A ummi cazin ah kal

A ummi cazin ah kal

Pakhat le Pakhat Thapeknak ah “I Forh Chin U Sih”

Pakhat le Pakhat Thapeknak ah “I Forh Chin U Sih”

“Pakhat le pakhat kan i dawt khawh nakhnga . . . , i forh chin u sih, zeicahtiah Bawipa ni cu a nai deuh chin lengmang ti kha kan hngalh caah i forh chin lengmang ko u sih.”—HEB. 10:24, 25.

HLA: 53, 20

1. Lamkaltu Paul nih a hmasa Hebru Khrihfa hna kha pakhat le pakhat thazaang i pek chin awkah zeicah a forh hna?

KUMZABU pakhatnak ah Hebru Khrihfa pawl kha lamkaltu Paul nih hitin ruahnak a cheuh hna: “Pakhat le pakhat kan i dawt khawh nakhnga le thilṭha kan i tuahpiak khawh nakhnga, i bawm tliahmah u sih. Pakhat le pakhat hmunkhat i, i pumh lengmang kha ngol hlah u sih; a cheu nih cun ngol hmanh hna sehlaw, kannih cu i forh chin u sih, zeicahtiah Bawipa ni cu a nai deuh chin lengmang ti kha kan hngalh caah i forh chin lengmang ko u sih.” (Heb. 10:24, 25) Paul nih pakhat le pakhat thazaang i pek chin awkah a forh hnanak a ruang kha unau pawl nih an ruah men ko lai. Mah hnu kumnga hrawngah a ruang pakhat cu a hung fiang. Mah lio caan ah Jerusalem biaceih dingin Jehovah rikhiahmi ni cu a nai cang ti kha an hngalh. Jesuh bia ningin khua chungin kan tlik a hau ti kha an hngalh. (Luka 21:20-22; Lam. 2:19, 20) AD 70 ah Rom nih Jesusalem  a hrawh tikah Jehovah ni cu a rak phan.

2. Tuchan ah pakhat le pakhat thazaang i pek chin cu zeicah a herh?

2 Tuchan zong ah cu bantuk sining kan tong ve. ‘Ṭih a nung i a liannganmi’ Jehovah ni cu a nai cang. (Joel 2:11) Profet Zefaniah bia cu kan chan he zong aa pehtlai: “BAWIPA ni a liannganmi cu a nai cang, khulrang in a ra lio. Cu ni tlukin khulrang in a tli khomi an um lo.” (Zef. 1:14) Cucaah “pakhat le pakhat kan i dawt khawh nakhnga le thilṭha kan i tuahpiak khawh nakhnga, i bawm tliahmah u sih.” (Heb. 10:24) Unau pawl kha an herhmi thazaang kan pek khawh hna nakhnga an cungah lungthawhnak tam deuh in kan ngeih a hau.

Ahote Dah Thapeknak An Herh?

3. Lamkaltu Paul nih thapeknak kong he aa tlaiin zeidah a chim? (A hramthawknak hmanthlak zoh.)

3 “Lungretheihnak nih minung cu lunglawm loin a tuah, sihmanhsehlaw dawtnak bia nih cun lunglawmhnak in a khahter.” (Ptb. 12:25) Kan dihlak in atu le atu thazaang pek kan herh. Rian a ngeimi hna lawng nih midang thapek si loin anmah theng zong thapek an herh ti kha Paul nih a langhter. Rom Khrihfa hna sinah hitin a ṭial: “Nanmah hmuh cu kaa ngaih hringhran i nanmah he thlarau thluachuahnak i hrawm i nanmah thazaang pek cu ka duh ngaingaimi a si. Ka chim duhmi cu, pakhat le pakhat kan i bawm cio hnga, ka zumhnak nih nannih aan bawmh hna hnga i nan zumhnak nih kei zong a ka bawmh ve hnga, ti hi a si.” (Rom 1:11, 12) Cucaah midang thazaang a petu Paul hmanh nih thazaang peknak a herh.—Rom 15:30-32 rel.

4, 5. Tuchan ah ahote dah thazaang pek khawh an si, zeicah?

