A ummi cazin ah kal

A ummi cazin ah kal

 CAWN AWK CAPAR 14

Phungchim Rian Kha Hlawhtling tein Na Ṭuan Maw?

Phungchim Rian Kha Hlawhtling tein Na Ṭuan Maw?

“Thawngṭha karhter kha fakpi in i zuam, Pathian nih an kawh chan rian vialte kha ṭuan.”—2 TIM. 4:5.

HLA 57 Mi Vialte sinah Phungchimnak

LANGHTERNAK *

Jesuh nih a thawh ṭhan hnuah a zultu pawl kha a ton hna i “va kal u law . . . ka zultu ah va ser hna u” tiah a fial hna. (Catlangbu 1 zoh)

1. Pathian salle dihlak nih zei tuah dah an duh, zeicah? (A phaw hmanthlak zoh.)

JESUH KHRIH nih a zultu pawl kha “va kal u law miphun vialte kha ka zultu ah va ser hna u” tiah a ti hna. (Matt. 28:19) Pathian salle dihlak nih pek an simi phungchim rian “hlawhtling tein ṭuan” khawh ning kong kha cawn an duh. (2 Tim. 4:5, NW) Kan nunnak ah kan ṭuanmi a dang zei rian nakhmanh in mah rian cu a biapi deuh i a sunglawi deuh. Asinain kan duhning tlukin phungchim rian ah kan i tel kho men lai lo.

2. Phungchim rian hlawhtling tein ṭuannak ah zei harnak hna dah kan ton?

2 Kan caan le kan thazaang pek a haumi a dang a biapimi rian tampi a um. Kanmah le kan chungkhar pawcawmnak caah nikhat ah suimilam tampi pek a haumi rian kan ṭuan men lai. A dang chungkhar rian, zawtnak, lungretheihnak asiloah kum upat ruangah tonmi buaibainak hna zong kan tong men lai. Cu bantuk harnak hna kan ton buin phungchim rian kha zeitindah hlawhtling tein kan ṭuan khawh?

3. Matthai 13:23 i Jesuh bia in zeidah kan hngalh khawh?

3 Kan sining ruangah Jehovah rianṭuannak ah kan hmanmi caan cu ri a ngeih hmanhah kan lung a dongh awk a si lo. Jesuh nih kan dihlak in Vancung Pennak thei kha aa zat tein kan tlai kho lai lo ti kha a hngalh. (Matthai 13:23 rel.) Jehovah nih kan si khawh chungin a rian kan ṭuanmi paoh kha a sunsak tuk. (Heb. 6:10-12) A caan ah tam deuh in ṭuan awkah kan sining nih a pek ko tiah kan ruah men lai. Hi capar ah kan nunnak ah phungchim rian kha zeitindah pakhatnak ah kan chiah khawh, zeitindah nunning sawhsawh tein kan nun khawh i phungchimnak  le cawnpiaknak ah kan thiamnak kha zeitindah kan ṭhanchoter khawh timi kong kan i ruah hna lai. Pakhatnak ah, phungchim rian hlawhtling tein ṭuan timi cu zei sullam dah a si?

4. Phungchim rian hlawhtling tein ṭuan timi cu zei sullam dah a si?

4 Phungchim rian hlawhtling tein kan ṭuan khawh nakhnga phungchimnak le cawnpiaknak rian ah kan si khawh chungin kan i tel a hau. Asinain phungchim rian hlawhtling tein ṭuan timi nih phungchimnak ah kan hmanmi caan lawng kha a chim duhmi a si lo. Phung kan chimnak a ruang zong Jehovah caah a biapi tuk. Jehovah le kan innpa kan dawt hna caah Pathian rian ah lunglawm tein kan thazaang dihlak kha hman kan duh. * (Mar. 12:30, 31; Kol. 3:23) Thazaang dihlak in Pathian rianṭuan timi cu Pathian rian kha a ṭha bikmi lam in ṭuan khawh awkah lungtho tein kan thazaang hman kan duhmi kha a chim duhmi a si. Phungchimnak kha tinvo sung in kan hmuh ahcun mi tam khawh chung tam sinah kan si khawh chungin thawngṭha chim kan duh lai.

