A ummi cazin ah kal

A ummi cazin ah kal

Luatnak Pathian, Jehovah kha Bia

Luatnak Pathian, Jehovah kha Bia

“Bawipa thlarau umnak hmun paohah luatnak a um.”—2 KOR. 3:17.

HLA: 11, 7

1, 2. (a) Lamkaltu Paul chan ah mi nih sal sinak le luatnak kong cu zeicah biapi ah an chiah? (b) Paul nih luatnak taktak Hrampi a timi cu ahodah a si?

KUMZABU pakhatnak i Khrihfa hna cu Rom uknak tangah khua an sa. Cuka mi hna cu an ngeihmi upadi, dinnak le zalonnak cungah aa uangthlar tukmi an si. Asinain mah a ṭhawng tukmi uknak cu sal pawl thazaang in dirhmi a si. Rom uknak chungah mi 3 ah 1 paoh cu sal an si. Cucaah Khrihfa hna telin mi tampi nih sal sinak le luatnak kong kha biapi ah an chiah lai ti cu a fiang ko.

2 Lamkaltu Paul nih a ṭialmi ca hna ah luatnak kong tampi aa tel. Asinain mah lio caan i mi tampi nih an duhmi hi vawlei buaibainak kha tawnghtham awkah aa zuam lo. Mah canah mi nih Pathian Pennak kong thawngṭha le Jesuh Khrih tlanhnak man a sunlawining an hngalh nakhnga Paul le a dang Khrihfa pawl nih fakpi in an bawmh hna. Luatnak taktak Hrampi kha kawl awkah an forh hna.  Paul nih hitin a ṭial: “‘Bawipa,’ a timi hi thlarau a si i Bawipa  thlarau umnak hmun paohah luatnak a um.”—2 Kor. 3:17.

3, 4. (a) 2 Korin 3:17 bia kha Paul nih zeicah a ṭial? (b) Jehovah sinin zalonnak hmuh awkah zeidah kan tuah a herh?

3 Paul nih Korin Khrihfa hna sin a cakuat pahnihnak ah Moses cu Jehovah vancungmi he an i ton i Sinai Tlang in a rak ṭum tikah a hmai cu ceunak in a khat tiah a ti. Israel mi nih Moses cu an hmuh tikah an ṭih caah a hmai kha puan in aa khuh. (Ex. 34:29, 30, 33; 2 Kor. 3:7, 13) Asinain Paul nih “Moses cu Bawipa lei i a hun i mer ah khan puan cu aa hawk,” tiah a ti. (2 Kor. 3:16) Mah cu zeidah a chim duhmi a si?

4 Zeizong vialte Sertu, Jehovah lawnglawng hi ri a ngei lomi le a tlingmi zalonnak a ngei ti kha a hmasa capar in kan hngalh cang. Cucaah Jehovah umnak hmun le “Bawipa thlarau umnak hmun” ah zalonnak a um ti kha mah nih a langhter. Asinain mah zalonnak kha ngeih kan duh ahcun Jehovah sinah kan i mer a hau tiah Paul nih a ti. Mah cu Jehovah he pehtlaihnak ṭha kan ngeih a hau tinak a si. Israel mi nih thetse ram i an um lioah Jehovah hmuhning si loin minung hmuhning lawngin thil an rak hmuh. Mah cu an ruahnak le an lungthin kha puan nih a khuh bantuk a si. An hmuhmi zalonnak thar kha anmah duhnak tlinternak caah hman an duh.—Heb. 3:8-10.

Thong a tlami hmanh nih luatnak hmuh khawh a si

5. (a) Jehovah thlarau pekmi zalonnak cu zei bantuk phun dah a si? (b) Sal asiloah thongtlami hmanh nih Jehovah pekmi zalonnak an hmu kho ti kha zeitindah kan hngalh khawh? (c) Zei biahalnak dah kan i ruah hna lai?

5 Jehovah thlarau he aa tlaimi zalonnak cu sal sinak in luatnak men lawng a si lo. Jehovah thlarau nih sualnak le thihnak sal sinak in a kan luatter lengah a hmaan lomi biaknak le phunglam sal sinak zongin a kan luatter. Mah cu zei bantuk minung hmanh nih an tuah kho lo. (Rom 6:23; 8:2) Mah cu zalonnak taktak a si. Sal a simi le thong a tlami hmanh nih mah luatnak kha an hmuh khawh. (Gen. 39:20-23) An zumhnak ruangah thong a tlami Unaunu Nancy Yuen le Unaupa Harold King cu,cu bantuk luatnak an hmu. JW Broadcasting ah an hmuhtonnak kong an chimmi kha zoh khawh a si. (BIAHALNAK LE HMUHTONNAK > HNEKSAKNAK INKHAWHNAK timi tangah zoh.) Atu mah biahalnak pahnih hi zohhmanh hna u sih: Zalonnak kan sunsak ti kha zeitindah kan langhter khawh? Zalonnak kha fimkhur tein zeitindah kan hman khawh?