4 Tuchan ah zumhfek tein hmaikal a ṭuanmi ti bantuk caantling in Jehovah rian a ṭuanmi hna kha tha kan pek khawh hna. An lak i tampi nih hmaikal an ṭuan khawh nakhnga mahca ṭhatnak an hlawt. Missionary, Bethel chungkhar, peng zohkhenhtu le an nupile, lamhla ah a ummi calettu pawl zong nih cutin an tuah. Jehovah rian ah an caan tam deuh in an hman khawh nakhnga mahca ṭhatnak an hlawt. Cucaah annih kha tha kan pek hna awk a si. Caantling in Pathian rian ṭuan a duh nain a ṭuan kho ti lomi zong an um. Annih zong thapek an herh.

5 Ahote zong dah thazaang peknak hmuh awkah an i tlak? Jehovah nawlngaih in “Khrihfa ṭhit-umnak” lawng an duh ruangah nupi, va ngeih loin a ummi unaunu, unaupa hna kha thazaang pek khawh an si. (1 Kor. 7:39) Nupile cu vale nih an dawtmi hna le an sunsakmi hna an hmuh tikah thazaang an hmu. (Ptb. 31:28, 31) Hremnak le zawtfahnak a tongmi Khrihfa hna zong thazaang pek an herh. (2 Thes. 1:3-5) Jehovah le Jesuh nih mah zumhfekmi unau dihlak kha hnemhnak an pek hna.—2 Thesalon 2:16, 17 rel.

Khrihfa Upa nih Thazaangan kan Pek khawh

6. Khrihfa upa rian he aa tlaiin Isaiah 32:1, 2 in zeidah kan hngalh?

6 Isaiah 32:1, 2 rel. Harnak caan ah kan nun caah fawi tein kan ngaih a chia kho i kan lung a dong kho. Jesuh Khrih nih kanmah thazaang pek awkah chiti thuhmi a naule le tuudang i zumhfekmi “a bawi” le kha a hman hna. Mah Khrihfa upa hna cu kan zumhnak “a ukmi” si loin kan i lawmh  nakhnga kanmah he “rian ṭuanṭi hawi” an si. Kan i lawmh nakhnga le zumhfek tein kan um nakhnga bawmh an kan duh.—2 Kor. 1:24, NW.

7, 8. Khrihfa upa nih an biachim le an tuahsernak in midang kha zeitindah thazaang an pek khawh hna?

7 Khrihfa upa nih unau pawl thapek awkah aa zuam zungzalmi lamkaltu Paul kha an i zohchunh khawh. Hremnak a tongmi Thesalonika khua i Khrihfa hna sinah hitin a ṭial: “Kannih nih kan in dawt hna caah Pathian sinin a rami thawngṭha lawng hmanh kha si loin kan nunnak tiang hmanh kha hrawm kan in duh hna. Kan dawt ngaingaimi nan si cang.”—1 Thes. 2:8.

8 Khrihfa upa nih an biachimnak in thazaang a kan pek khawh. Asinain mah lawngin a za lo. Paul nih Efesa khua i Khrihfa upa pawl kha hitin a ti hna: “A dermi kha kan bawmh hna awk a si ti cu kaan hmuhsak cang hna i Bawipa Jesuh zong nih khan zeitindah a rak ti, ti ahcun, ‘Pek leiah hin hmuh lei nakin lunglawmhnak a um deuh,’ a rak ti.” (Lam. 20:35) Paul nih unau pawl caah ‘a ngeihmi vialte le a pum zong hman’ dih a duh. An caah a ṭha bikmi pek a duh kha a tuahsernak in a langhter. (2 Kor. 12:15) Cu bantukin Khrihfa upa nih an biachim lawngin si loin an tuahsernak zongin midang kha tha an pek hna awk le an hnemh hna awk a si. Mah nih a kan zohkhenh taktak ti kha a langhter.—1 Kor. 14:3.