5-6. Mi pakhat nih a caan ri a ngeih hmanhah zeitindah phungchim rian kha biapi bik ah a chiah khawh ti kha tahchunhnak pe.

5 Ca chimh a huammi mino pakhat kha na mitthlam ah cuanter hmanh. Zeitik caan paohah ca chimh kha a duh. A hnuah private sianginn ah zarhte zarhpi ah ca chimh dingin rian a hmuh. Asinain a hmuhmi tangka cu aa za lo. Cucaah Nikhat Ni in Ninga Ni tiang dawr pakhat ah rian a ṭuan. Mah dawr ah a caan tam deuh kha a hman ko nain ca chimh kha a duh. A thiamnak ṭhanchoter le caantling in ca chimtu si kha a duh. Cucaah caan tawite a si hmanhah ca chimh khawhnak ding caanṭha kha a kawl.

6 Cu bantukin phungchim rian ah na duh tlukin caan tampi naa tel kho men lai lo. Asinain phungchim rian cu ṭuan na duhmi a si. Midang lungthin chungah thawngṭha a phanh khawh nakhnga na sining kha ṭhanchoter awkah naa zuam. Tuah dingmi thil tampi na ngeih caah na nunnak ah phungchim rian kha biapi bik ah zeitindah ka chiah khawh lai tiah na ruah ko lai.

 Phungchim Rian Biapi Bik Ah Chiah Khawh Ning

7-8. Phungchim rian he aa tlaiin Jesuh lungput kha zeitindah kan i zohchunh khawh?

7 Phungchim rian he aa tlaiin Jesuh lungput cu zohchunh awk ṭha taktak a si. A nunnak ah a biapi bikmi cu Pathian Pennak kong chim kha a si. (Johan 4:34, 35) Mi tam khawh chung tam sinah phung a chim khawh nakhnga meng a za leng a ke in a kal. An inn asiloah a dang hmun ah midang sin phungchimnak caanṭha kha a kawl. Jesuh nih a nunnak ah phungchim rian kha hmasa bik ah a chiah.

8 Khoika hmun le zei bantuk caan paohah thawngṭha chimnak caanṭha kan kawlnak thawngin Khrih kha kan i zohchunh khawh. Thawngṭha chim khawh awkah mahca ṭhatnak lungput kha lungtho tein kan hlawt. (Mar. 6:31-34; 1 Pet. 2:21) Cheukhat Khrihfabu ahcun special hmaikal, hmaanhmaan hmaikal asiloah manhcaan hmaikal hna an ṭuan. Cheukhat cu holh dang an cawng asiloah thawngthanhtu a herh deuhnak hmun ah an i ṭhial. Asinain hmaan tein Pennak kong a chimtu thawngthanhtu hna nih phungchim rian kha ṭha deuh in le tam deuh in an ṭuan khawh. Phungchim rian ah tampi kan i tel khawh ah siseh, tlawmte lawng kan i tel khawh ah siseh Jehovah nih kan tuah khawhmi lengin a kan hal lo. “Thawngṭha cu sunparnak le thangṭhatnak in a khatmi Pathian sinin a rami” a si caah Pathian nih phungchim rian kha lunglawm tein ṭuan hna seh ti a kan duh.—1 Tim. 1:11; Deut. 30:11.

9. (a) Pawcawmnak rian a ṭuan ko nain Paul nih phungchim rian kha zeitindah biapi bik ah a chiah? (b) Lamkaltu 28:16, 30, 31 ah phungchimnak rian he aa tlaiin Paul lungput kha zeitindah a langhter?