Pathian Pekmi Zalonnak cu a Sunglawi Tuk

6. Jehovah pekmi zalonnak cungah an i lawmh lo kha Israel mi nih zeitindah an langhter?

6 A sunglawi tukmi laksawng pakhat kan hmuh tikah a kan petu cungah lawmhnak kan langhter ko lai. Asinain Israel mi cu Jehovah pekmi luatnak cungah an i lawm lo. Jehovah nih Izipt ram in a luatter hna  hnu, thla tlawmpal ah Izipt ram i an ei tawnmi le an din tawnmi kha an hun hlam. Jehovah nih a pekmi hna manna changreu ruangah an phunzai. Izipt ram lei ah kir ṭhan hmanh an duh. Zalong tein Jehovah biaknak nakin ‘ngasa, zil le phazeti le purun le piat le vankhawng’ cu an caah a biapi deuh. An cungah Jehovah a thin a hun tukmi cu khuaruahhar awk a si lo. (Nam. 11:5, 6, 10; 14:3, 4) Mah nih a biapi tukmi kong a kan cawnpiak.

7. 2 Korin 6:1 i ruahnak cheuhnak kha Paul nih zeitindah a zulh, kannih tah zeitindah kan zulh khawh?

7 Jehovah nih a Fapa, Jesuh Khrih thawngin a kan pekmi zalonnak cungah aa lawm lomi kan si nakhnga lo Paul nih Khrihfa dihlak kha ralrin a kan pek. (2 Korin 6:1 rel.) Paul cu sualnak le thihnak sal a simi le mitlinglo a simi nih hnahnawhnak a pek. Asinain “Bawipa Jesuh Khrih thawngin a ka khamh lai. Pathian cu lawm ko u sih” tiah a ti. Zeicah cutin a chim? Paul nih hitin a ti: “Khrih Jesuh he aa pehtlaimi nunnak a kan petu thlarau phung nih cun sualnak le thihnak phung chung khan a ka luatter cang.” (Rom 7:24, 25; 8:2) Paul bantukin Jehovah nih sualnak le thihnak sal sinak in a kan luatter ti kha zeitikhmanh ah kan philh awk a si lo. Tlanhnak man nih a thiangmi chiaṭha thleidannak lungthin he Pathian a kan biakter khawh i mah nih lawmhnak taktak a kan pek.—Salm 40:8.

Zalonnak kha Jehovah duhnak tuahnak ah maw na hman asiloah nangmah duhnak ah dah (Catlangbu 8-10 zoh)

8, 9. (a) Zalonnak he aa tlaiin lamkaltu Peter nih zeitindah ralrin a kan pek? (b) Mi pakhat nih zalonnak kha zeitindah ningcang loin a hman khawh?

8 Jehovah cungah kan i lawm ti chim lawngin a za lo. Kan ngeihmi zalonnak kha ningcang loin hman lo awk zongah kan i ralrin ding a si. Tahchunhnak ah, lamkaltu Peter nih kan ngeihmi zalonnak kha a hmaan lomi thil tuahnak caah silhnalhnak ah hman lo dingin ralrin a kan pek. (1 Peter 2:16 rel.) Mah ralrin peknak  nih thetse ram ah Israel mi nih an tonmi thil kha a kan hngalhter ṭhan. Mah ralrin peknak cu Israel mi nakhmanh in tuchan ah kan herh deuh. Satan le a vawlei nih hruk-aihnak, einak, dinnak le nuamhsaihnak he aa tlaiin lam a phunphun in an kan lemsoi. Thanhlaar pawl zong nih kan herh taktak lomi thil hna cawk awkah an kan lem. Kan ngeihmi zalonnak kha ningcang loin hman awkah vawlei nih fawi tein a kan hlen khawh.