9. Khrihfa upa nih thazaang a pemi lam in zeitindah ruahnak an cheuh khawh hna?

9 Pakhat le pakhat thapeknak ah ruahnak cheuhnak zong aa tel. Thazaang a pemi lam in ruahnak cheuh khawhnak lam kha Baibal in Khrihfa upa nih an cawn khawh. Thihnak in a thoṭhanmi Jesuh nih zohchunh awk ṭha a rak chiah. Asia Minor i Khrihfabu cheukhat cu fakpi in chimhhrinh an herh tikah zeitindah ruahnak a rak cheuh hna? Efesa, Pergamum le Tiatira Khrihfabu kha an tuahmi thilṭha ruangah a thangṭhat hmasa hna i mah hnuah ruahnak a cheuh hna. (Biat. 2:1-5, 12, 13, 18, 19) Jesuh nih Laodisia Khrihfabu kha hitin a ti hna: “Ka dawtmi cu ka chimhhrin hna i dan ka tat tawn hna. Cucaah cun i biatak law na sualnak kha mertak hna.” (Biat. 3:19) Khrihfa upa pawl nih midang ruahnak an cheuh hna tikah Jesuh Khrih kha an i zohchunh awk a si.

Khrihfa Upa Rian lawng a Si lo

Nulepa hna, nan fale kha midang thapek awkah nan cawnpiak hna maw? (Catlangbu 10 zoh)

10. Kan dihlak in pakhat le pakhat zeitindah tha kan i pek khawh?

10 Midang thapek cu Khrihfa upa rian lawng a si lo. Paul nih Khrihfa dihlak kha “mi ca i san a tlaimi, a herhmi zawn i ṭhatnak a chuahpitu le a theimi thluachuah vanluh a petu ding bia lawng kha hmang u” tiah a forh hna. (Efe. 4:29) Midang bawmh khawh awkah an herhmi thil kha hngalh kan i zuam awk a si. Paul nih Hebru Khrihfa hna sinah hitin a ṭial: “A thlepmi nan ban kha hler hna u law a dermi nan khuk kha fehter hna u, cun a ping a pang ah nan ke hlang sual lo tein um u. Cuti nan tuah ahcun a beimi nan ke kha a rak lan lai lo i hmasa i ṭhawnnak a rak ngeihmi kha a ngei ṭhan kho lai.” (Heb. 12:12, 13) Mino telin kan dihlak in midang kha tha kan pek khawh hna i kan forh khawh hna.

11. Marthe cu a lung a dongh lioah zeinihdah a bawmh?

11 Unaunu Marthe cu lungdongh zawtnak a ngei. * Hitin a ṭial: “Nikhat cu thazaang ngeih awk thla ka cam lioah kum upa  unaunu pakhat nih nemnak le dawtnak he a rak ka chawnh. Anih zong keimah bantukin ka um bal ve tiah a ka ti. Mah tikah keimah lawng ka si lo ti kha ka hun hngalh i ka tha a hung um.” A chimmi bia nih Marthe zeitluk in dah tha a ngeihter ti kha mah unaunu nih a hngalh hmanh a hngal men lai lo.

12, 13. Filipi 2:1-4 i ruahnak cheuhnak kha zeitindah kan zulh khawh?

12 Paul nih Filipi Khrihfa hna sinah hitin a ṭial: “Khrih chung i nan nunnak nih khan aan ṭhawnter hna maw? A dawtnak nih khan nan hna aan ngamter hna maw? Thlarau he hawikomhnak nan ngei maw? Pakhat le pakhat nan i daw in nan i zaangfah maw? Kaan fial duhmi hna cu hihi a si: lungthin ah i khat u, pakhat le pakhat i daw u, lungrual tein um u law kaa lawmhnak hi tlinter u. Pakhat le pakhat i entainak le mah pumpak thangṭhat kawlnak kha nan lakah umter hlah u. Toidornak lungthin tu kha ngei cio u law midang nakin ka ṭha deuh tiah zeitikhmanh ah vaa ruat hlah u. Cun midang duhning kha hmuhthiam i zuam u law nanmah duhnak lawng kha ruat hlah u.”—Fil. 2:1-4.

13 Kan dihlak in midang bawmh khawhning lam kha kan kawl awk a si. Unau thapek khawh awkah ‘dawtnak in hnangamter’ awk le ‘dawt-zaangfahnak’ langhter awk a si.