9 Lamkaltu Paul nih a nunnak ah phungchim rian kha a biapi bikmi a siternak thawngin zohchunh awk ṭha a chiah. Korin khua i a voihnihnak missionary in khual a tlawn lioah tangka tlawmte lawng a ngeih caah thlam sernak rian a rak ṭuan. Asinain Paul caah thlam sernak rian cu a biapi bikmi a si lo. Phungchim rian ṭuan khawh awkah pawcawmnak rian a ṭuanmi a si. Cucaah Paul nih thawngṭha chim khawh awkah Korin mi hna sinin ‘a man zeihmanh a la hna lo’ ti cu a fiang ko. (2 Kor. 11:7) Pawcawmnak rian a ṭuan ko nain phungchim rian kha biapi bik ah a chiah peng i Sabbath ni fatin a cawnpiak hna. A sining a hun ṭhat deuh tikah Paul nih phungchimnak rian kha a lungthin a pek khawh deuh. “A caan kha a dihlak in phungchimnak ah khan a hman i Judah mi hna sinah khan Jesuh cu Messiah kha a si tiah a ti.” (Lam. 18:3-5; 2 Kor. 11:9) A hnuah, Rom i kumhnih chung thong a tlak lioah Paul nih amah sinah a rak lengmi hna kha thawngṭha a chimh hna i cakuat zong a rak ṭial. (Lamkaltu 28:16, 30, 31 rel.) Paul nih phungchim rian kha zei dang thil vialte nakin biapi deuh ah a chiah. Hitin a ti: “Pathian nih a kan zaangfah caah . . . , kan hnabei a dong bal lo.” (2 Kor. 4:1) Paul bantukin pawcawmnak rian caah kan caan tampi kan hman hmanhah kan nunnak ah Pennak kong thawngṭha chim kha biapi bik ah kan chiah khawh.

Phungchim rian hlawhtling tein ṭuan khawh awkah lam tampi a um (Catlangbu 10-11 zoh)

10-11. A dam lomi kan si ahcun phungchim rian kha zeitindah kan liim khawh?

10 Kan kum a upat ca asiloah kan ngan a dam lo caah innkhat hnu innkhat phungchimnak ah kan i tel khawh lo ahcun a dang lam in phung kan chim kho. Hmasa Khrihfa hna nih mi an umnak hmun paohah thawngṭha an chimh hna. Mi an hmuh hnanak hmun paohah le zeitik caan paohah biatak kong chim khawh awkah caanṭha an kawl. Innkhat hnu innkhat le zapi umnak hmun ah thawngṭha kha an chim. (Lam. 17:17; 20:20) Hmun tampi i kan kal khawh lo ahcun mi tampi an umnak hmun ah ṭhu in aa chawkmi hna sinah phung kan chim khawh. Asiloah tonsaphak, cakuat le telephone in phung kan chim khawh. Thawngthanhtu tampi cu damlonak asiloah  a dang buaibainak ruangah innkhat hnu innkhat phungchimnak ah an i tel kho lo. Asinain mah a dang lam a simi phungchim ning in nuamhnak an hmu kho.

11 A dam lomi na si hmanhah phungchim rian kha na liim khawh ko. Lamkaltu Paul kong kha ruat ṭhan hmanh. Hitin a ti: “Khrih nih ṭhawnnak a ka pekmi thawngin zei thil hmanh hung chuak hna sehlaw ka ton khawh ko hna.” (Fil. 4:13) Voikhat cu missionary in khual a tlawn lioah Paul cu a rak zaw, mah tikah thazaang peknak a rak herh. Galati khuami hna sinah hitin a ti: “Thawngṭha kha ka rak in chimh hna ti cu nan hngalh: ka zawt caah pei a si kha.” (Gal. 4:13) Cu bantukin nang zong a dam lomi na si ahcun siibawi, nurse le a dang aan zohkhenhtu hna sinah thawngṭha chimnak caanṭha na hmu men lai. An lak i tam deuh cu thawngthanhtu hna nih an inn i an va len hna tikah rianṭuannak ah an um.