9 Peter ruahnak cheuhnak cu fimcawnnak le rian i thimnak ti bantuk nunnak caah a biapimi kongkau he aa pehtlai. Tahchunhnak ah, mino pawl cu a min a thangmi sianghleiruun ah an kai khawh nakhnga fakpi in i zuam dingin hnek an si. A sangmi fimcawnnak nan kai lawngah rianṭha nan hmu lai, tangka tampi nan hmu lai i upatmi nan si lai tiah an forh hna. Siangsangruun a dihmi nakin sianghleiruun a dihmi nih tangka tam deuh an hmu ti kha an hmuhsak men hna lai. Mino pawl nih an nunnak ah huham a ngeimi biakhiahnak hna an tuah tikah a sangmi fimcawnnak cu an caah lemsoitu a si men lai. Asinain mino le nulepa nih zeidah an i cinken awk a si?

10. Pumpak kong ah zalong tein thimnak nawl kan ngei nain zeidah kan i cinken awk a si?

10 Mi cheukhat nih mah thil hna cu pumpak kongkau a si caah kan chiaṭha thleidannak lungthin nih a awnh ahcun kan duhmi zeipaoh kan tuah khawh tiah an ruah. Mah cu Paul nih “zeicahdah midang chiaṭha thleidannak lungthin nih cun ka luatnak cu a ka dawnhkhanh lai?” timi bia kha an ruah caah a si men lai. (1 Kor. 10:29) Fimcawnnak le rian kong ah zalong tein thimnak nawl kan ngei ko nain kan ngeihmi zalonnak cu ri a ngei i kan biakhiahnak vialte nih a kan hnorsuan khawh ti kha kan i cinken a hau. Cucaah Paul nih hitin a ti: “‘Zeipaoh kan tuah khawh ko,’ an ti. A si, an tuah khawh ko, sihmanhsehlaw zeipaoh hi an ṭha dih lo. ‘Zeipaoh kan tuah khawh ko,’ asinain zeipaoh hi kan caah an ṭhahnem dih lo.” (1 Kor. 10:23) Cucaah pumpak kong ah zalong tein thimnak nawl kan ngei ko nain kanmah duhmi nakin a biapi deuhmi thil a um.

Zalonnak kha Jehovah Rianṭuannak ah Fimkhur tein Hmang

11. Jehovah nih luatnak a kan peknak a ruang cu zeidah a si?

11 Peter nih zalonnak kha ningcang loin hmanlo dingin ralrin a kan pek tikah “Pathian sal bantuk tu in” a hmaanmi lam in hman awkah a kan forh. Jehovah nih Jesuh hmangin sualnak le thihnak sal sinak in a kan luatternak a ruang cu kan nunnak dihlak kha amah biaknak ah kan hman khawh nakhnga caah a si.

Zalonnak a ṭha bik in hman khawhnak lam cu kan caan le kan thazaang kha Jehovah rian ah tling tein hmannak thawngin a si

12. Noah le a chungkhar nih kan caah zei zohchunh awk dah an chiah?

12 Zalonnak a ṭha bik in hman khawhnak lam cu kan caan le kan thazaang kha Jehovah rian ah tling tein hmannak thawngin a si. Cutin tuahnak nih vawlei lei hmuitinh le kanmah duhnak kha biapi bik ah chiahnak in a kan huhphenh lai. (Gal. 5:16) Noah le a chungkhar kong kha ruathmanh. Annih cu a puarhrang i a ziaza a rawkralmi vawlei ah khua an sa. Asinain  an pawngkam mi hna hmuitinh bantuk kha an chia lo i an tuahmi thil ah an i tel lo. Jehovah pekmi rianṭuannak ah an rian a tam. Lawng an sak, anmah le saram caah rawl an khon i midang kha Buanchukcho kong he aa tlaiin ralrin an pek hna. “Noah nih khan, Pathian nih a fialmi vialte cu a tuah dih.” (Gen. 6:22) Cucaah Noah le a chungkhar cu hrawhnak in an rak luat.—Heb. 11:7.

13. Jehovah nih zei tuah awkah dah rian a kan pek?

13 Tuchan ah tah Jehovah nih zei tuah awkah dah rian a kan pek? Jesuh zultu a simi cu Pathian nih phungchim dingin rian a kan pek ti kha kan hngalh. (Luka 4:18, 19 rel.) Tuchan ah Satan nih mi tampi kha thlaraulei an mit a cawtter hna i a hmaan lomi biaknak, thilri chawva le ramkhel lei sal an hung si. (2 Kor. 4:4) Jesuh bantukin kannih cu luatnak Pathian, Jehovah kha mi nih an hngalh i an biak nakhnga bawmhnak caanṭha kan ngei. (Matt. 28:19, 20) Midang sin phungchim cu a fawi lo. Hmun cheukhat ah mi nih Pathian kong hngalh kha an duh lo, cheukhat cu an sin phung kan chim tikah an thin hmanh a hung. Asinain Jehovah nih phungchim dingin rian a kan pek caah ‘Zalonnak kha Jehovah rianṭuannak ah tam deuh in ka hmang kho lai maw?’ tiah kan i hal awk a si.

