A ummi cazin ah kal

A ummi cazin ah kal

Jakob nih Esau sinin fater sinak a cawk caah Jakob cu Messiah hringsortu a si maw?

Careltu Hna Sinin Biahalnak

Careltu Hna Sinin Biahalnak

Hlanlio Israel ah Messiah hringsortu ding cu fater si a hau maw?

Hebru 12:16 chung i bia ruangah hlanah cun a hau tiah kan rak ruah. Mah Baibal caang nih Esau kha “thlaraulei thil zeihmanh i a rel lomi” le Jakob sinah “rocotu sinak [fater sinak, NW] kha rawl voikhat ei men ah a zuar” tiah a langhter. Cucaah Jakob nih “rocotu sinak” kha a hmuh tikah Messiah hringsortu sinak tinvo sung a hmuh tiah kan ruah.—Matt. 1:2, 16; Luka 3:23, 34.

Asinain a dang Baibal tuanbia hna ṭha tein hlathlai tikah Messiah hringsortu si awkah rocotu a simi fater si a hau lo ti a lang. Mah lakin a kong cheukhat kha i ruah hna u sih:

Jakob nih Leah he a hrinmi a fater cu Reuben a si i Rachel he a hrinmi a fater cu Josef a si. Reuben nih nupa sualnak a tuah caah a fater sinak kha a sung i mah tinvo kha Josef nih a hmuh. (Gen. 29:31-35; 30:22-25; 35:22-26; 49:22-26; 1 Chan. 5:1, 2) Asinain Messiah cu Reuben le Josef hrinsor a si lo. Jakob le Leah an fapa palinak Judah hrinsor a si.—Gen. 49:10.

Luka 3:32 ah Messiah hringsortu a dang panga kan hmuh hna i an dihlak in fater si dawh an si. Tahchunhnak ah, Boaz cu Obad pa a si i Obad cu Jesse pa a si.—Ruth 4:17, 20-22; 1 Chan. 2:10-12.

Asinain David cu Jesse fater a si lo. Anih cu fapa pariat lakah a hniang bik a si. Asinain Messiah cu David hrinsor a si. (1 Sam. 16:10, 11; 17:12; Matt. 1:5, 6) Cu bantukin David fater a si lomi Solomon  zong Messiah hringsortu a si.—2 Sam. 3:2-5.

Mah cu fater sinak cu a biapi lo tinak a si lo. Fater nih cun a dang nih an hmuh lomi tinvo sung hna a hmuh. Mah lengah innchungkhar lu sinak nawl a hmu i ro kha a lethnih in a hmuh.—Gen. 43:33; Deut. 21:17; Josh. 17:1.

Asinain fater sinak cu mi pakhat sinin a dang sinah aa thleng kho. Abraham nih Ishmael kha lamhla i a kalter tikah fater sinak cu Isak sinah a phan. (Gen. 21:14-21; 22:2) Kan i ruah cang bantukin Reuben fater sinak cu Josef nih a hmuh.

Lamkaltu Paul nih Hebru 12:16 ah zeidah a langhter? Hitin kan hmuh: “Ahohmanh nu le pa sualnak tuah hlah u, thlaraulei thil zeihmanh i a rel lomi Esau bantuk zong si hlah u, anih nih cun rocotu sinak kha rawl voikhat ei men ah a zuar ko.”

Mah Baibal caang ah hin Paul nih Messiah hringsortu kong a chimmi a si lo. Mah canah Khrihfa pawl ralrin a pekmi hna a si. Hitin a ti hna: “Pathian vel kha ahohmanh nih nan mertak sual nakhnga lo” “a ping a pang ah nan ke hlang sual lo tein um u.” An ziaza a rawhral ahcun Pathian vel an hmu kho lai lo. (Heb. 12:12-16) Amah pumsa duhnak tlinter a duhmi, “thlaraulei thil zei ah a rel lomi” Esau bantuk an si lai.

Mah lio caan i nunphung ningin Esau nih Jehovah sinah raithawinak caanṭha a hmuh ko lai. (Gen. 8:20, 21; 12:7, 8; Job 1:4, 5) Asinain Esau nih amah pumsa duhnak kha biapi tuk ah a chiah caah fater sinak kha pehang hraikhat in a zuar. Esau nih Abraham tefa nih an ton dingmi harnak kha hrial a duh caah a si kho men. (Gen. 15:13) Pathian a bia lomi miphun dang nu pahnih a ṭhit hnanak thawngin thlaraulei thil zei a rel lo kha a langhter i mah nih a nu le a pa an ngaih a chiatter. (Gen. 26:34, 35) A hmaanmi Pathian a biami nupi a ṭhimi Jakob he cun an i dang tuk.—Gen. 28:6, 7; 29:10-12, 18.

Mah Baibal tuanbia hna nih Messiah hringsortu he aa tlaiin zeidah a kan cawnpiak? An lak i cheukhat cu fater an si i cheukhat cu an si lo. Mah cu Judah mi pawl nih an theihthiam i an cohlanmi a si. Zeitindah kan hngalh? Khrih cu Jesse fapa hniang David hrinsor a si ti kha an cohlan.—Matt. 22:42.