Nunning Sawhsawh Tein Nun Khawh Ning

12. Nan mit “fim” tein chiah timi nih zeidah a chim duhmi a si?

12 Jesuh nih hitin a ti: “Mit hi pum caah meiin bantuk a si. Nan mit a fim ahcun nan pum cu a dihlak in ceunak in a khat lai.” (Matt. 6:22) Zeidah a chim duhmi a si? Lung vaivuan loin, nunning sawhsawh tein nun peng asiloah hmuitinh pakhat, tinhnak pakhat lawng ah lungthin pek peng a hau ti kha a chim duhmi a si. Jesuh theng nih phungchim rian kha a nunnak ah biapi ah a chiahnak thawngin zohchunh awk ṭha a chiah. Cun a zultu pawl zong kha Jehovah rianṭuannak le a Pennak kha biapi bik ah chiah zungzal dingin a cawnpiak hna. ‘Pathian Pennak le zeidah tuah hna seh ti a kan duh timi kha biapi deuh in kan ruah’ i kan nunnak ah phungchim rian kha biapi bik ah kan chiahnak thawngin Jesuh kha kan i zohchunh.—Matt. 6:33.

13. Phungchim rian kha biapi ah chiah dingin zeinihdah a kan bawmh khawh?

 13 Phungchim rian biapi ah kan chiah khawhnak lamkhat cu midang nih Jehovah an hngalh i an dawt nakhnga bawmhnak ah caan tam deuh in hman awkah nunning sawhsawh tein nunnak thawngin a si. * Tahchunhnak ah, phungchimnak ah tam deuh in kan i tel khawh nakhnga zarhkhat chungah pawcawnnak rian kan ṭuanmi suimilam kha kan ṭhum kho lai maw? Kan caan tampi a lami nuamhsaihnak cheukhat ah kan i telmi kha kan ṭhum kho lai maw?

14. Nuva tuahkhat nih phungchimnak ah a caan le lungthin tam deuh an pek khawh nakhnga zei thlennak dah an tuah?

14 Mah hi Khrihfa upa Elias le a nupi nih an tuahmi a si. Hitin a ti: “Hmaikal kan ṭuan kho colh lo, asinain phungchimnak ah caan tam deuh in hman khawh awkah kan tuah khawhmi a um. Cucaah phungchimnak ah tam deuh kan i tel khawh nakhnga thlennak tlawmpal kan tuah. Tahchunhnak ah, tangka kan hmanmi kha kan ṭhumh. Nuamhsaihnak ah kan caan tam tuk kan hmanmi zong kha kan ṭhumh. Cun rianngeitu kha phungchimnak ah tam deuh kan i tel khawh nakhnga rianṭuan caan thlennak tuahpiak awkah kan hal. A phichuak cu zanlei sang phungchimnak ah kan hun i tel kho, Baibal cawnpiaknak tam deuh kan tuah khawh i zarhlai phungchimnak hmanhah thlakhat ah voihnih kan hun i tel kho. Kan i nuam tuk.”

Phungchimnak le Cawnpiaknak ah Thiamnak Ṭhanchoter Khawh Ning

Zarhlai pumhnak in kan cawnmi kha kan hman ahcun phungchimnak le cawnpiaknak ah hmualngei tein kan i tel kho lai (Catlangbu 15-16 zoh) *

15-16. 1 Timote 4:13, 15 ningin phungchimnak ah zeitindah kan ṭhancho peng khawh? (“ Phungchim Rian Hlawhtling tein Ṭuan awkah A Ka Bawm khomi Hmuitinh” timi rinli kulh zongah zoh.)

15 Phungchimnak rian tlamtling tein kan ṭuan khawhnak a dang lamkhat cu phungchimnak  ah thiamnak ṭhanchoternak thawngin a si. Rian cheukhat a ṭuanmi hna cu an hngalhnak le an thiamnak a ṭhancho nakhnga hmaan tein cawnpiak an hau. Mah cu Pennak kong a chimtu hna ca zongah a si ve. Phungchimnak ah thiamnak a ngei deuhmi kan si khawh nakhnga kan cawn peng a hau.—Ptb. 1:5; 1 Timote 4:13, 15 rel.