14, 15. Jehovah miphun tampi nih zei tuah awkah dah bia an khiah? (A hramthawknak hmanthlak zoh.)

14 Hi vawlei donghnak a nai tuk cang ti kha Jehovah miphun tampi nih an hngalh i hmaikal ṭuan khawh awkah nunning sawhsawh tein an nung. (1 Kor. 9:19, 23) Mahle hmunhma ah hmaikal a ṭuanmi an um bantukin a herh deuhnak hmun ah aa ṭhialmi zong an um. A luancia kumnga chungah ah hmaanhmaan hmaikal a ṭuanmi 1,100,000 leng an si. Cucaah caantling phungchimnak ah aa telmi cu 250,000 leng an karh. Mah cu mi tampi nih zalonnak kha Jehovah rianṭuannak ah an hmannak thawngin hmuhmi ṭhatnak a si.—Salm 110:3.

15 Zalonnak kha fimkhur tein hman awkah zeinihdah a bawmh hna? A luancia kum 30 chungah ram tampi ah Pathian rian a ṭuanmi John le Judith kong hi ruathmanh. Hmaikal Tinṭan an thawk kum, 1977 ah siangngakchia pawl cu a herh deuhnak hmun ah i ṭhial dingin tha pek an si. Cutin tuah khawh awkah John le Judith cu nunning sawhsawh tein an nun a hau. Cucaah John cu a rian aa thleng lengmang. A donghnak ah ramdang ah phungchim dingin an i ṭhial. Holh thar cawn awk, nunphung thar le khuacaan thar he i ziak awkah zeinihdah a bawmh hna? Jehovah sinah thla an cam i amah kha an i bochan. Cutin Jehovah rian an ṭuanmi kha zeitindah an hmuh?  John nih hitin a ti: “A ṭha bikmi rian ah kaa pumpe tiin ka ruah. Jehovah cu ka caah a um taktakmi le dawtnak a ngeimi pa bantuk a hung si. Atu cu Jeim 4:8 i ‘Pathian cu naih u law aan naih ve hna lai’ timi bia kha ṭha tein ka hngalhthiam cang. Ka kawlmi, sullam a ngeimi nunnak kha ka hmuh cang.”

16. Mi tampi nih an ngeihmi zalonnak kha fimkhur tein zeitindah an hman?

16 John le Judith bantukin mi cheukhat cu Pathian rian kha caan saupi an ṭuan kho. Cheukhat tu cu an sining ruangah caan tlawmpal lawng an ṭuan kho. Asinain mah lungtho tein aa pemi, mi tampi cu vawleicung pumpi i innsaknak rian ah an i tel. Tahchunhnak ah, New York, Warwick i vawleicung pumpi zungpi saknak ah unau 27,000 hrawng an i tel kho. Cheukhat cu zarhhnih, cheukhat cu thla tlawmpal, cheukhat tu cu kumkhat leng an ṭuan kho. Tam deuh nih cun cuka i rianṭuan awkah mahca ṭhatnak tampi an hlawt. Luatnak Pathian, Jehovah thangṭhatnak caah zalonnak a hmangmi hna cu zohchunh awk taktak an si.

17. Zalonnak fimkhur tein kan hman ahcun zei thluachuah dah kan hmuh lai?

17 Jehovah kha kan hngalh i amah biaknak in kan hmuhmi zalonnak cungah kan i lawm tuk hringhran. Kan i thimmi nih zalonnak cu kan caah a sunglawi tuk ti kha langhter ko seh. Zalonnak kha ningcang loin si loin Jehovah rian ah a si khawh chung telnak thawngin hmang hna u sih. Mah tikah Jehovah biakammi mah thluachuah a tlinmi hi kan hmuh lai: “Ruahchannak cu zeidah a si tiah, ni khatkhat cu sermi thil vialte hi thutnak sal sinak khan luatter an si lai i Pathian fale hna luatnak a sunglawimi kha an i hrawm te lai.”—Rom 8:21.