a langhter. Jesuh cu “nupi ṭhitnak” puai le “rawl danghnak nganpi” ah a rak kal. (Johan 2:1-10; Luka 5:29) Nupi ṭhitnak puai ah mitsur zu a za in a um lo caah Jesuh nih ti kha khuaruahhar lam in mitsur zu ah a thlen. Caandang ah ei le din kong he aa tlaiin Jesuh kha mi nih sual an phawt tikah a tlarimi hmuhnak an ngeih lonak kha fiang tein a langhter.—Luka 7:33-36.

17 Asinain Jesuh nih nuamhnak kha a  nunnak ah a biapi bikmi thil in a chia lo. Jehovah kha pakhatnak ah a chiah i midang bawmhnak caah a tuah khawhmi thil vialte kha a tuah. Minung khamhnak caah thing cung i fahnak in buin thih kha a duh. Jesuh nih a hnu zulh a duhmi hna kha hitin a ti hna: “Nannih cu ka zultu nan si ruangah mi nih an in nihsawh hna i an in hrem hna i lih a phunphun an in puh hna tikah nan caah lunglawmh awk a va si dah! Nan lung i lawm u law nan thanuam ko u, zeicahtiah vancung khua ah laksawng tampi chiahpiak nan si ko. Cu bantuk cun pei nan hlan i a rak ummi profet hna kha an rak hrem hna cu.”—Matt. 5:11, 12.

18. Nuamhnak zeitluk in dah kan duh ti i check awkah zei biahalnak hna nih dah a kan bawmh lai?

18 Nuamhnak zeitluk in dah kan duh ti i check awkah zeinihdah a kan bawmh lai? Hitin kan i hal kho: ‘Ka caah nuamhsaihnak cu pumhnak le lohmun nakin a biapi deuh maw? Pathian rian ṭuan khawh awkah ka tlaihchanmi thil cheukhat hlawt kha ka duh maw? Nuamhsaihnak kaa thim tikah mah hi Jehovah nih zeitindah a hmuh lai ti kha ka ruat maw?’ Pathian kan dawt i a lung lawmhter kan duh caah a palh ti kan hngalhmi lawng si loin Pathian lung a lawmhter lai lo ti kan ruahmi thil hna hmanh kha ralring tein kan hrial.—Matthai 22:37, 38 rel.

I Nuamh Khawh Ning

19. Ahote dah nuamhnak taktak a hmu kho lai lo?

19 Satan vawlei ah minung nih kum 6,000 hrawng harnak kan tong cang. Hi chan donghnak caan i vawleicung ah mahle mah aa dawmi, tangka a duh tukmi le nuamhnak a duhmi in an khat. An hmuh khawhmi thil lawng kha an ruat i anmah duhnak kha biapi ah an chiah. Asinain cu bantuk minung cu nuamhnak taktak an hmu kho lai lo. Mah canah Baibal nih hitin a ti: “Jakob Pathian kha bawmtu ah aa serhmi cu mi lunglawm a si, BAWIPA a Pathian kha aa hngatchanmi cu mi lunglawm an si.”—Salm 146:5.

20. Pathian na dawtnak nih zeitindah aan nuamhter khawh?

20 Jehovah salle nih cun Jehovah kha an dawt taktak. Kum fatin a dang mi tampi zong nih Jehovah kha an hun hngalh i an dawt ve. Mah nih Pathian Pennak nih a uk cang ti kha a langhter. A rauhhlan ah mah Pennak nih kan ruah khawh lengin thluachuah a kan pek cang lai. Jehovah duhnak kan tuah tikah a lung kan lawmhter lai i mah nih nuamhnak taktak a kan hmuhter ve lai. Jehovah a dawmi hna cu zungzal in an i nuam lai. A hnu capar ah mahle mah dawtnak nih a chuahtermi a ṭhalomi ziaza cheukhat kong kan i ruah hna lai. Mah cu Jehovah salle ngeihmi a ṭhami ziaza he zeitindah an i dan ti zong kan i ruah hna lai.