16 Asinain phungchimnak ah zeitindah kan ṭhancho peng khawh? Zarh fatin Nunning le Rianṭuan Pumhnak in kan hmuhmi lamhruainak kha ṭha tein kan zulhnak thawngin a si. Mah pumhnak nih lohmun rianṭuannak ah kan thiamnak ṭhancho awkah a bawmmi, hman awk a tlakmi kong tampi a kan cawnpiak. Tahchunhnak ah, caantlaitu nih rianthiahmi siangngakchia kha ruahnak a cheuh hna tikah phungchim ning ṭhanchoter awkah a kan bawm khomi thil hna kha kan cawn khawh ve. A hnuah mi pakhatkhat sin thawngṭha kan chim tikah mah ruahnak cheuhnak hna kha kan hman khawh. Lohmun rianṭuannak phu zohkhenhtu kha bawmhnak kan hal khawh asiloah amah he phungchim rian kan ṭuanṭi kho. Cun a dang hmuhtonnak a ngeimi thawngthanhtu, hmaikal asiloah peng zohkhenhtu he phungchim rian kan ṭuanṭi kho. Cawnpiaknak Hriamnam pakhat cio kha ṭha tein kan hman thiam ahcun phungchimnak le cawnpiaknak ah kan i nuam lai.

17. Phungchim rian kha hlawhtling tein na ṭuan ahcun zei ṭhatnak dah na hmuh lai?

17 Jehovah nih a “rian ṭuanṭi hawi” sinak nawl a kan pekmi cu tinvo sung taktak a si. (1 Kor. 3:9, NW) ‘A ṭha bik i thim awk kha na hngalh’ i Pathian rian kha biapi ah na chiah ahcun Jehovah kha ‘lunglawm tein na biak’ khawh lai. (Fil. 1:10; Salm 100:2) Pathian rianṭuantu pakhat in zeibantuk harnak asiloah ri na ngeih hmanhah Pathian nih phungchimnak rian kha hlawhtling tein ṭuan khawh awkah a herhmi ṭhawnnak aan pek lai ti kha na zumh khawh. (2 Kor. 4:1, 7; 6:4) Phungchimnak ah caan tampi aa tel khomi na si ah, tlawmpal lawng aa tel khomi na si ah na thazaang dihlak in naa tel tikah na “lung aa lawm kho lai.” (Gal. 6:4) Phungchim rian kha hlawhtling tein na ṭuan tikah Jehovah le na minung hawi na dawt hna ti na langhtermi a si. Cutin na tuah ahcun ‘nangmah naa khamh hlei ah na bia a theimi kha na khamh khawh hna lai.’—1 Tim. 4:16.

HLA 58 Daihnak a Duhmi hna Kawlnak

^ cat. 5 Jesuh nih Pennak kong thawngṭha chim awk le zultu siter awkah a kan fial. Hi capar ah buaibainak tampi kan ton hmanhah phungchim rian hlawhtling tein ṭuan khawh ning kong kan i ruah hna lai. Phungchim a thiam deuhmi si khawh ning le phungchimnak ah nuamhnak tam deuh hmuh khawh ning kong zong kan i ruah hna lai.

^ cat. 4 BIAFANG FIANTERNAK: Pathian rian ah phungchimnak le cawnpiaknak, biakinn saknak, biaknak he aa pehtlaimi inn pawl remhnak le leiser ral a tongmi hna bawmhnak ti bantuk rian a phunphun aa tel.—2 Kor. 5:18, 19; 8:4.

^ cat. 13 2016, July, Vennak Innsang, ca. 8 ah a ummi “Nunning Sawhsawh in Nun Khawhning” lam pasarih aa telmi rinli kulh ah zoh.

^ cat. 62 HMANTHLAK FIANTERNAK: Unaunu pakhat nih zarhlai pumhnak ah lennolh tuah ning kha hmuhsaknak a tuah. Cun pumhnak caantlaitu nih ruahnak a cheuh tikah Cawnpiaknak brochure chungah aa ṭial. A hnuah pumhnak in a cawnmi kha zarhte, zarhpi i lohmun rianṭuannak ah a hman.