Thazaang Pek Khawhnak Lam

14. Midang thapek khawhnak lamkhat cu zeidah a si?

14 A hlanah kan rak bawmhmi hna cu zumhfek tein an um zungzal ti kan theih tikah  kan i lawm. Lamkaltu Johan nih hitin a ṭial: “Ka fale biatak chungah khua an sa ti thawng hleiin a ka lawmhter deuhtu zeihmanh a um ti lo.” (3 Johan 4) Hmaikal tampi nih hlanah biatak hngalh awkah an rak bawmhmi pakhat cu zumhfek tein Jehovah a bia i hmaikal hmanh a ṭuan ti thawng an theih tikah an i lawm tuk. Cucaah hmaikal pawl an lung a dongh tikah midang bawmhnak ah an rak ṭuanmi thilṭha kong kan chimh hna tikah an tha a um ṭhan.

15. Zumhfek tein Pathian rian a ṭuanmi hna kha zeitindah tha kan pek khawh hna?

15 Peng zohkhenhtu tampi nih Khrihfabu kan tlawn hnuah lawmhnak ca kan hmuh tikah kan tha a um tuk tiah an ti. Jehovah rian ah zumhfek tein a ṭuanmi Khrihfa upa, missionary, hmaikal le Bethel chungkhar zong cutin an si. An sinah lawmhnak bia kan chim tikah kan ruah khawh lengin an tha a um.

Kan Dihlak In Tha Kan i Pe Kho

16. Zeinihdah mi pakhat kha thazaang a pek khawh?

16 Na intuarnak kong midang sinah a chim thiam lomi na si ah tah zeitin? Midang thapek cu a harmi a si lo. Mi pakhat kha hmaipanh tein na nih khawh. An in nih ṭhan lo ahcun buaibainak an ngeih caah a si men lai. Mah tikah an bia na ngaihpiak hnanak thawngin hnemhnak na pek khawh hna.—Jeim 1:19.

17. Mino unaupa pakhat cu zeinihdah thazaang a ngeihter?

17 Mino unaupa Henri cu a chungkharmi nih Jehovah an biak ti lo tikah a ngaih a chia tuk. Mah lak i pakhat cu Khrihfa upa a  ṭuan balmi a pa a si. Peng zohkhenhtu pakhat nih Henri cu a ngaih a chia ti kha a hngalh i coffee din a sawm. Henri nih a intuarnak kong a chimhmi kha ṭha tein a ngaihpiak. Henri nih zumhfek tein ka um lawngah ka chungkhar pawl biatak lei kir ṭhan awkah ka bawmh khawh hna lai ti kha a hun hngalh. Salm 46, Zefaniah 3:17 le Marka 10:29, 30 a relnak thawng zongin hnemhnak a hmu.

Kan dihlak in pakhat le pakhat tha kan i pe kho (Catlangbu 18 zoh)

18. (a) Siangpahrang Solomon nih thapeknak kong he aa tlaiin zeidah a ṭial? (b) Lamkaltu Paul nih zei ruahnak cheuhnak dah a kan pek?

18 Marthe le Henri kong in zeidah kan cawn khawh? Aho paoh nih bawmh a herhmi unaunu, unaupa hna kha kan hnemh khawh hna i thazaang kan pek khawh hna. Siangpahrang Solomon nih hitin a ṭial: “A caan he a hmaanmi bia fangkhat cu zeitluk in dah a ṭhat deuh.” (Ptb. 15:23, 30) A lung a dongmi asiloah a ngaih a chiami na hngalhmi pakhatkhat an um maw? Vennak Innsang asiloah website in a kong pakhatkhat kha na relpiak kho hna lai maw? Pennak hla hmunkhat ah sakṭinak thawngin thazaang pek khawh a si tiah Paul nih a ti. Hitin a ṭial: “Fimnak in pakhat le pakhat i chim u law i cawnpiak u. Thangṭhatnak hla, Pathian biaknak hla le hla thiang kha sa hna u; Pathian kha lawmhnak in hla in thangṭhat u.”—Kol. 3:16; Lam. 16:25.

19. Thapeknak cu zeicah a biapit chin lengmang, zeidah kan tuah awk a si?

19 Jehovah ni kan naih chin lengmang caah pakhat le pakhat thazaang i pek cu kan caah a biapi chinchin. (Heb. 10:25) Paul ruahnak cheuhnak hi kan zulh ahcun kan i nuam lai: “Atu i nan tuah lengmang bantuk hin pakhat le pakhat thazaang i pe u law i bawm u.”—1 Thes. 5:11.

^ cat. 11 An min thlen a si.